Balebesambeli banosola kutjinya kwe bathu
1 Bonani, luboko gwa Yahwe ate guli lufutshwanana
kwagusingake gukatjidza,
kene zebe yabo aizoti tshi kwaisingake ikahwa.
2 Koga matjinyo enyu ndiwo akamuthubukanya
ne Ndzimu wenyu,
zwibi zwenyu zwakasumbika buso gwawo
zwithama kuti musitongohwa.
3 Ngoti maboko enyu akatemapadziwa nge malopa,
zwinyala zwenyu zwakatemapadziwa nge tjibi.
Milomo yenyu yakaleba manyepkhwa,
ndimi dzenyu dzakaleba mbipo.
4 Akuna unoshaka kutambunuka mu lubazhe,
akuna unoleba nge malebeswa.
Banogalabgwe mu kunyanyayidzana kusingabuze tjimwe beleba manyepkhwa,
banozwisenga mazwiibhato mabiibi bebe betshibama zwibi.
5 Banophophonya mabumbulu e ipakupaku
bebe beluka ludandi gwe tjibubi.
Iye waja mabumbulu abo unofa,
bumbulu limwe alingapkhwanyika, kobhuda thumbi mulili.
6 Madandi abo aangashingisiwe se zwiambalo,
abangazwifukidze nge zwabanothama.
Mishingo yabo mishingo yakabipa,
phipiti nshingo we maboko abo.
7 Makumbo abo anolabukila kunotjinya,
banolabukila kunotebula malopa asina nlandu,
mikumbulo yabo mikumbulo ye bubi,
kutjinya ne golomodzo zwimu zila dzabo.
8 Zila inoyenda ku mbakiso abatoiziba,
akuna tjakatambunuka mu zila dzabo.
Zila dzabo dzakakombama,
akuna unoyenda mudzili unoziba mbakiso.
9 Ndizo wali kutambunuka kukule naswi,
ndulamo iyo aitoswika patilipo,
tomilila tjedza, koga kose izhalima,
toshaka lupenyo, koga toyenda mu lima.
10 Toyenda nge guma tiambamba se bhofu,
tiambamba saibabo basina mesho,
tokuthiwa kuli masikati makulu kukanga busikwana,
pakati kwe bakasima tonga bafi.
11 Tose koga tobomba se bhira
tolila nge tjililo se njiba.
Tomilila kutambunuka, koga akutobepo,
tolindila kusununguka, koga kukulekule.
12 Ngekuti matjinyo edu manjinji mu mesho enyu,
zwibi zwedu zotendeka nge kwedu,
ngoti matjinyo edu anaswi,
ngono toduma matjinyo edu,
13 takatjuluka nlayo tibuya tizwilandula Yahwe,
tifupatila Ndzimu wedu, tilebeleka ngekwe kutshambilidza nenge bupanduki,
tibumba manyepkhwa
tibe tialeba kudwa mu moyo.
14 Kutambunuka kwakashandusiwa,
ndulamo iyo ikamila kule,
malebeswa iwo kakuthiwa mu zila,
kugagwabgwe kukasitongo ngina.
15 Malebeswa aapo,
ngono iye unoshandukila bubi unowila mu mbatsha.
Ikoku Yahwe bakakubona,
ngono kukasibashathise ngoti kusina kutambunuka.
16 Bakabona kusina ne nng'ompela,
kukabatjenamisa kuti akuna ne nng'ompela ungabhatsha,
ndizo bakatjidza nge simba labo,
ne ndulamo yabo ikabasimisa.
17 Banoambala ndulamo se tjiambalo tje ifuba,
bebe beambala hwutshe inobakilila nsholo ye jidzo mu nsholo wabo,
banombala zwiambalo zwe kubgwilizila,
bakazwipomba nge kulonga meya muna tjabanoshinga se bazwipomba nge hazu.
18 Banowopa bathu mbhayilo wakalingisana ne tjabakathama,
ndiko se kwabanowobabuzila,
zwita zwabo zowoamutjila bushongola,
zwilalume zwabo zowoamutjila shamu ye kubgwilizila,
banowobuzila shango dzimu tjekelo dze gungwa nge tjakabalingisana.
19 Ndizo ibabo baku golombedzo banowotja zina la Yahwe,
ne baku bhezhuba banowoteta gudzo labo.
Ngoti banowozha se gwizi gunotuta makuni
gunotutudziwa nge phepo ya Yahwe.
20 “Banowozha ku Ziyoni bali Ndzutunuli,
kuna ibabo bamuna Jakubo banoshandukila zwibi zwabo.”
Koleba Yahwe.
21 Yahwe bakati, “Imi nge kwangu, itjetji nditjo tjidumano tjangu nabo, Meya yangu iyeyi imumuli ne matama angu andakalonga mu milomo yenyu aangapele mu milomo yenyu kene mu milomo ye bana benyu, kene mu milomo ye bana be bana babo kudwa ngwenu kuyenda kusingapele.” Koleba Yahwe.
Balebesambeli banosola kutjinya kwe bathu
1 Bonani, luboko gwa Yahwe ate guli lufutshwanana
kwagusingake gukatjidza,
kene zebe yabo aizoti tshi kwaisingake ikahwa.
2 Koga matjinyo enyu ndiwo akamuthubukanya
ne Ndzimu wenyu,
zwibi zwenyu zwakasumbika buso gwawo
zwithama kuti musitongohwa.
3 Ngoti maboko enyu akatemapadziwa nge malopa,
zwinyala zwenyu zwakatemapadziwa nge tjibi.
Milomo yenyu yakaleba manyepkhwa,
ndimi dzenyu dzakaleba mbipo.
4 Akuna unoshaka kutambunuka mu lubazhe,
akuna unoleba nge malebeswa.
Banogalabgwe mu kunyanyayidzana kusingabuze tjimwe beleba manyepkhwa,
banozwisenga mazwiibhato mabiibi bebe betshibama zwibi.
5 Banophophonya mabumbulu e ipakupaku
bebe beluka ludandi gwe tjibubi.
Iye waja mabumbulu abo unofa,
bumbulu limwe alingapkhwanyika, kobhuda thumbi mulili.
6 Madandi abo aangashingisiwe se zwiambalo,
abangazwifukidze nge zwabanothama.
Mishingo yabo mishingo yakabipa,
phipiti nshingo we maboko abo.
7 Makumbo abo anolabukila kunotjinya,
banolabukila kunotebula malopa asina nlandu,
mikumbulo yabo mikumbulo ye bubi,
kutjinya ne golomodzo zwimu zila dzabo.
8 Zila inoyenda ku mbakiso abatoiziba,
akuna tjakatambunuka mu zila dzabo.
Zila dzabo dzakakombama,
akuna unoyenda mudzili unoziba mbakiso.
9 Ndizo wali kutambunuka kukule naswi,
ndulamo iyo aitoswika patilipo,
tomilila tjedza, koga kose izhalima,
toshaka lupenyo, koga toyenda mu lima.
10 Toyenda nge guma tiambamba se bhofu,
tiambamba saibabo basina mesho,
tokuthiwa kuli masikati makulu kukanga busikwana,
pakati kwe bakasima tonga bafi.
11 Tose koga tobomba se bhira
tolila nge tjililo se njiba.
Tomilila kutambunuka, koga akutobepo,
tolindila kusununguka, koga kukulekule.
12 Ngekuti matjinyo edu manjinji mu mesho enyu,
zwibi zwedu zotendeka nge kwedu,
ngoti matjinyo edu anaswi,
ngono toduma matjinyo edu,
13 takatjuluka nlayo tibuya tizwilandula Yahwe,
tifupatila Ndzimu wedu, tilebeleka ngekwe kutshambilidza nenge bupanduki,
tibumba manyepkhwa
tibe tialeba kudwa mu moyo.
14 Kutambunuka kwakashandusiwa,
ndulamo iyo ikamila kule,
malebeswa iwo kakuthiwa mu zila,
kugagwabgwe kukasitongo ngina.
15 Malebeswa aapo,
ngono iye unoshandukila bubi unowila mu mbatsha.
Ikoku Yahwe bakakubona,
ngono kukasibashathise ngoti kusina kutambunuka.
16 Bakabona kusina ne nng'ompela,
kukabatjenamisa kuti akuna ne nng'ompela ungabhatsha,
ndizo bakatjidza nge simba labo,
ne ndulamo yabo ikabasimisa.
17 Banoambala ndulamo se tjiambalo tje ifuba,
bebe beambala hwutshe inobakilila nsholo ye jidzo mu nsholo wabo,
banombala zwiambalo zwe kubgwilizila,
bakazwipomba nge kulonga meya muna tjabanoshinga se bazwipomba nge hazu.
18 Banowopa bathu mbhayilo wakalingisana ne tjabakathama,
ndiko se kwabanowobabuzila,
zwita zwabo zowoamutjila bushongola,
zwilalume zwabo zowoamutjila shamu ye kubgwilizila,
banowobuzila shango dzimu tjekelo dze gungwa nge tjakabalingisana.
19 Ndizo ibabo baku golombedzo banowotja zina la Yahwe,
ne baku bhezhuba banowoteta gudzo labo.
Ngoti banowozha se gwizi gunotuta makuni
gunotutudziwa nge phepo ya Yahwe.
20 “Banowozha ku Ziyoni bali Ndzutunuli,
kuna ibabo bamuna Jakubo banoshandukila zwibi zwabo.”
Koleba Yahwe.
21 Yahwe bakati, “Imi nge kwangu, itjetji nditjo tjidumano tjangu nabo, Meya yangu iyeyi imumuli ne matama angu andakalonga mu milomo yenyu aangapele mu milomo yenyu kene mu milomo ye bana benyu, kene mu milomo ye bana be bana babo kudwa ngwenu kuyenda kusingapele.” Koleba Yahwe.