Njudzi dze bunandzwa dzopanduka
(2 Zwiyitikalo 10:1-19)1 Rehoboamu kayenda ku Shekemu, ngobe Baiziraela bose bakabe bazha ku Shekemu kuwombiga mambo. 2 Ngono kukati Jeroboamu nkololo wa Nebati wakabe atizhila ku Egipiti etizha Mambo Solomoni, ehwa thawu idzedzi, kashanduka kudwa ku Egipiti kwaakabe atizhila. 3 Ngono bakatuma bathu kunon'dana. Jeroboamu ne gubungano lose le Iziraela bakayenda kuna Rehoboamu bakaswika bendwa beti, 4 “Tate babo bakabe betidziyidza, bakatisengesa ntolo unolema. Ngono ngwenu utilelusile ntolo watakakhigiwa ndi tate babo, towobe pasi kuko tikakushingila.”
5 Ngono Rehoboamu kabadabila eti, “Yendani zwenyu, mukobuya kundili shule kwe mazhuba matatu.” Bathu bakayenda zwabo.
6 Ndizo Mambo Rehoboamu kadana sholotjena dzakashinga na tate babe Solomoni batjatjila, kukumbila gumbuludzo. Kabadwa kati, “Mondipa gumbuludzo linotini, kuti ndizhe ndishandule bathu ibaba kene?”
7 Ngono bakandwa bakati, “Ha ungazwiyisa pasi kwe bathu ibaba, ukabalebesa nge matama mabuyanana banowobe balanda babo nge kusingapele.” 8 Koga Rehoboamu kalamba gumbuludzo laapiwa nge sholotjena, kanoshaka gumbuludzo ku bazhuzha baakakula nabo 9 kabadwa kati, “Mondipa gumbulodzo linotini kuti tidabile bathu ibaba bandidwa beti, ‘Utilelusile ntolo watakakhigiwa ndi tate babo’ kene?” 10 Ngono bazhuzha bakakula na Rehoboamu bakandwa bakati, “Udwe bathu ibaba bakakudwa beti, ‘Tate babo bakatikhiga ntolo unolema, ngono ngwenu utilelusile ntolo watakakhigiwa,’ uti, ‘Tjinyala tjangu tje luboko tjitikini tjikodu kupinda thunji dza tate. 11 Ngono ngwenu, tate bangu pabakamukhiga ntolo unolema, ndowutiliyanya ne unolema bo. Tate bakabe bemulaya nge rwabha, koga imi ndowomulaya nge makungubudza.’ ”
12 Shule kwe mazhuba matatu Jeroboamu ne bathu bose bakabuya kuna Rehoboamu kakale sekwa akabadwa. 13 Mambo kashandula bathu nge kubagongobola elasha gumbuludzo laakapiwa nge sholotjena. 14 Kabalebesa kuyenda nge gumbuludzo le bazhuzha eti, “Tate bakamukhiga ntolo unolema, koga imi ndowoutiliyanya nge mmwe. Tate bakabe bemulaya nge rwabha, koga imi ndowomulaya nge makungubudza.” 15 Ipapo mambo kasitongo teedza bathu, ngoti zwakabe zwili zwiyitikalo zwinozhisa kushanduka kwakalebgwa ndi Yahwe kuti kuzhadzisike dama la Yahwe lakalebgwa kuna Jeroboamu nkololo wa Nebati nge nlebesambeli Ahija we Nshilo.
16 Kukati Baiziraela bose be bona kuti mambo aatobateedza, bakashandula mambo beti,
“Apa tina gobe lipi muna Dafite?
Naiko atina lukata mu nkololo wa Jesi.
Baiziraela, atiyendeni kanyi!
Iwe Dafite, utjilinga be nsha uwo.”
Ndizo Baiziraela bakayenda ku mizi yabo. 17 Koga Rehoboamu kasala ebusa Baiziraela bakabe begala mu mizi mikulu ye Juda.
18 Ndizo Mambo Rehoboamu katuma Adoramu wakabe ali nlingi we bashingi, ngono Baiziraela bose bakankikithidza nge mabgwe kafa. Tjinyolotjo Mambo Rehoboamu katatha koloyi dzidze dze ngwa katizhila ku Jerusalema. 19 Tjinga kwe tjibaka itjetjo Iziraela ikapandukila nsha wa Dafite kuswikila nasi.
20 Kukati Baiziraela bose behwa kuti Jeroboamu wakabuya, bakatuma bathu kunon'danila ku gubungano, bakambiga mambo we Iziraela yose. Kukasala ludzi gwa Juda ndigo goga gwakasala guli pasi kwe ng'umba ya Dafite.
Bulebesambeli gwa Shemaya
(2 Zwiyitikalo 11:1-4)21 Kukati Rehoboamu eswika ku Jerusalema, kakubunganya babhayani bali zwiwulu zwili zana lina makumi ali zhanakadzi 180 000, kudwa mu nsha wose wa Juda ne ludzi gose gwa Bhenjamini. Akazwimisila kunogwa ne Iziraela kubuzila mbuso kuna Rehoboamu nkololo wa Solomoni. 22 Koga dama le Ndzimu likazha kuna Shemaya we nlebesambeli, likandwa likati, 23 Lebeleka na Rehoboamu nkololo wa Solomoni mambo we Juda ne bathu bose ne ng'umba yose ya Juda na Bhenjamini, ubadwe uti, 24 “Yahwe bakati musiyende kunogwa ne bakanyi kwenyu Baiziraela. Shandusila nlume mmwe ne mmwe ku nzi uwe, ngobe tjashingikala tjodwa kundili.” Ndizo bose bakateedza dama la Yahwe, bakashandukila ku nzi, sekwaleba Yahwe.
Phulu dze Golide dza Jeroboamu
25 Ndizo Jeroboamu kabaka Shekemu mu shango ye matuthu ye Ifureimi kagalapo. Shule kabhuda kanobaka Penuele. 26 Ngono Jeroboamu kazwidwa mu moyo kati, “Ngwenu mbuso unowobgwilila mu ng'umba ya Dafite. 27 Ha bathu ibaba bangatathila ku Jerusalema kunoyisa zwibhayilo kuna Yahwe, mu Ng'umba ye Ndzimu, moyo yabo inowoshandukila kakale kuna Mambo Rehoboamu we Juda bebe bendibulaya.”
28 Ipapo mambo kashaka gumbuludzo, kathama mikong'wana mibili ye golide. Ngono kadwa bathu kati, “Makatathila ku Jerusalema kwatjilizana. Bonani, imwi Baiziraela, midzimu yenyu eyi, yakamudusa mu shango ye Egipiti.” 29 Kabiga nkong'wana mmwe we golide mu Bhetele, mmwe kaubiga mu Dani. 30 Ngono kuthu ikoku kukabe tjibi, ngobe bathu bakabe benonamata nkong'wana uku Bhetele bamwe bakayenda bukule kunonamata nkong'wana umu Dani. 31 Jeroboamu kabaka dzimwe ng'umba dze minamato makatuthumala, ebe eshalula bamwe bathu ebabiga bapirisiti, nenguba basi be ng'umba ye Balevi.
Kunamata ku Bhetele akutoamutjigwa
32 Jeroboamu kabiga zhuba le bugumi lina kushanu le mwedzi we buzhanakadzi kube le nzano unonga nzano umu Juda. Kayisila mikong'wana ye golide zwibhayilo zwinopisiwa mu tjibeso tjinopisigwa zwibhayilo tjimu Bhetele. Ngono kabiga bapirisiti mu magalo e minamato akatuthumala, aakathama mu Bhetele. 33 Mu zhuba le bugumi lina bushanu le mwedzi we buzhanakadzi, laakazwibigila, wakabe eyenda ku Bhetele kunoyisa tjibhayilo tjinopisiwa mu tjibeso tjinopisigwa zwibhayilo. Kushathisa nzano waakabigila bana be Iziraela.
Njudzi dze bunandzwa dzopanduka
(2 Zwiyitikalo 10:1-19)1 Rehoboamu kayenda ku Shekemu, ngobe Baiziraela bose bakabe bazha ku Shekemu kuwombiga mambo. 2 Ngono kukati Jeroboamu nkololo wa Nebati wakabe atizhila ku Egipiti etizha Mambo Solomoni, ehwa thawu idzedzi, kashanduka kudwa ku Egipiti kwaakabe atizhila. 3 Ngono bakatuma bathu kunon'dana. Jeroboamu ne gubungano lose le Iziraela bakayenda kuna Rehoboamu bakaswika bendwa beti, 4 “Tate babo bakabe betidziyidza, bakatisengesa ntolo unolema. Ngono ngwenu utilelusile ntolo watakakhigiwa ndi tate babo, towobe pasi kuko tikakushingila.”
5 Ngono Rehoboamu kabadabila eti, “Yendani zwenyu, mukobuya kundili shule kwe mazhuba matatu.” Bathu bakayenda zwabo.
6 Ndizo Mambo Rehoboamu kadana sholotjena dzakashinga na tate babe Solomoni batjatjila, kukumbila gumbuludzo. Kabadwa kati, “Mondipa gumbuludzo linotini, kuti ndizhe ndishandule bathu ibaba kene?”
7 Ngono bakandwa bakati, “Ha ungazwiyisa pasi kwe bathu ibaba, ukabalebesa nge matama mabuyanana banowobe balanda babo nge kusingapele.” 8 Koga Rehoboamu kalamba gumbuludzo laapiwa nge sholotjena, kanoshaka gumbuludzo ku bazhuzha baakakula nabo 9 kabadwa kati, “Mondipa gumbulodzo linotini kuti tidabile bathu ibaba bandidwa beti, ‘Utilelusile ntolo watakakhigiwa ndi tate babo’ kene?” 10 Ngono bazhuzha bakakula na Rehoboamu bakandwa bakati, “Udwe bathu ibaba bakakudwa beti, ‘Tate babo bakatikhiga ntolo unolema, ngono ngwenu utilelusile ntolo watakakhigiwa,’ uti, ‘Tjinyala tjangu tje luboko tjitikini tjikodu kupinda thunji dza tate. 11 Ngono ngwenu, tate bangu pabakamukhiga ntolo unolema, ndowutiliyanya ne unolema bo. Tate bakabe bemulaya nge rwabha, koga imi ndowomulaya nge makungubudza.’ ”
12 Shule kwe mazhuba matatu Jeroboamu ne bathu bose bakabuya kuna Rehoboamu kakale sekwa akabadwa. 13 Mambo kashandula bathu nge kubagongobola elasha gumbuludzo laakapiwa nge sholotjena. 14 Kabalebesa kuyenda nge gumbuludzo le bazhuzha eti, “Tate bakamukhiga ntolo unolema, koga imi ndowoutiliyanya nge mmwe. Tate bakabe bemulaya nge rwabha, koga imi ndowomulaya nge makungubudza.” 15 Ipapo mambo kasitongo teedza bathu, ngoti zwakabe zwili zwiyitikalo zwinozhisa kushanduka kwakalebgwa ndi Yahwe kuti kuzhadzisike dama la Yahwe lakalebgwa kuna Jeroboamu nkololo wa Nebati nge nlebesambeli Ahija we Nshilo.
16 Kukati Baiziraela bose be bona kuti mambo aatobateedza, bakashandula mambo beti,
“Apa tina gobe lipi muna Dafite?
Naiko atina lukata mu nkololo wa Jesi.
Baiziraela, atiyendeni kanyi!
Iwe Dafite, utjilinga be nsha uwo.”
Ndizo Baiziraela bakayenda ku mizi yabo. 17 Koga Rehoboamu kasala ebusa Baiziraela bakabe begala mu mizi mikulu ye Juda.
18 Ndizo Mambo Rehoboamu katuma Adoramu wakabe ali nlingi we bashingi, ngono Baiziraela bose bakankikithidza nge mabgwe kafa. Tjinyolotjo Mambo Rehoboamu katatha koloyi dzidze dze ngwa katizhila ku Jerusalema. 19 Tjinga kwe tjibaka itjetjo Iziraela ikapandukila nsha wa Dafite kuswikila nasi.
20 Kukati Baiziraela bose behwa kuti Jeroboamu wakabuya, bakatuma bathu kunon'danila ku gubungano, bakambiga mambo we Iziraela yose. Kukasala ludzi gwa Juda ndigo goga gwakasala guli pasi kwe ng'umba ya Dafite.
Bulebesambeli gwa Shemaya
(2 Zwiyitikalo 11:1-4)21 Kukati Rehoboamu eswika ku Jerusalema, kakubunganya babhayani bali zwiwulu zwili zana lina makumi ali zhanakadzi 180 000, kudwa mu nsha wose wa Juda ne ludzi gose gwa Bhenjamini. Akazwimisila kunogwa ne Iziraela kubuzila mbuso kuna Rehoboamu nkololo wa Solomoni. 22 Koga dama le Ndzimu likazha kuna Shemaya we nlebesambeli, likandwa likati, 23 Lebeleka na Rehoboamu nkololo wa Solomoni mambo we Juda ne bathu bose ne ng'umba yose ya Juda na Bhenjamini, ubadwe uti, 24 “Yahwe bakati musiyende kunogwa ne bakanyi kwenyu Baiziraela. Shandusila nlume mmwe ne mmwe ku nzi uwe, ngobe tjashingikala tjodwa kundili.” Ndizo bose bakateedza dama la Yahwe, bakashandukila ku nzi, sekwaleba Yahwe.
Phulu dze Golide dza Jeroboamu
25 Ndizo Jeroboamu kabaka Shekemu mu shango ye matuthu ye Ifureimi kagalapo. Shule kabhuda kanobaka Penuele. 26 Ngono Jeroboamu kazwidwa mu moyo kati, “Ngwenu mbuso unowobgwilila mu ng'umba ya Dafite. 27 Ha bathu ibaba bangatathila ku Jerusalema kunoyisa zwibhayilo kuna Yahwe, mu Ng'umba ye Ndzimu, moyo yabo inowoshandukila kakale kuna Mambo Rehoboamu we Juda bebe bendibulaya.”
28 Ipapo mambo kashaka gumbuludzo, kathama mikong'wana mibili ye golide. Ngono kadwa bathu kati, “Makatathila ku Jerusalema kwatjilizana. Bonani, imwi Baiziraela, midzimu yenyu eyi, yakamudusa mu shango ye Egipiti.” 29 Kabiga nkong'wana mmwe we golide mu Bhetele, mmwe kaubiga mu Dani. 30 Ngono kuthu ikoku kukabe tjibi, ngobe bathu bakabe benonamata nkong'wana uku Bhetele bamwe bakayenda bukule kunonamata nkong'wana umu Dani. 31 Jeroboamu kabaka dzimwe ng'umba dze minamato makatuthumala, ebe eshalula bamwe bathu ebabiga bapirisiti, nenguba basi be ng'umba ye Balevi.
Kunamata ku Bhetele akutoamutjigwa
32 Jeroboamu kabiga zhuba le bugumi lina kushanu le mwedzi we buzhanakadzi kube le nzano unonga nzano umu Juda. Kayisila mikong'wana ye golide zwibhayilo zwinopisiwa mu tjibeso tjinopisigwa zwibhayilo tjimu Bhetele. Ngono kabiga bapirisiti mu magalo e minamato akatuthumala, aakathama mu Bhetele. 33 Mu zhuba le bugumi lina bushanu le mwedzi we buzhanakadzi, laakazwibigila, wakabe eyenda ku Bhetele kunoyisa tjibhayilo tjinopisiwa mu tjibeso tjinopisigwa zwibhayilo. Kushathisa nzano waakabigila bana be Iziraela.