Elija na Ahaziya
1 Kwakati shule kwe lufu gwa Ahabu, Moabu ikapandukila Iziraela.
2 Ahaziya wakawa nge fesitere lakalukiwa le ng'umba iye itja pezhugwi mu Samariya, kakubala, ngono katuma batumwa, kabadwa kati, “Yendani munobhuzwa kuna Bhaalezebubu ndzimu we Ekironi kuti kene ndowopola mu kukubala ikoku.” 3 Koga ntumwa wa Yahwe kadwa Elija we N'tishibhe kati, “Milika, yenda unoshanganidza batumwa ba mambo we Samariya, ngono ubabhuzwe uti, ‘Apa ndikuti akuna Ndzimu mu Iziraela kwamungadzina mukayenda kunobhuzwa kuna Bhaalezebubu ndzimu we Ekironi kene?’ 4 Ndizo tjinoleba Yahwe etji, ‘Autowodwa mu bulawo gwa ulele muguli, nge malebeswa unowofa.’ ” Elija kayenda.
5 Batumwa bakashandukila kuna mambo, ngono kababhuzwa kati, “Ini mashanduka kene?” 6 Bakashandula beti, “Kwazha mmwe nlume kutishanganidza, ngono katidwa kati, ‘Bgwililani kuna mambo wamutuma, mundwe muti: Tjinoleba Yahwe etji, apa ndikuti akuna Ndzimu mu Iziraela kwamungadzina mukatuma bathu kunobhuzwa kuna Bhaalezebubu ndzimu we Ekironi kene? Ndizo autowodwa mu bulawo gwa ulele muguli, nge malebeswa unowofa.’ ” 7 Kati kubali, “Kwabe kuli nlume wakatini wazha kuwomushanganidza kumubudza zwithu zwakajali kene?” 8 Bakashandula beti, “Wabe akaambala tjiambalo tje bukuse, ana mwandabula we ganda mu thunji dzidze.” Mambo kati, “Ndi Elija we N'tishibhe.”
9 Ipapo mambo katuma ntungamili we bali makumi mashanu (50) ne balume bali makumi mashanu (50). Ntungamili katathila kuna Elija wakabe aligele pezhugwi kwe duthu, kati kunli, “Iwe nlume we Ndzimu, mambo bakati, ‘Deluka.’ ” 10 Ngono Elija kashandula ntungamili we bali makumi mashanu (50) kati, “Ha ndili nlume we Ndzimu, moto ngaudeluke udwa kudzimu ukulotese iwe ne balume babo bali makumi mashanu” (50). Ipapo moto ukadeluka udwa kudzimu ukabalotesa, iye ne bali makumi mashanu (50).
11 Mambo katuma mmwe ntungamili we bali makumi mashanu (50) kakale ne balume babe bali makumi mashanu (50). Ntungamili katathila pezhugwi kandwa kati, “Iwe nlume we Ndzimu, mambo bakati, ‘Deluka tjinyolotjo.’ ” 12 Ngono Elija kabashandula eti, “Ha ndili nlume we Ndzimu, moto ngaudeluke kudzimu umulotese iwe ne balume babo bali makumi mashanu” (50). Ipapo moto we Ndzimu ukadeluka kudzimu ukanlotesa ne balume babe bali makumi mashanu (50).
13 Mambo katuma kakale gwe butatu ntungamili we bali makumi mashanu (50). Ntungamili we butatu we bali makumi mashanu katathila pezhugwi, kawa pasi nge zwidwi mbeli kwa Elija, kankumbila kati, “Iwe nlume we Ndzimu, ndokumbila utjidze butjilo gwangu ne butjilo gwe balanda babo ibaba bali makumi mashanu (50), ube ne ngoni mu mesho awo. 14 Bona, moto wakadeluka udwa kudzimu ukalotesa batungamili babili be kutanga ne balume babo. Ndizo ngwenu, butjilo gwangu ngagube tjakanaka mu mesho enyu.” 15 Ntumwa wa Yahwe kabe eti kuna Elija, “Deluka naye, usintje.” Ndizo Elija kamilika kadeluka kayenda naye kuna mambo, 16 ngono kati kuna mambo, “Tjinoleba Yahwe etji, ‘Apa ndikuti akuna Ndzimu mu Iziraela wamunga bhuzwa, kwamungadzina mukatuma batumwa kunobhuzwa kuna Bhaalezebubu ndzimu we Ekironi kene? Ngoti wathama ikoku, autowomuka mu bulawo gwa ulele muguli, nge malebeswa unowofa.’ ”
17 Ndizo Ahaziya wakafa kuyendidzana nge dama la Yahwe lakalebgwa ndi Elija. Ngono Jehoramu mwana wa tate babe kan'gala thaka kube mambo mu gole le bubili la Jehoramu nkololo wa Jehoshafati mambo we Juda, ngobe Ahaziya wakabe asina mwana we tjilisana.
18 Apa mimwe mishingo ya Ahaziya ne zwaakathama azwizokwagwa mu Lukwalo gwe zwiyitikalo gwa bomambo be Iziraela kene?
Elija na Ahaziya
1 Kwakati shule kwe lufu gwa Ahabu, Moabu ikapandukila Iziraela.
2 Ahaziya wakawa nge fesitere lakalukiwa le ng'umba iye itja pezhugwi mu Samariya, kakubala, ngono katuma batumwa, kabadwa kati, “Yendani munobhuzwa kuna Bhaalezebubu ndzimu we Ekironi kuti kene ndowopola mu kukubala ikoku.” 3 Koga ntumwa wa Yahwe kadwa Elija we N'tishibhe kati, “Milika, yenda unoshanganidza batumwa ba mambo we Samariya, ngono ubabhuzwe uti, ‘Apa ndikuti akuna Ndzimu mu Iziraela kwamungadzina mukayenda kunobhuzwa kuna Bhaalezebubu ndzimu we Ekironi kene?’ 4 Ndizo tjinoleba Yahwe etji, ‘Autowodwa mu bulawo gwa ulele muguli, nge malebeswa unowofa.’ ” Elija kayenda.
5 Batumwa bakashandukila kuna mambo, ngono kababhuzwa kati, “Ini mashanduka kene?” 6 Bakashandula beti, “Kwazha mmwe nlume kutishanganidza, ngono katidwa kati, ‘Bgwililani kuna mambo wamutuma, mundwe muti: Tjinoleba Yahwe etji, apa ndikuti akuna Ndzimu mu Iziraela kwamungadzina mukatuma bathu kunobhuzwa kuna Bhaalezebubu ndzimu we Ekironi kene? Ndizo autowodwa mu bulawo gwa ulele muguli, nge malebeswa unowofa.’ ” 7 Kati kubali, “Kwabe kuli nlume wakatini wazha kuwomushanganidza kumubudza zwithu zwakajali kene?” 8 Bakashandula beti, “Wabe akaambala tjiambalo tje bukuse, ana mwandabula we ganda mu thunji dzidze.” Mambo kati, “Ndi Elija we N'tishibhe.”
9 Ipapo mambo katuma ntungamili we bali makumi mashanu (50) ne balume bali makumi mashanu (50). Ntungamili katathila kuna Elija wakabe aligele pezhugwi kwe duthu, kati kunli, “Iwe nlume we Ndzimu, mambo bakati, ‘Deluka.’ ” 10 Ngono Elija kashandula ntungamili we bali makumi mashanu (50) kati, “Ha ndili nlume we Ndzimu, moto ngaudeluke udwa kudzimu ukulotese iwe ne balume babo bali makumi mashanu” (50). Ipapo moto ukadeluka udwa kudzimu ukabalotesa, iye ne bali makumi mashanu (50).
11 Mambo katuma mmwe ntungamili we bali makumi mashanu (50) kakale ne balume babe bali makumi mashanu (50). Ntungamili katathila pezhugwi kandwa kati, “Iwe nlume we Ndzimu, mambo bakati, ‘Deluka tjinyolotjo.’ ” 12 Ngono Elija kabashandula eti, “Ha ndili nlume we Ndzimu, moto ngaudeluke kudzimu umulotese iwe ne balume babo bali makumi mashanu” (50). Ipapo moto we Ndzimu ukadeluka kudzimu ukanlotesa ne balume babe bali makumi mashanu (50).
13 Mambo katuma kakale gwe butatu ntungamili we bali makumi mashanu (50). Ntungamili we butatu we bali makumi mashanu katathila pezhugwi, kawa pasi nge zwidwi mbeli kwa Elija, kankumbila kati, “Iwe nlume we Ndzimu, ndokumbila utjidze butjilo gwangu ne butjilo gwe balanda babo ibaba bali makumi mashanu (50), ube ne ngoni mu mesho awo. 14 Bona, moto wakadeluka udwa kudzimu ukalotesa batungamili babili be kutanga ne balume babo. Ndizo ngwenu, butjilo gwangu ngagube tjakanaka mu mesho enyu.” 15 Ntumwa wa Yahwe kabe eti kuna Elija, “Deluka naye, usintje.” Ndizo Elija kamilika kadeluka kayenda naye kuna mambo, 16 ngono kati kuna mambo, “Tjinoleba Yahwe etji, ‘Apa ndikuti akuna Ndzimu mu Iziraela wamunga bhuzwa, kwamungadzina mukatuma batumwa kunobhuzwa kuna Bhaalezebubu ndzimu we Ekironi kene? Ngoti wathama ikoku, autowomuka mu bulawo gwa ulele muguli, nge malebeswa unowofa.’ ”
17 Ndizo Ahaziya wakafa kuyendidzana nge dama la Yahwe lakalebgwa ndi Elija. Ngono Jehoramu mwana wa tate babe kan'gala thaka kube mambo mu gole le bubili la Jehoramu nkololo wa Jehoshafati mambo we Juda, ngobe Ahaziya wakabe asina mwana we tjilisana.
18 Apa mimwe mishingo ya Ahaziya ne zwaakathama azwizokwagwa mu Lukwalo gwe zwiyitikalo gwa bomambo be Iziraela kene?