Ezekiele nlindi we Iziraela
(Ezekiele 3:16-21)1 Dama la Yahwe lakazha kundili liti, 2 “Nkololo we nthu lebeleka ne bathu babo ubadwe uti, ‘Ha ndizhisa thumo mu shango, ngono bathu be shango iyeyo bebe beshalula mmwe wabo bebe benthama nlindi wabo 3 ngono ebe ebona thumo laswika kuwobhayana ne shango ngono iye ebe elidza lunyanga kutjenjedza bathu, 4 ngono ipapo ha mmwe ebe ehwa lunyanga gulila ngono ebe asingatole thambo ngono thumo libe limbulaya, malopa awe anowobe mu maboko awe. 5 Se akahwa nsindo we lunyanga ngono kasitole thambo, malopa awe amu maboko awe. Ha akabe atola thambo ungabe akazwitjidza. 6 Koga nlindi ha angabona thumo laswika ngono kabe asingalidze lunyanga kutjenjedza bathu ngono thumo libe liswika libe libulaya mmwe wabo, ihwoyo nthu wafa unofila mu tjibi tjitje, koga malopa awe amu maboko e nlindi.’
7 “Ndizo wali nkololo we nthu, ndakuthama nlindi we bathu be Iziraela, uti uhwa dama langu utjenjedze bathu. 8 Ha nditi ku nthu mbiimbi, ‘Iwe nthu mbiimbi nge malebeswa unowofa,’ ngono iwe ube usingalebeleke kun'dusa mu mipanga iye, iwoyu nthu mbiimbi unofila zwibi zwizwe koga malopa awe ndoashaka mu maboko awo. 9 Koga ha unga tjenjedza nthu mbiimbi kusiya mipanga iye mibiibi koga ebe asingathame eijalo, unowofila mu zwibi zwizwe, koga iwe unowobe wazwitjidza.
Ndulamo ye Ndzimu ne ngoni dzawo
10 “Iwe nkololo we nthu idwa bathu be Iziraela uti, ‘Tjamunoleba etji, “Milandu yedu ne zwibi zwedu zotilemela, ngono zotishakadza. Ngono tingatjila tjini wali?” 11 Ubadwe uti, “Se nditjila, koleba She Yahwe, akuna tjinondishathisa mu lufu gwe mbiimbi koga ndoshathisiwa nge kuti babi ngabashanduke mu zila dzabo batjile. Shandukani, shandukani mudwe mu zila dzenyu mbiimbi, apa mungafa mufilani wali bathu be Iziraela?” 12 Ndizo wali iwe nkololo we nthu, idwa bathu babo uti, “Ndulamo ye wakalulwama ayingantjidze ha asingahwe ne bubiibi gwe mbiimbi agungathame kuti awe ha eshanduka edwa mu guli. Nthu wakalulwama ha etjinya aatotjila etjidziwa nge ndulamo yaakatongo be nayo.” 13 Ha ndidwa nthu wakalulwama nditi unowotjila, koga iye ebe egalabgwe mu ndulamo iye ebe ethama tjakabipa, akuna tjimwe tje zwakalulwama zwaakatongo thama zwingakumbugwa, unowofa efila tjibiibi tjaathama. 14 Kakale ha ndingadwa nthu mbiimbi nditi, “Iwe unowofa,” koga ipapo iye ebe shanduka esiya zwibi zwizwe ebe ethama tjakalulwama tjakatambunuka, 15 ha ebgwiliza tjaakabe atola tjilimilile tjaakaadzima, ebe ebgwiliza tjaakatolela, ebe etobela milayo inopa butjilo, ebe asingashinge tjibiibi, nge malebeswa unowotjila aangafe. 16 Akuna tjimwe tje zwibi zwaakathama tjinowokumbugwa nge kukwe. Iye wathama tjakalulwama, tjakatambunuka ngono unowotjila.
17 “Nenguba kwakajalo bathu babo banoti, ‘Zila ya Yahwe aizolulwama.’ Koga i zila yabo isakalulwama. 18 Ha nthu wakalulwama esiya ndulamo iye ebe ethama tjibi unowotjifila. 19 Nthu mbiimbi naiyebo ha esiya bubi gugwe ebe ethama tjakatambunuka, tjakalulwama unowotjidziwa ngo thama saikoko. 20 Koga imwi moti, ‘Zila ya She aizolulwama.’ Imwi bathu be Iziraela, ndowomusumikilisa, mmwe ne mmwe kuyendidzana nge zila iye.”
Kuwa kwe Jerusalema
21 Mu gole le bugumi lina makole mabili takatapiwa mu mwedzi we bugumi mu zhuba le bushanu le mwedzi, nthu mmwe wakabe atizha kasiya kudwa ku Jerusalema kazha kundili kandidwa kati, “Nzi nkulu wawa.” 22 Tjiazha tja Yahwe tjakabe tjili pezhugwi kwangu madekwana ntizhi asathu kaswika, ngono bakazhula nlomo wangu nlume we ntizhi asathu kazha kundili mangwanana. Ndizo nlomo wangu wakabe wazhuka ndizo ndakabe ndisitji nyelele.
Bakasala mu Juda
23 Dama la Yahwe likazha kundili liti, 24 “Nkololo we nthu, bathu banogala mu matongo iyawaje mu shango ye Iziraela banoti, ‘Abhurahama wakabe ali nthu nng'ompela koga ngono kapiwa shango. Koga iswi tibanjinji, nge malebeswa shango yakapiwa iswi kube yedu.’ 25 Ndizo wali ubadwe uti She Yahwe bakati, ‘Se muja nyama malopa atjimuili ngono mube mulinga ku midzimu yenyu ye zwifano mube mutebula malopa, apa mobona kwakamulingisana kuti shango ibe yenyu kene? 26 Mogalabgwe mu mathumo enyu, mothama zwithu zwinoshimisa, mmwe ne mmwe wenyu unotemapadza nkadzi we mbakisani naye. Apa ngono shango ingabe yenyu kene?’ 27 Ubadwe uti Yahwe banolebeleka bakati, ‘Se nditjila, nge malebeswa ibabo bakasala mu matongo banowobulawa nge thumo, naibabo bamu shango ndowobapa zwibandana zwikabaja, bamu mbako dze matizhilo akasima ne mu makuhwu banofa nge bugwele. 28 Shango ndowoithama dukuthuku ne shakadzwa, bakasima bayo banozwida banoloba ne matombo e Iziraela anowothukudzika kunowoti kukasibe ne ungaipalama. 29 Ipapo banowoziba kuti ndimi Yahwe ha ndathama shango dukuthuku ne shakadzwa ngono kuyikhwa nge zwinoshimisa zwabakathama.
30 “Koga nge kuko nkololo we nthu, bathu be shango yenyu banolebeleka nge kuko bali pa makuma ne pa mikoba ye ng'umba bedwana beti, ‘Izhani muhwe ndayidzo inodwa kuna Yahwe.’ 31 Banozha ku kuli se bathu bangu, bebe begala pasi mbeli kuko behwilila matama awo koga abangashinge tjaanoleba. Banoleba nge milomo yabo koga mimoyo yabo izhele bugovu gwe kuzwiwanila mbuyilo. 32 Kubali iwe unonga mmbi unomba njimbo dze ludo, una hwi lakanaka elidza tjilidzo nge bunyambi. Banohwa tjaunoleba, koga abangatjishinge. 33 Ngono ikoku kowoti kube malebeswa kushingikala, ngoti iko kowoshingikala, ipapo banowoziba kuti nlebesambeli wakabepo pakati kwabo.”
Ezekiele nlindi we Iziraela
(Ezekiele 3:16-21)1 Dama la Yahwe lakazha kundili liti, 2 “Nkololo we nthu lebeleka ne bathu babo ubadwe uti, ‘Ha ndizhisa thumo mu shango, ngono bathu be shango iyeyo bebe beshalula mmwe wabo bebe benthama nlindi wabo 3 ngono ebe ebona thumo laswika kuwobhayana ne shango ngono iye ebe elidza lunyanga kutjenjedza bathu, 4 ngono ipapo ha mmwe ebe ehwa lunyanga gulila ngono ebe asingatole thambo ngono thumo libe limbulaya, malopa awe anowobe mu maboko awe. 5 Se akahwa nsindo we lunyanga ngono kasitole thambo, malopa awe amu maboko awe. Ha akabe atola thambo ungabe akazwitjidza. 6 Koga nlindi ha angabona thumo laswika ngono kabe asingalidze lunyanga kutjenjedza bathu ngono thumo libe liswika libe libulaya mmwe wabo, ihwoyo nthu wafa unofila mu tjibi tjitje, koga malopa awe amu maboko e nlindi.’
7 “Ndizo wali nkololo we nthu, ndakuthama nlindi we bathu be Iziraela, uti uhwa dama langu utjenjedze bathu. 8 Ha nditi ku nthu mbiimbi, ‘Iwe nthu mbiimbi nge malebeswa unowofa,’ ngono iwe ube usingalebeleke kun'dusa mu mipanga iye, iwoyu nthu mbiimbi unofila zwibi zwizwe koga malopa awe ndoashaka mu maboko awo. 9 Koga ha unga tjenjedza nthu mbiimbi kusiya mipanga iye mibiibi koga ebe asingathame eijalo, unowofila mu zwibi zwizwe, koga iwe unowobe wazwitjidza.
Ndulamo ye Ndzimu ne ngoni dzawo
10 “Iwe nkololo we nthu idwa bathu be Iziraela uti, ‘Tjamunoleba etji, “Milandu yedu ne zwibi zwedu zotilemela, ngono zotishakadza. Ngono tingatjila tjini wali?” 11 Ubadwe uti, “Se nditjila, koleba She Yahwe, akuna tjinondishathisa mu lufu gwe mbiimbi koga ndoshathisiwa nge kuti babi ngabashanduke mu zila dzabo batjile. Shandukani, shandukani mudwe mu zila dzenyu mbiimbi, apa mungafa mufilani wali bathu be Iziraela?” 12 Ndizo wali iwe nkololo we nthu, idwa bathu babo uti, “Ndulamo ye wakalulwama ayingantjidze ha asingahwe ne bubiibi gwe mbiimbi agungathame kuti awe ha eshanduka edwa mu guli. Nthu wakalulwama ha etjinya aatotjila etjidziwa nge ndulamo yaakatongo be nayo.” 13 Ha ndidwa nthu wakalulwama nditi unowotjila, koga iye ebe egalabgwe mu ndulamo iye ebe ethama tjakabipa, akuna tjimwe tje zwakalulwama zwaakatongo thama zwingakumbugwa, unowofa efila tjibiibi tjaathama. 14 Kakale ha ndingadwa nthu mbiimbi nditi, “Iwe unowofa,” koga ipapo iye ebe shanduka esiya zwibi zwizwe ebe ethama tjakalulwama tjakatambunuka, 15 ha ebgwiliza tjaakabe atola tjilimilile tjaakaadzima, ebe ebgwiliza tjaakatolela, ebe etobela milayo inopa butjilo, ebe asingashinge tjibiibi, nge malebeswa unowotjila aangafe. 16 Akuna tjimwe tje zwibi zwaakathama tjinowokumbugwa nge kukwe. Iye wathama tjakalulwama, tjakatambunuka ngono unowotjila.
17 “Nenguba kwakajalo bathu babo banoti, ‘Zila ya Yahwe aizolulwama.’ Koga i zila yabo isakalulwama. 18 Ha nthu wakalulwama esiya ndulamo iye ebe ethama tjibi unowotjifila. 19 Nthu mbiimbi naiyebo ha esiya bubi gugwe ebe ethama tjakatambunuka, tjakalulwama unowotjidziwa ngo thama saikoko. 20 Koga imwi moti, ‘Zila ya She aizolulwama.’ Imwi bathu be Iziraela, ndowomusumikilisa, mmwe ne mmwe kuyendidzana nge zila iye.”
Kuwa kwe Jerusalema
21 Mu gole le bugumi lina makole mabili takatapiwa mu mwedzi we bugumi mu zhuba le bushanu le mwedzi, nthu mmwe wakabe atizha kasiya kudwa ku Jerusalema kazha kundili kandidwa kati, “Nzi nkulu wawa.” 22 Tjiazha tja Yahwe tjakabe tjili pezhugwi kwangu madekwana ntizhi asathu kaswika, ngono bakazhula nlomo wangu nlume we ntizhi asathu kazha kundili mangwanana. Ndizo nlomo wangu wakabe wazhuka ndizo ndakabe ndisitji nyelele.
Bakasala mu Juda
23 Dama la Yahwe likazha kundili liti, 24 “Nkololo we nthu, bathu banogala mu matongo iyawaje mu shango ye Iziraela banoti, ‘Abhurahama wakabe ali nthu nng'ompela koga ngono kapiwa shango. Koga iswi tibanjinji, nge malebeswa shango yakapiwa iswi kube yedu.’ 25 Ndizo wali ubadwe uti She Yahwe bakati, ‘Se muja nyama malopa atjimuili ngono mube mulinga ku midzimu yenyu ye zwifano mube mutebula malopa, apa mobona kwakamulingisana kuti shango ibe yenyu kene? 26 Mogalabgwe mu mathumo enyu, mothama zwithu zwinoshimisa, mmwe ne mmwe wenyu unotemapadza nkadzi we mbakisani naye. Apa ngono shango ingabe yenyu kene?’ 27 Ubadwe uti Yahwe banolebeleka bakati, ‘Se nditjila, nge malebeswa ibabo bakasala mu matongo banowobulawa nge thumo, naibabo bamu shango ndowobapa zwibandana zwikabaja, bamu mbako dze matizhilo akasima ne mu makuhwu banofa nge bugwele. 28 Shango ndowoithama dukuthuku ne shakadzwa, bakasima bayo banozwida banoloba ne matombo e Iziraela anowothukudzika kunowoti kukasibe ne ungaipalama. 29 Ipapo banowoziba kuti ndimi Yahwe ha ndathama shango dukuthuku ne shakadzwa ngono kuyikhwa nge zwinoshimisa zwabakathama.
30 “Koga nge kuko nkololo we nthu, bathu be shango yenyu banolebeleka nge kuko bali pa makuma ne pa mikoba ye ng'umba bedwana beti, ‘Izhani muhwe ndayidzo inodwa kuna Yahwe.’ 31 Banozha ku kuli se bathu bangu, bebe begala pasi mbeli kuko behwilila matama awo koga abangashinge tjaanoleba. Banoleba nge milomo yabo koga mimoyo yabo izhele bugovu gwe kuzwiwanila mbuyilo. 32 Kubali iwe unonga mmbi unomba njimbo dze ludo, una hwi lakanaka elidza tjilidzo nge bunyambi. Banohwa tjaunoleba, koga abangatjishinge. 33 Ngono ikoku kowoti kube malebeswa kushingikala, ngoti iko kowoshingikala, ipapo banowoziba kuti nlebesambeli wakabepo pakati kwabo.”