Yahwe banoloba Edomu
1 Mbono ya Obhadiya. Etji nditjo tjinolebgwa ndi She Yahwe ngekwa Edomu.
Takahwa ndayidzo inodwa kuna Yahwe,
ntumwa wakatumwa ku zwitjaba kuti abadwe ati,
“Milikani! Milikani tinobhayana naye.”
2 “Bona Edomu, ndowokuthama ntukununu mu zwitjaba,
ngono unowolengudzika kwazo.
3 Kuzwikudza kwe moyo uwo kwakakutjebela,
iwe unogala mu phaswa dze shongwe,
una magalo apezhugwi.
Unozwidwa mu moyo uwo uti,
‘Ndiani ungandidelusila pasi kene?’
4 Nenguba uwulukila pezhugwi se dzu,
nenguba shaka lilo lakabakwa pakati kwe nyenyedzi,
ndowokudelusila pasi kudwa ikoko.”
Koleba Yahwe.
5 “Ha mbava dzingakuzhila,
ha batoleli bangakuzhila busiku,
apa abangakwibe bakamisa pabada kene?
Ha batjeli be zhambi bangazha ku kuli,
apa abangasiye manungidzigwa kene?
6 Koga Esau, unowofunyungudziwa seni!
Fumwa iye yakasumbikala inowovumbunugwa.
7 Bose bashanganyili nawe, bakakutatila ku n'gathu.
Bathu bana mbakiso nawe banowokutjebela bakakukulila,
bakabe beja nawe mu ndilo bakakulukila gwanga,
koga aungazibe nge kwako.
8 “Apa mu zhuba ilelo, koleba Yahwe,
anditowolobesa batjenjedu mu Edomu,
ne kuhwisisa mu Dombo la Esau kene?
9 Babhayani babo banowopalukamoyo, Temani,
bathu bose mu Dombo la Esau banowobulawa.”
Tjakayita kuti Edomu alobgwe
10 Shoni dzowokukombola,
ngobe wakathamila nnung'una uwo Jakubo ngwa ye maboko,
ngono unowolobesiwa nge kusingapele.
11 Mu zhuba lawakamila kutjena,
zhuba bathu basingazibgwe bakantolela fumwa iye,
ngono bataya bakangina nge mikoba ye nzi uwe,
kakale bakakandila Jerusalema,
ngono nawebo wakabe unga mmwe wabo.
12 Koga ungabe usakapembelela nnung'una uwo
mu zhuba le kushaya phazha kukwe,
kakale ungabe usakashatha
mu zhuba le kulobesiwa kwe bathu be Juda,
ungabe usakazwikudza
mu zhuba le manikano dzabo.
13 Ungabe usakangina nge mikoba ye bathu bangu,
mu zhuba le manikano dzabo hwulu.
Kakale ungabe usakapembelela kuhwa zogwadza kwabo iwe,
mu zhuba le manikano dzabo hwulu.
Ungabe usakatapa thundu dzabo,
mu zhuba le manikano dzabo hwulu.
14 Ungabe usakama pa phalalano dze zila,
kubulaya batizhi.
Ungabe usakabgwiliza ibaba bakapudzumuka,
mu zhuba le manikano dzabo hwulu.
Ndzimu unosumikilisa njudzi
15 Ngoti zhuba la Yahwe labe pejo
mu zwitjaba zose.
Edomu, sekwa wakathama,
nawe unowothamwabo,
unowobgwilizigwa zwiyito zwizo.
16 Sekwa makang'wa
mu dombo langu lakayengemala,
zwitjaba zose zowodwilila zwing'wabo,
zowong'wa zwikakunika,
ngono zowosala zwinga zwisakatongobepo.
Kunda kwe Iziraela
17 “Koga mu Dombo le Ziyoni kowobe ne jidzo,
ngono lowoyengemala.
Ngono be nsha wa Jakubo banowotola zwabo, zwabakabe batolegwa.
18 Nsha wa Jakubo unowobe moto,
nsha wa Josefa unowobe nthuto,
nsha wa Esau unowobe mashanga,
banowobapisa, ngono banowolota,
akutowobe ne limbelimbe ne ling'ompela
linowosala mu nsha wa Esau.”
Ngoti kwakaleba Yahwe.
19 “Be burwa gwe Juda
banowotola Dombo la Esau.
Be shango ipasi kwe matombo yakakunguluka
banowotola shango ye Bafilisitiya,
banowotola shango ye Ifureimi ne ye Samariya.
Bhenjamini unowotola Giliyadi.
20 Batapiwa be Baiziraela,
banowotola shango ye Bakanana kunoti ku Zarefati,
ngono batapiwa be Jerusalema bamu Sefaradi
banowotola mizi ye burwa gwe Juda.
21 Bakatjidziwa banowomilika mu Dombo le Ziyoni,
kusumikilisa Dombo la Esau.
Ngono mbuso unowobe wa Yahwe.”
© Kalanga Bible © Bible Society of Botswana, 2008, 2018.