Mazhuba e bupelo
1 Koga uhwisise woku, kowobe nge misi yakabangalala mu mazhuba e bupelo. 2 Ngobe bathu banowobe nge kuzwida ne kuda mari ne kuzwiloba ifuba ne kuzwikudza ne kutukana ne kusahwa bazwadzi babo ne kusatenda ne kusayengemala 3 ne kusabe nge ludo ne kusazwiibhatigwana ne kutjinya bamwe mazina ne kusazwiibhata ne kube ne bushongola ne kusada bubuya ne kube 4 mapitipiti ne kube matjapa ne kuzwibona ne kuda mizipo pana kuda Ndzimu, 5 belingika bana kunamata kunonga kwedu, koga belandula simba lako. Ibe kutjena ne bathu bakajalo. 6 Ngekuti mu bathu bakajalo kuna banongina mu mizi ngono bakatola bakadzi basakasima banolemegwa kale nge zwibi kakale banodengadengesiwa nge njemulo dzakasiyana siyana, 7 banodiyiwa misi yose koga basingatongo tubula kuziba malebeswa. 8 Koga sa Janesi na Jambhuresi bakanyanyayidza Mushe, balume ibaba banonyanyayidza malebeswa, bathu be mikumbulo yakabola, yakathama kuti kugalamoyo kwabo kwakaleleka kulambiwe. 9 Koga abatowonoti ngayi, sa ibabo balume babili, bulengwe gwabo gowodwila patjena ku mmwe ne mmwe.
Ndayo dze bupelo
10 Koga iwe wakalondolodza zwidiyo zwangu ne mazwiibhato angu ne mazwimisilo angu ne kugalamoyo kwangu ne bumoyonlefu gwangu ne ludo gwangu ne kudzikitadza kwangu 11 ne kuhwisiwa zogwadza kwangu ne kudziyidzika kwangu, zwithu zwakandishingikalila ku Antiyoki ne ku Ikoniyo ne ku Lisitira ne kuhwisiwa zogwadza kwangu kwandakasimisilamoyo. Koga She bakandiangulila mukuli kose. 12 Dumbu nge lebeswa bose banoyemula kutjila butjilo gwe kunamata muna Kirisiti Jesu banowohwisiwa zogwadza 13 koga bathu babi ne batjebeli banowopandukila mbeli mu kutjebela na ibo betjebegwabo. 14 Koga iwe dwilila muna tjawakazwidiya ne tjaunogalamoyo mutjili wakasimisila, ukumbula wakakudiya, 15 ne sekwa wakaziba hwalo dzakayengemala utji ntjetjana, idzo dzinotubula kukudiya ngekwe jidzo nge kugalamoyo muna Kirisiti Jesu. 16 Hwalo dze Ndzimu dzose dzakayengemala dzakafemegwa nge Ndzimu ngono dzakalulwamila kudiya, kutjemela, kululwamisa nenge kudiya kutjilila mu ndulamo, 17 kuti ndizo nthu we Ndzimu abe wakapelela, akazwilulwamisila nshingo mmwe ne mmwe wakanaka.
© Kalanga Bible © Bible Society of Botswana, 2008, 2018.