Jefutha ne Baifureimi
1 Bathu be Ifureimi bakadana balume babo be ngwa ngono bakatjulukila ku Zafoni ngono bakadwa Jefutha bakati, “Ini wayenda kunogwa ne Baamoni usatidana tikayenda nawe? Towokupisila mu ng'umba nge moto.” 2 Ngono Jefutha kabadwa kati, “Imi ne bathu bangu takabe mu ngwa hwulu kwazo ne Baamoni, ndakati ndimudana amuzondisunungula mu maboko abo. 3 Ndakati ndibona musingadibhatshe, ndikalonga butjilo gwangu mu mbatsha, ndikatjuluka kunogwa ne Baamoni, ngono Yahwe bakabalonga mu maboko angu. Ngono nasi ini mabuya kugwa nami?”
4 Ipapo Jefutha kakubunganya balume bose be Giliyadi kagwa ne Baifureimi. Bagiliyadi bakababulaya ngobe Baifureimi bakabe bati, “Imwi Bagiliyadi mu batizhi be Ifureimi ne Manase.” 5 Bagiliyadi bakatolela Baifureimi maambuko wose e Jorodani, ngono kwakabe kuti mmwe we batizhi be Ifureimi ezha eti, “Imani nditjuluke,” balume be Giliyadi banowobe bembhuzwa beti, “Apa u N'ifureimi kene?” Ha eti, “Aa,” 6 banowobe bendwa beti, uti, “Shibholeti.” Ngono apa eti, “Sibholeti,” ngoti e konegwa ngo dana zubanana, banombhata be mbulayila pa maambuko e Jorodani. Ngono kukabulawa Baifureimi bali zwiwulu zwili makumi manna ana zwibili (42 000) mu tjibaka itjetjo.
7 Jefutha wakabe ntungamili we Iziraela kwe makole ali tathatu. Jefutha we Giliyadi kafa, ngono kabiganyigwa mu nzi uwe mu Giliyadi.
Ibizani na Eloni na Abidoni
8 Shule kukwe, Ibizani we Bhetelehema katungamila Iziraela. 9 Wakabe ana bakololo bali makumi matatu (30) ne bakololokadzi bali makumi matatu (30). Kalobodza bakololokadzi babe kuzhe kwe ludzi gugwe, ngono bakololo babe bakalobola Baanadi bali makumi matatu (30) kube bakadzi kudwa ku ludzi gu kuzhe. Izibani wakatungamila Iziraela kwe makole ali tendeka. 10 Kudwapo Izibani kafa ngono kabiganyiwa mu Bhetelehema.
11 Shule kukwe, Eloni we N'zibuloni katungamila Iziraela kwe makole ali gumi (10). 12 Kudwapo Eloni kafa, ngono kabiganyiwa mu Aijaloni mu shango ye Zibuluni.
13 Shule kukwe, Abhidoni nkololo wa Hileli kudwa ku Piratoni katungamila Iziraela. 14 Wakabe ana bakololo bali makumi manna (40) ne zwizekugwana zwili makumi matatu (30), bakabe tatha madonki ali makumi ali tendeka (70). Wakatungamila Iziraela kwe makole ali zhanakadzi. 15 Kudwapo Abhidoni nkololo wa Hileli kafa, ngono kabiganyigwa ku Piratoni mu Ifureimi, mu shango ye matuthu ye Baamaleki.
© Kalanga Bible © Bible Society of Botswana, 2008, 2018.