1 Zwiyitikalo 11 - Kalanga Bible (KBTP)

Dafite unobe mambo we Iziraela ne Juda

1 Baiziraela bose bakanokubungana kuna Dafite ku Heburoni ngono bakandwa beti, “Bona, ti bathu bang'ompela ne lopa ling'ompela. 2 Na ntolo kose Saulo atji mambo, ndiwe wakabe wakatungamila Baiziraela abeyenda ku ngwa na Yahwe Ndzimu uwo wakakudwa ukati, ‘Unowobe nlisi we bathu bangu Baiziraela kakale unowobe mbusi we bathu bangu Baiziraela.’ ” 3 Ndizo batungamili bose bakanokubungana kuna Dafite ku Heburoni, ngono Dafite kathama Tjidumano nabo mbeli kwa Yahwe ndizo bakazhodza Dafite kuti abe mambo mu Iziraela, kuyendidzana ne dama la Yahwe sekwa lakalebgwa ndi Samuele.

4 Dafite ne Baiziraela bose bakayenda bakanonginilila Jerusalema, nge tjibaka itjetjo yakabe idang'wa Jebusi ne Bajebusi ndibo bakabe bali bagali bako. 5 Bajebusi bakadwa Dafite bakati, “Aungafe wangina ipapa!” Ne kwakajalo, Dafite wakangina katola matizhilo e Ziyoni ngono kazibgwa ali nzi nkulu wa Dafite. 6 Ngono Dafite wakalebeleka kati, “Nthu we kutanga ebulaya Njebusi unowobe nlauli we babhayani.” Ipapo Joabu nkololo wa Zeruya kabe iye we kutanga kunobanginilila ndizo kabe iye nlauli we babhayani. 7 Dafite kagala mu matizhilo ndizo kadang'wa nzi nkulu wa Dafite. 8 Dafite kabamba nzi nkulu kupoteleka matizhilo kudwa pa duluthulo kunoti ku guma lakapoteleka, Joabu iye kapedzisa nzi nkulu wose. 9 Dafite kabe nkulu kwazo ngobe Yahwe Masimbawose bakabe ba naye.

Babhayani be ngwa ba Dafite

(2 Samuele 23:8-39)

10 Aba ndibo balume bakasima be batungamili ba Dafite, ibo bakabe babhatshi babe bakulu mu mbuso uwe kose ne mu Baiziraela ku nthama kuti abe Mambo Yahwe sekwa bakagadzabgwe ngekwe Baiziraela. 11 Nlongolongo we balume ba Dafite bakasima: Jashobimu we ludzi gwa Hakimoni ntungamili we batatu wakagwa ne balume bali mazana matatu (300) eshingisa thumo lile ngono kababulaya bose tjibaka tjing'ompela. 12 Kudwapo kwakabe kutobela Eleazari nkololo wa Dodo we ludzi gwa Ahohi. 13 Ndiye wakabe ana Dafite ku Pasidamimi tjibaka tjakati Bafilisitiya bakakubunganako kugwa. Kwakabe kuna nnda we mathunde e bhali koga bathu bakatizha Bafilisitiya ko. 14 Koga bakama zubuyanana pakati kwe nnda ngono bakaugwila, bakabulaya Bafilisitiya ngono Yahwe bakabatjidza nge kunda kukulu. 15 Batungamili batatu be ngwa be bali makumi ali matatu (30) bakayenda ku shongwe kuna Dafite ku guwu le Adulamu, ha Bafilisitiya batjikotoka mu nkuku we Refaimu. 16 Dafite wakabe ali ku matizhilo ngono gupo le babhayani be Bafilisitiya mu tjibaka itjetjo lakabe lili ku Bhetelehema. 17 Dafite kazwihwa eshaka vula kwazo ngono kazwibhuzwa kati, “Ndiani ungandipa vula ye tshime le Bhetelehema lipa nkoba kuti nding'we!” 18 Ngono batungamili batatu bakathukila mu bukotokelo gwe Bafilisitiya bakatjela vula mu tshime le Bhetelehema lipa nkoba ngono bakanopa Dafite. Koga Dafite kalamba ku ing'wa, ka itebula mbeli kwa Yahwe ngono kabe eti, 19 “Ngakube kutjena nami Ndzimu wangu kuti ndingathama itjetji. Andingang'we malopa e balume ibaba ngobe bakalonga matjilo abo mu mbatsha nge kubuya ne vula iyeyi.” Ndizo Dafite kasing'we vula iyeyo. Batungamili batatu bakathama saikoko. 20 Ngono Abishayi nnung'una wa Joabu wakabe ali ntungamili we batatu be bali makumi matatu (30), wakamilidza thumo lile katemelela balume bali mazana ali matatu (300) kababulaya kabe ne tjilumbi se ntungamili we batatu. 21 Muna bali batatu wakabe etetiwa kwazo pa bamwe babili, ngono kabe nlauli wabo koga kasilizane ne batatu. 22 Bhenaya nkololo wa Jehoyada wakabe ali nyambi ali nlume we mishingo inotjenamisa edwa ku Kabuzele, wakabulaya babhayani babili bakasima be Moabu. Wakadelukila kanobulaya shumba yakabe ili mu gomba mu zhuba lakabe lawa kapuku. 23 Wakatemelela N'egipiti wakabe akakulila pezhugwi kunga bhata maboko mabili. Nenguba N'egipiti akabe akabhata thumo linonga bhangwana wakalidzamula mu luboko gugwe kambulaya nalo. 24 Izwezwi ndizo zwakathamwa ndi Bhenaya nkololo wa Jehoyada, ngono naiye kazwithamila tjibombo se batungamili batatu. 25 Wakabe etetiwa kwazo pa bamwe bakabe bali makumi matatu ngono kasilizane ne batatu bekutanga. Dafite kambiga ntjengeti we batjengeti babe.

26 Babhayani bamwe bakasima be ngwa bakabe bali bo: Asahele nnung'una wa Joabu na Elihanani nkololo wa Dodo kudwa ku Bhetelehema 27 na Shamoti kudwa ku Harori na Helezi kudwa ku Peleti na 28 Ira nkololo wa Ikeshi kudwa ku Tekowa na Abiezera kudwa ku Anatoti 29 na Sibhekayi kudwa ku Hushahi na Ilai kudwa ku Ahohi 30 na Maharayi kudwa ku Netofa na Heledi nkololo wa Bhaana kudwa ku Netofa 31 na Ithayi nkololo wa Ribayi kudwa ku Gibiya mu Bhenjamini Bhenaya kudwa ku Pirathoni 32 na Hurayi kudwa ku mikuku ipejo ne Gaashi na Abiele kudwa ku Araba 33 na Azimaveti kudwa ku Bhahurumu na Eliabha kudwa ku Shalibhoni 34 na Hashemu kudwa ku Gizoni na Jonatani nkololo wa Shaji kudwa ku Harari 35 na Ahiamu nkololo wa Sakari kudwa ku Harari na Elifali nkololo wa Uri 36 na Heferi kudwa ku Mekhera na Ahija kudwa ku Peloni na 37 Heziro kudwa ku Karimeli na Nari nkololo wa Ezibayi 38 na Jowele nnung'una wa Nathani na Mibhari nkololo wa Hagiri 39 na Zeleki kudwa ku Amoni na Naharayi we Bheroti, mbhati we tjivikili tja Joabu nkololo wa Zeruya 40 na Ira kudwa ku Itiri na Garebu kudwa ku Itiri 41 na Uriya we N'hiti na Zabadi nkololo wa Ahalayi na 42 Adina nkololo wa Shiza wakabe ali ntungamili mu ludzi gwa Rubheni, iye ne gupo lile bakabe bali makumi matatu. 43 Hanani nkololo wa Maka na Joshafati kudwa ku Mithani 44 na Uziya kudwa ku Ashitera na Shama na Jeyele bakololo ba Hothamu kudwa ku Aroeri na 45 Jediale na Joha bakololo ba Shimiri kudwa ku Tizi 46 na Elieli kudwa ku Mahava Jeribayi na Joshaviya bakololo ba Elinamu na Ithima kudwa ku Moabu, 47 Elieli na Obhedi na Jasiele be Bamezoba.