Langano le kubulaya Jesu
(Matewu 26:1-5Mako 14:1-2Johani 11:45-53)1 Nzano we Tjiwunga tjisina Mbidzo unodang'wa Nzano we Kupinda pezhugwi, wakabe watjibo pejo. 2 Bapirisiti bakulu ne badiyi be nlayo bakabe beshaka zila yabangabulaya Jesu ndiyo, ngono betja bathu.
Judasi eduma ewonga Jesu
(Matewu 26:14-16Mako 14:10-11)3 Ipapo Satani kangina muna Judasi, unodang'wa Isikariyoti, mmwe we bali gumi lina babili. 4 Ndizo Judasi kayenda ku bapirisiti bakulu ne balauli be balindi be Ng'umba ye Ndzimu, kalangana nabo sekwa angawongela Jesu ku bali. 5 Ngono bakashatha kwazo, ndizo bakaduma kumpa mari 6 ndizo Judasi kaduma, kashaka tjibaka tjakalingisana tje kuwonga Jesu pasina mbunga.
Jesu elulwamisila kuja zojiwa zwe Nzano we Kupinda pezhugwi
(Matewu 26:17-25Mako 14:12-21Johani 13:21-30)7 Zhuba le Tjiwunga tjisina Mbidzo, likazha lekuti pkhwizana ye Nzano we Kupinda pezhugwi ibulawe. 8 Ndizo Jesu katuma Pita na Johani eti, “Yendani munotilulwamisila zojiwa zwe Nzano we Kupinda pezhugwi, kuti ndizo tije.”
9 Bakambhuzwa beti, “Moshaka kuti timululwamisile izo ngayi?”
10 Kadabila eti, “Mowoti mungina mu nzi, mowoshangana ne nlume akasenga shabana ye vula. Muntobele kunoti mu ng'umba yaanowongina, 11 ngono muti ku mweni we ng'umba, ‘N'diyi kati ku kuli, ng'umba ye bezi ingayi, yandingajila zojiwa zwe nzano wekupinda pezhugwi ne badiyiwa bangu?’ 12 Unowomulakidza ng'umba hwulu hwulu ipezhugwi kwe imwe yakalongwa zwinogagwa. Mululwamise ikoku.”
13 Bakayenda, bakanowana zwithu zwili sekwa babudziwa ndi Jesu. Ndizo bakalulwamisila zojiwa zwe Nzano we Kupinda pezhugwi.
Tjilayilo tja She
(Matewu 26:26-30Mako 14:22-261 Bakorinta 11:23-25)14 Ngono kukati tjibaka tjaswika, Jesu ne batumwa babe bakagala pasi kuja, 15 Kabadwa kati, “Ndayemula kwazo kuja namwi tjilayilo tje Nzano we Kupinda pezhugwi ikoku ndisathu adziyila. 16 Ngobe ndomubudza nditi, anditjawotjija kakale kudzina tjatjinoleba tjishingakala mu bushe gwe Ndzimu.”
17 Kukati aamutjila bhepe le nkumbi we zhambi, kaboka eti, “Tolani ikoku mukobane. 18 Ndomubudza nditi, anditjawong'wa kakale nkumbi we zhambi, kudzina bushe gwe Ndzimu guzha.”
19 Katola tjiwunga kati aboka, katjipemula kabapa itjo eti, “Oyu mbili wangu unopigwa imwi. Itani ikoko, kundikumbula.” 20 Ngekwakajalo katola bhepe le nkumbi we zhambi shule kwe tjilayilo kati, “Bhepe ileli tjidumano tjitshwa tje malopa angu, anotebuligwa imwi.
21 “Koga bonani, iye unowondiwonga unoja nami mu ndilo. 22 Nkololo we Nthu unowofa sekwa kwakabigwa nge Ndzimu, koga yee mme wee! Wapalala iye nthu unon'wonga!”
23 Bakatangisa kubhuzwana tjekwabo kuti ndi upi wabo unowoshinga ikoku.
Kunyanyayidzana ngekwe bukulu
24 Ngono kwakabe ne kunyanyayidzana pakati kwabo, kuti ndiani wabo unowobe nkulu tjose. 25 Jesu kati ku bali, “Bomambo be zwitjaba banobusa bathu babo, ngono ibabo bana simba banodang'wa ‘Babhatshi be bathu.’ 26 Koga imwi amuzofanila kube sa ikoko. Nkulu tjose pakati kwenyu ngaange iye ntukunu tjose, ngono mbusi ngaange nlanda. 27 Nkulu ndiupi, ugele eja kene unopakula? Apa ate ugele eja kene? Koga imi ndi pakati kwenyu se mpakuli.
28 “Imwi ndimwi makama nami mu ndiko dzangu dzose. 29 Ndizo ndomupa bushe koga sa Tate bangu bakandipa bushe, 30 mowoja mukang'wa nami mu bushe gwangu, mukagala mu zwigalo zwe bushe musumikilisa njudzi dzili gumi lina mbili dze Iziraela.”
Jesu elebelambeli kuzwilandugwa kukwe ndi Pita
(Matewu 26:31-35Mako 14:27-31Johani 13:36-38)31 Jesu kati, “Simoni, Simoni, Satani wakumbila kube nawe kukuzhunga se mathunde. 32 Koga ndakutembezelela Simoni kuti kugalamoyo kuko kusipele. Uti washanduka usimise zwikamu zwizo.”
33 Koga kadabila kati, “She, ndakazwimisila kuyenda namwi ku ng'umba ye busungwa ne ku lufu dumbu.”
34 Jesu kashandula eti, “Ndokubudza Pita, nditi, gukurume lowoti lisathu likalila nasi ukabe wandizwilandula katatu.”
Ikwama ne gobhodo ne bukanu
35 Ipapo Jesu kababhuzwa kati, “Apa ndakati ndimutuma musina ikwama tje mari kene gobhodo kene khwebana, mukasheta tjimwe kene?”
Bakashandula beti, “Akuna tjatakasheta.”
36 Kati ku bali, “koga ngwenu iye una ikwama tje mari, ngaatjitole, kose ne gobhodo, koga iye usina bukanu, atengese hazu iye agutenge. 37 Ngobe ndomubudza nditi tjakakwagwa kuyi, ‘wakabaligwa pa nng'ompela ne batjinyi’ tjakafanila kuti tji shingikadziwe mundili, ndizoke tjakakwagwa nge kwangu tjoshingikala.”
38 Badiyiwa bakati, “Bonani She, awa makanu mabili.”
Kadabila eti, “Kwalizana.”
Jesu unotembezela mu Dombo le Mitoba
(Matewu 26:36-46Mako 14:32-42)39 Jesu kabhuda mu nzi nkulu, kayenda ku Dombo le Mitoba se mazhuba wose, badiyiwa babe bakantobela. 40 Ngono kati eswika pathu ipapo kati ku bali, “Tembezelani kuti musingine mu kulikwa.”
41 Kadwa pabali thambgwana ingaposiwa bgwe likawilapo, ngono kathigama katembezela eti, 42 “Tate, ha muda, dusani bhepe ileli le kudziyidziwa pandili, koga kusi nge kuda kwangu, ngakushingwe kuda kwenyu.” [43 Ngono ntumwa unodwa kudzimu kaboneka kunli, kansimisa. 44 Nge shungu hwulu, katembezela nge masimba, ndizo dukuta lile likafanana ne madokhwe e malopa edothela pasi.]
45 Kati emilika, apedza tembezela kabgwilila ku badiyiwa babe, kawana bakayizela nge buyendasi. 46 Kababhuzwa kati, “Ini makayizela? Mukani mutembezele kuti ndizo musingine mu kulikwa.”
Kusungwa kwa Jesu
(Matewu 26:47-56Mako 14:43-50Johani 18:3-11)47 Kukati, atjalebeleka, mbunga we bathu ukazha wakatungamigwa ndi Judasi, mmwe we bali gumi lina babili. Kasedzela kuna Jesu kumputa. 48 Koga Jesu kambhuzwa kati, “Judasi, apa unowonga Nkololo we Nthu nge kumputa kene?”
49 Kukati bakabe bana Jesu bebona kuti kowoshingikalani bakati, “She, apa tibateme nge makanu edu kene?” 50 Ndizo mmwe wabo katema nlanda we Ntungamili we bapirisiti kanthubula zebe ye luji.
51 Koga Jesu kati, “Kwagala ikoku!” Kabhata zebe ye nlume ihwoyo ngono kampodza.
52 Ipapo Jesu kati ku bapirisiti bakulu ne balauli be balindi be Ng'umba ye Ndzimu ne bakulu be Bajuta bakabe bazha kunli, “Apa mazha ku ntjinyi kene, kwamungadzina mukazha nge makanu nenge swimbo kene? 53 Ndakabe namwi misi yose mu Ng'umba ye Ndzimu, koga amuzotongo ndibhata. Koga etji nditjo tjibaka tjenyu ne tjibaka tje simba le zhalima.”
Pita ezwilandula Jesu
(Matewu 26:57-58, Matewu 69-75Mako 14:53-54, Mako 66-72Johani 18:12-18, Johani 25-27)54 Ipapo bakasunga Jesu, bakantola, bakayenda bakangina naye mu ng'umba ye Ntungamili we bapirisiti. Pita katobela ali thambgwana. 55 Kukati babesa moto pakati kwe nsha, ngono bagala pasi bose, Pita kagala pasi nabo. 56 Mmwe nlandakadzi kambona ali gele ipapo pa tjedza tje moto. Kanlingisisa ngono kati, “Ihwoyu wabe anayebo.”
57 Koga Pita kalandula eti, “Nkadzi, ndiwe anditonziba.”
58 Shule kwe tjibaka tjifupi mmwe kakale kambona ngono kati, “Iwe umwe wabo.”
Pita kadabila eti, “Lumewe, ate ndili mmwe wabo.”
59 Shule kwe tjibaka tjingapa awara mmwe kakale kati, “Tjoselele iwoyu nlume wabe anaye, ngobe na iyebo N'galili.”
60 Koga Pita kadabila eti, “Lumewe, anditoziba kuti unoleba ngekweni!”
Kukati ipapo koga atjalebeleka, gukurume likalila. 61 She katendebuka kalingisisa Pita. Ipapo Pita kakumbula matama a She akabe andwa eti, “Gukurume lowoti lisathu likalila nasi unowobe wandizwiladula katatu.” 62 Kabhudila pazhe, ngono kalila kunogwadza.
Jesu edadigwa kakale elobgwa
(Matewu 26:67-68Mako 14:65)63 Balume bakabe bakabhata Jesu bakatangisa kun'dadila kakale benloba. 64 Bakanzwimba mesho bakati kunli, “U nlebesambeli, leba! Ndiani wakuloba?” 65 Bakaleba zwimwe zwinjinji bentuka.
Jesu eyisiwa mbeli kwe nshangano we makulukota e Bajuta
(Matewu 26:59-66Mako 14:55-64Johani 18:19-24)66 Kukati kuyedza makulukota e bakulu be Bajuta ne bapirisiti bakulu ne badiyi be nlayo bakakubungana, Jesu kazhisiwa mbeli kwabo. 67 Bakati, “Ha uli iye Mesiya utibudze.”
Jesu kadabila eti, “Ne ndingamubudza, amutowogalamoyo, 68 kakale ha ndingamubhuzwa amutowondishandula. 69 Koga kudwa ngwenu, iye Nkololo we Nthu unowogala ku luboko gwe luji gwe Masimbawose e Ndzimu.”
70 Bose bakabhuzwa bakati, “Apa ndiwe Nkololo we Ndzimu kene?”
Kadabila eti, “Maleba kuti ndi iye.”
71 Ipapo bakati, “Ini titjashaka butendeki gumwe? Tanzwihwigwa tjaaleba nge nlomo uwe.”
© Kalanga Bible © Bible Society of Botswana, 2008, 2018.