Jeturo ekumba Mushe
1 Jeturo mpirisiti we Midiyana, nkalabgwa wa Mushe kahwa kose Ndzimu kwawakathamila Mushe ne bakanyi kwabo Baiziraela. Kahwa sekwa Yahwe bakadusa Baiziraela mu Egipiti. 2 Jeturo nkalabgwa wa Mushe wakabe aamutjila Ziphora nkadzi wa Mushe, paakabe abgwiliziwa kanyi kwabo, 3 ne bakololo babe babili. Mmwe wabo zina lile lakabe liyi Geshomu lidwa kuti, “Ndakabe nkumbi mu shango ye butaya.” 4 Zina le mmwe liyi Elieza, lidwa kuti, “Ndzimu wa tate bangu wakabe mbhatshi wangu, kakale wakandiangula mu thumo la Faro.” 5 Ngono Jeturo kazha ne bakololo ba Mushe ne nkadzi wa Mushe mu tjilambanyika Mushe paakabe athibelela pa Dombo le Ndzimu. 6 Jeturo wakabe alayilila kuna Mushe eti, “Imi nkalabgwa uwo Jeturo, ndaswika ku kuli ndina nkadzi uwo ne bakololo benyu babili.” 7 Mushe kabhuda kayenda kunoshanganidza nkalabgwa uwe, kathigama kabutjila, bakabhuzwana mamuko, bakabe bengina mu nshasha. 8 Ndizo Mushe kabudza nkalabgwa uwe kose Yahwe kwabakathama muna Faro ne Baegipiti ngekwe Baiziraela, kambudza mang'oni wose abakawilana nawo mu zila nenge sekwa bakagwigwa ndi Yahwe. 9 Ngono Jeturo kashatha kwazo eshathila kose kwakanaka kwakathamigwa Baiziraela ndi Yahwe, kubaangula mu maboko e Baegipiti. 10 Kalebeleka kakale eti, “Ngakukudziwe Yahwe, ibo bakamuangula mu maboko e Baegipiti ne mu luboko gwa Faro! 11 Ngwenu ndoziba kuti Yahwe bankulu pa midzimu yose, ngoti bakaangula Baiziraela mu maboko e Baegipiti pabakabe bebalengudza.” 12 Ngono Jeturo nkalabgwa wa Mushe kadusila Ndzimu tjibhayilo tjinopisiwa ne zwipo; Aroni kazha ne bakulu be Baiziraela kuwoja zojiwa ne nkalabgwa wa Mushe mbeli kwe Ndzimu.
Kushalugwa kwe basumikilisi
(Matama 1:9-18)13 Tjimuka Mushe kamukila kusumikilisa bathu, ngono bathu bakama bakakubunganila Mushe kudwa mangwanana kudzina zhuba lingina. 14 Nkalabgwa wa Mushe kati ebona kose Mushe kwaakabe ethamila bathu, kambhuzwa kati, “Apa ini ikoku kwaunothamila bathu kene? Ini ugala uli woga bathu bose bema bakakubunganila kudwa mangwanana kunoti madekwana?”
15 Mushe kadabila nkalabgwa uwe eti, “Hwuti bathu banozha kundili kuwobhuzwa ngekwe kuda kwe Ndzimu. 16 Ha basahwanana ngekwe tjimwe banozha kundili imi ndibe ndilinga pakati kwe nthu ne ikamu tjitje, ndibuya ndibazibisa ndaulo dze Ndzimu ne milayo yawo.”
17 Nkalabgwa wa Mushe kandwa kati, “Tjaunothama atjizolulwama. 18 Iwe ne bathu baunabo mowozwipaula, ngoti ikoku kokulemela kwazo, aungakutubule uli woga. 19 Tjindihwilila ngwenu, ndowokupa mano, Ndzimu ube nawe! Iwe unowomila bathu mbeli kwe Ndzimu ubuya uyisa ndebo dzabo ku Ndzimu 20 ne kubadiya ndaulo ne ndongoloso, ubalakidze zila yabakafanila tjila ndiyo ne zwabakafanila shinga. 21 Pezhugwi kwa ikoku, shalula balume banotubula pakati kwe bathu ibaba bose, bali balume banotja Ndzimu, begalikabgwe kakale bebenga tjizwimba nlomo. Balume ibaba ubathame batungamili be bathu, bamwe bali babusi be zwiwulu, bamwe be mazana, bamwe be makumi mashanu, bamwe bali babusi be makumi. 22 Ngabasumikilise bathu misi yose, koga ndebo dzinolema badzizhise ku kuli. Ndebo dzisingaleme badzipedzise ibo, kowokulelusila ngoti banowobe bakasengesana ntolo nawe. 23 Sekwa unolauligwa ne Ndzimu, nge zila yakajali, unowotubula dzikitadzila tjimo, bathu ibaba bose banoyenda ku mizi yabo bagutshika.” 24 Ndizo Mushe kateedza dama le nkalabgwa uwe, ngono kashinga kose kwabakaleba. 25 Mushe kashalula balume banotubula mu Baiziraela bose kabathama batungamili be bathu, bamwe bali babusi be zwiwulu, bamwe be mazana, bamwe be makumi mashanu ne be makumi. 26 Ngono bakasumikilisa bathu misi yose, koga ndebo dzinolema be dziyisa kuna Mushe, ndebo ndelundelu bedzipedzisa ibo. 27 Ndizo Mushe kawonekana ne nkalabgwa uwe kayenda, kabgwilila ku shango ya kanyi kwabo.
© Kalanga Bible © Bible Society of Botswana, 2008, 2018.