Kuzwagwa kwa Jesu
(Matewu 1:18-25)1 Kwakati mu misi iyeyo, Kaisara Agusito, kadusa nlayo unoti, mazina e bathu mu shango yose ye Roma akwagwe. 2 Kukwagwa ikoku, kwakabe kuli kwe kutanga kuthamiwa, Kwiriniyo ali nlauli we Siriya. 3 Ngono mmwe ne mmwe kayenda kanyi kwabo kunozwikwalisa.
4 Josefa na iye kabhuda mu Galili mu nzi we Nazareta, kayenda ku Judiya ku nzi wa Dafite unodang'wa Bhetelehema, ngobe wakabe ali we nsha wa Dafite. 5 Kayenda ikoko kunozwikwalisa na Mariya waakabe abiganyidzila ndobolo. Mariya wakabe akuligwa. 6 Kukati batji ikoko, tjibaka tjikazha tjekuti mwana azwagwe, 7 ngono katshibama mbano iye ye tjilisana. Kampetela nge matyila ngono kankushika mu n'goro, ngobe kusina bugalo mu ng'umba ye bezi.
Batumwa banobudza balisi ngekwa Jesu
8 Kwakabe kuna balisi mu ntuthu iwoyo, begala mu shango bakalisa pkhwizi dzabo busiku. 9 Ntumwa wa She kaboneka ku bali ne tjedza tja She tjikapenya kubapoteleka, ndizo bakatja. 10 Koga ntumwa we kudzimu kati ku bali, “Musitje! Ngobe bonani, ndamuzhisila ndebo mbuya ye kushatha kukulu, kunowozha mu bathu bose. 11 Nasi mu nzi wa Dafite, mazwaligwa Ntjidzi, Kirisiti ali She. 12 Tjilakidzo kumuli tjowobe etji, mowowana mwana akapetegwa nge matyila ali lele mu n'goro.”
13 Tjinyolotjo kwakaboneka ntumwa we kudzimu ana bunji gwe goko le kudzimu bekudza Ndzimu beti,
14 “Gudzo ngalibe ku Ndzimu Upezhugwi zhugwi kudzimu,
ne mu shango ngakubepo kunyalala mu bathu banoushathisa.”
15 Kukati batumwa be kudzimu batjibgwilila kudzimu, balisi bakalebesana beti, “Ngatiyendeni ku Bhetelehema tinobona tjithu itjetji tjashingikala, tjatalakidziwa ndi She.”
16 Ndizo bakalibilidza bakayenda, bakawana Mariya na Josefa ne mwana ali lele mu n'goro. 17 Bakati bambona, bakaleba sekwa bababudziwa ngekwe mwana iwoyu. 18 Bose bakahwa bakatjenamila tjalebwa nge balisi. 19 Koga Mariya kalondolodza zwithu izwezwi zose, kazwikumbula mu moyo uwe. 20 Balisi bakabgwilila, bekudza Ndzimu beulumbidza mu zwithu zose zwabakabe bahwa ne zwabakabe babona ngobe zwakabe zwili sekwa bakabe babudziwa.
Jesu unopiwa zina
21 Mu zhuba le buzhanakadzi, kukabe kwabe tjibaka tjekuti athumbigwe, ngono katumigwa zina kuyi Jesu, zina laakapiwa nge ntumwa we kudzimu mmeyabe basathu bakazwisenga.
Jesu unoyisiwa ku Ng'umba ye Ndzimu
22 Kukati tjibaka tje kutjenepadza kuyendidzana nge nlayo wa Mushe tjazha, Josefa na Mariya bakayisa Jesu ku Jerusalema kumpa She Ndzimu 23 sekwa kwakakwagwa mu nlayo wa She kuyi, “Mbano imwe ne imwe ye mbisana inowobigigwa ntome kuti ibe mwana wa She,” 24 kakale bakabe benolondolodza tjimu nlayo wa She nge kudusa tjibhayilo, “Njiba mbili kene ngurukukwana mbili.”
25 Kwakabe kuna mmwe nlume mu Jerusalema edang'wa kuyi Simiyoni. Wakabe akalulwama mu mesho e Ndzimu akazwipa nge buzhalo. Wakabe akalindila Ndzimu kubhatsha Iziraela ne Meya yakayengemala yakabe ili munli. 26 Wakabe azumbunuligwa nge Meya yakayengemala kuti aangafe asathu kabona Kirisiti wa She. 27 Meya yakayengemala ikathama kuti Simiyoni angine mu ng'umba ye Ndzimu. Kukati bazwadzi bazhisa mwana wabo Jesu kuwonthamila tjinoshakwa nge nlayo, 28 Simiyoni kamfukata nge maboko awe, ngono kakudza Ndzimu eti,
29 “She, sekwa makagadzabgwe,
ngwenu tjiletjani nlanda wenyu eyizele nge mbakiso.
30 Ngobe mesho angu abona jidzo lenyu,
31 lamakathama mbeli kwe bathu bose.
32 Tjedza tje zumbunulo kuna be zwitjaba,
ne tjilumbi tje bathu benyu Iziraela.”
33 Tate na mme be mwana bakatjenamisiwa nge tjinolebgwa nge kukwe. 34 Ipapo Simiyoni kabakombolela, ngono kati kuna Mariya mmeyabe, “Mwana iwoyu wakabigigwa kuwa ne kumuka kwe banji mu Iziraela ne kube tjilakidzo tjinowonyanyayidziwa. 35 Ngono unowohwa zogwadza ukanga nthu wabhayiwa nge thumo kuti ndizo Ndzimu uzumbunule tjinokumbugwa ne mmwe ne mmwe.”
36 Kwakabe kuli yapo nlebesambeli we tjikadzi edang'wa Anna, ali nkololokadzi wa Fanuele, we ludzi gwa Asheri. Wakabe akakwegula kwazo. Wakatjila ne nlume uwe makole ali kutendeka shule kwe ndobolo yabo, nlume uwe kabe efa. 37 Ngono ipapo kabe tjilikadzi kuswikila ana makole ali makumi ali zhanakadzi ana makole manna. Wakabe asingabhude mu Ng'umba ye Ndzimu, koga enamata Ndzimu siku ne sikati, ezwinyima zojiwa, etembezela. 38 Kazha ku bali tjibaka itjetjo, kaboka Ndzimu kalebeleka ngekwe mwana kuna bose bakabe bakalindila kusunungugwa kwe Jerusalema.
Kubgwilila kwa Josefa na Mariya ku Nazareta
39 Kukati Josefa na Mariya bapedza zose zwinoshakwa nge nlayo wa She, bakabgwilila ku nzi wa kanyi kwabo we Nazareta mu ntuthu we Galili. 40 Ndizo mwana kakula kasima kakale akatjenjela kwazo ne Ndzimu un'da.
Mbisana Jesu ali mu Ng'umba ye Ndzimu
41 Gole ne gole bazwadzi ba Jesu bakabe beyenda ku Jerusalema ku Nzano we Kupinda pezhugwi. 42 Kukati ana makole ali gumi lina makole mabili, bakayenda ku nshingo se wolobela kwabo. 43 Kukati nshingo wapela bebgwilila kanyi, mbisana Jesu kasala mu Jerusalema, koga bazwadzi babe bakasizibe ikoku. 44 Bakayenda gwendo gwe zhuba lose bekumbula kuti umuna ibabo babanoyenda nabo. Bakatangisa kunshaka mu makamu abo ne mu bazwalani babo. 45 Bakati bansheta bakabgwilila ku Jerusalema kunshaka. 46 Shule kwe mazhuba matatu bakan'wana mu Ng'umba ye Ndzimu ali gele pakati kwe badiyi be nlayo, akabahwilila kakale ebabhuzwa dzibhuzo. 47 Bose bakahwa bakatjenamila kuhwisisa kukwe nenge dabilo dzidze. 48 Kukati bazwadzi babe bembona bakakaabala. Mmeyabe bakati kunli, “Mwanangu, ini watibhata uyijali! Bona, tabe tikushaka na tate babo, tidziyidzika mu meya.”
49 Kababhuzwa kati, “Ini mabe mundishaka? Amuzobe muziba kuti ndakafanila kube mu ng'umba ya Tate bangu kene?” 50 Koga bakasihwisise ndebo yaaleba ebabudza.
51 Shule kwa ikoko kayenda nabo ku Nazareta, ngono ebateta. Koga mmeyabe bakalondolodza zwithu izwezwi zose mu moyo wabo. 52 Jesu kakula akatjenjela kwazo, ediwa nge Ndzimu nenge bathu.
Kuzwagwa kwa Jesu
(Matewu 1:18-25)1 Kwakati mu misi iyeyo, Kaisara Agusito, kadusa nlayo unoti, mazina e bathu mu shango yose ye Roma akwagwe. 2 Kukwagwa ikoku, kwakabe kuli kwe kutanga kuthamiwa, Kwiriniyo ali nlauli we Siriya. 3 Ngono mmwe ne mmwe kayenda kanyi kwabo kunozwikwalisa.
4 Josefa na iye kabhuda mu Galili mu nzi we Nazareta, kayenda ku Judiya ku nzi wa Dafite unodang'wa Bhetelehema, ngobe wakabe ali we nsha wa Dafite. 5 Kayenda ikoko kunozwikwalisa na Mariya waakabe abiganyidzila ndobolo. Mariya wakabe akuligwa. 6 Kukati batji ikoko, tjibaka tjikazha tjekuti mwana azwagwe, 7 ngono katshibama mbano iye ye tjilisana. Kampetela nge matyila ngono kankushika mu n'goro, ngobe kusina bugalo mu ng'umba ye bezi.
Batumwa banobudza balisi ngekwa Jesu
8 Kwakabe kuna balisi mu ntuthu iwoyo, begala mu shango bakalisa pkhwizi dzabo busiku. 9 Ntumwa wa She kaboneka ku bali ne tjedza tja She tjikapenya kubapoteleka, ndizo bakatja. 10 Koga ntumwa we kudzimu kati ku bali, “Musitje! Ngobe bonani, ndamuzhisila ndebo mbuya ye kushatha kukulu, kunowozha mu bathu bose. 11 Nasi mu nzi wa Dafite, mazwaligwa Ntjidzi, Kirisiti ali She. 12 Tjilakidzo kumuli tjowobe etji, mowowana mwana akapetegwa nge matyila ali lele mu n'goro.”
13 Tjinyolotjo kwakaboneka ntumwa we kudzimu ana bunji gwe goko le kudzimu bekudza Ndzimu beti,
14 “Gudzo ngalibe ku Ndzimu Upezhugwi zhugwi kudzimu,
ne mu shango ngakubepo kunyalala mu bathu banoushathisa.”
15 Kukati batumwa be kudzimu batjibgwilila kudzimu, balisi bakalebesana beti, “Ngatiyendeni ku Bhetelehema tinobona tjithu itjetji tjashingikala, tjatalakidziwa ndi She.”
16 Ndizo bakalibilidza bakayenda, bakawana Mariya na Josefa ne mwana ali lele mu n'goro. 17 Bakati bambona, bakaleba sekwa bababudziwa ngekwe mwana iwoyu. 18 Bose bakahwa bakatjenamila tjalebwa nge balisi. 19 Koga Mariya kalondolodza zwithu izwezwi zose, kazwikumbula mu moyo uwe. 20 Balisi bakabgwilila, bekudza Ndzimu beulumbidza mu zwithu zose zwabakabe bahwa ne zwabakabe babona ngobe zwakabe zwili sekwa bakabe babudziwa.
Jesu unopiwa zina
21 Mu zhuba le buzhanakadzi, kukabe kwabe tjibaka tjekuti athumbigwe, ngono katumigwa zina kuyi Jesu, zina laakapiwa nge ntumwa we kudzimu mmeyabe basathu bakazwisenga.
Jesu unoyisiwa ku Ng'umba ye Ndzimu
22 Kukati tjibaka tje kutjenepadza kuyendidzana nge nlayo wa Mushe tjazha, Josefa na Mariya bakayisa Jesu ku Jerusalema kumpa She Ndzimu 23 sekwa kwakakwagwa mu nlayo wa She kuyi, “Mbano imwe ne imwe ye mbisana inowobigigwa ntome kuti ibe mwana wa She,” 24 kakale bakabe benolondolodza tjimu nlayo wa She nge kudusa tjibhayilo, “Njiba mbili kene ngurukukwana mbili.”
25 Kwakabe kuna mmwe nlume mu Jerusalema edang'wa kuyi Simiyoni. Wakabe akalulwama mu mesho e Ndzimu akazwipa nge buzhalo. Wakabe akalindila Ndzimu kubhatsha Iziraela ne Meya yakayengemala yakabe ili munli. 26 Wakabe azumbunuligwa nge Meya yakayengemala kuti aangafe asathu kabona Kirisiti wa She. 27 Meya yakayengemala ikathama kuti Simiyoni angine mu ng'umba ye Ndzimu. Kukati bazwadzi bazhisa mwana wabo Jesu kuwonthamila tjinoshakwa nge nlayo, 28 Simiyoni kamfukata nge maboko awe, ngono kakudza Ndzimu eti,
29 “She, sekwa makagadzabgwe,
ngwenu tjiletjani nlanda wenyu eyizele nge mbakiso.
30 Ngobe mesho angu abona jidzo lenyu,
31 lamakathama mbeli kwe bathu bose.
32 Tjedza tje zumbunulo kuna be zwitjaba,
ne tjilumbi tje bathu benyu Iziraela.”
33 Tate na mme be mwana bakatjenamisiwa nge tjinolebgwa nge kukwe. 34 Ipapo Simiyoni kabakombolela, ngono kati kuna Mariya mmeyabe, “Mwana iwoyu wakabigigwa kuwa ne kumuka kwe banji mu Iziraela ne kube tjilakidzo tjinowonyanyayidziwa. 35 Ngono unowohwa zogwadza ukanga nthu wabhayiwa nge thumo kuti ndizo Ndzimu uzumbunule tjinokumbugwa ne mmwe ne mmwe.”
36 Kwakabe kuli yapo nlebesambeli we tjikadzi edang'wa Anna, ali nkololokadzi wa Fanuele, we ludzi gwa Asheri. Wakabe akakwegula kwazo. Wakatjila ne nlume uwe makole ali kutendeka shule kwe ndobolo yabo, nlume uwe kabe efa. 37 Ngono ipapo kabe tjilikadzi kuswikila ana makole ali makumi ali zhanakadzi ana makole manna. Wakabe asingabhude mu Ng'umba ye Ndzimu, koga enamata Ndzimu siku ne sikati, ezwinyima zojiwa, etembezela. 38 Kazha ku bali tjibaka itjetjo, kaboka Ndzimu kalebeleka ngekwe mwana kuna bose bakabe bakalindila kusunungugwa kwe Jerusalema.
Kubgwilila kwa Josefa na Mariya ku Nazareta
39 Kukati Josefa na Mariya bapedza zose zwinoshakwa nge nlayo wa She, bakabgwilila ku nzi wa kanyi kwabo we Nazareta mu ntuthu we Galili. 40 Ndizo mwana kakula kasima kakale akatjenjela kwazo ne Ndzimu un'da.
Mbisana Jesu ali mu Ng'umba ye Ndzimu
41 Gole ne gole bazwadzi ba Jesu bakabe beyenda ku Jerusalema ku Nzano we Kupinda pezhugwi. 42 Kukati ana makole ali gumi lina makole mabili, bakayenda ku nshingo se wolobela kwabo. 43 Kukati nshingo wapela bebgwilila kanyi, mbisana Jesu kasala mu Jerusalema, koga bazwadzi babe bakasizibe ikoku. 44 Bakayenda gwendo gwe zhuba lose bekumbula kuti umuna ibabo babanoyenda nabo. Bakatangisa kunshaka mu makamu abo ne mu bazwalani babo. 45 Bakati bansheta bakabgwilila ku Jerusalema kunshaka. 46 Shule kwe mazhuba matatu bakan'wana mu Ng'umba ye Ndzimu ali gele pakati kwe badiyi be nlayo, akabahwilila kakale ebabhuzwa dzibhuzo. 47 Bose bakahwa bakatjenamila kuhwisisa kukwe nenge dabilo dzidze. 48 Kukati bazwadzi babe bembona bakakaabala. Mmeyabe bakati kunli, “Mwanangu, ini watibhata uyijali! Bona, tabe tikushaka na tate babo, tidziyidzika mu meya.”
49 Kababhuzwa kati, “Ini mabe mundishaka? Amuzobe muziba kuti ndakafanila kube mu ng'umba ya Tate bangu kene?” 50 Koga bakasihwisise ndebo yaaleba ebabudza.
51 Shule kwa ikoko kayenda nabo ku Nazareta, ngono ebateta. Koga mmeyabe bakalondolodza zwithu izwezwi zose mu moyo wabo. 52 Jesu kakula akatjenjela kwazo, ediwa nge Ndzimu nenge bathu.