Kuzha kwe Meya yakayengemala
1 Kwakati zhuba le Pentekosite lazha, bose bakabe bakakubungana pathu pang'ompela. 2 Tjinyolotjo, nsindo unonga kuhwuhwudza kwe phepo ina masimba ukazha udwa kudzimu, ukazhala ng'umba yose yabakabe bali muili. 3 Bakabona kunofanana ne ndimi dzinonga nthuto we moto dzakapalalana, ngono dzikazha dzikagala pezhugwi kwe mmwe ne mmwe wabo. 4 Bose bakazhala Meya yakayengemala, ngono bakatangisa kulebeleka nge ndimi dzipoga sekwa bakapiwa nge Meya.
5 Mu Jerusalema kwakabe kugala Bajuta, balume banotja Ndzimu, banodwa mu njudzi dzose dze shango. 6 Bakati behwa nsindo iwoyu, mbunga nkulu ukakubungana nge gaabadzo, ngobe mmwe ne mmwe wabo wakabahwa belebeleka nge lulimi gugwe. 7 Ngono bakakaabala kwazo, bakabhuzwa beti, “Apa bathu bose ibaba banolebeleka ate Bagalili kene? 8 Ini ngono mmwe ne mmwe wedu ehwa mmwe ne mmwe wabo elebeleka nge lulimi gugwe? 9 Iswi todwa ku Patiya ne ku Mediya ne ku Elamu ne ku Mesopotamiya ne ku Judiya ne ku Kapadokiya ne ku Ponto ne ku Ezhiya 10 ne ku Firigiya ne ku Pamufiliya ne ku Egipiti ne mituthu imu Libhiya pejo ne Sirene, ne bezi banodwa ku Roma, 11 Bajuta kose ne bakabe beshanduligwa mu bugalimoyo gwe Tjijuta ne ku Kirete ne ku Arabhiya tobahwa beleba makaabadzo e Ndzimu nge ndimi dzedu!” 12 Bakakaabala basingahwisise, ngono bakabhuzwana beti, “Ikoku kodwani?”
13 Koga bamwe bakabadadila beti, “Bakalaladza.”
Sumikilo ya Pita
14 Koga Pita kamilika ne bali gumi lina nng'ompela, kamilidza hwi lile, ngono kalebeleka ne mbunga eti, “Bathu be Judiya, namwi mose bamu Jerusalema, imani ndimutjenesele ikoku; hwililani nge njele tjandinoleba. 15 Bathu ibaba abazolaladza sekwa munokumbula. Kutji tjibaka tje zhanalume mangwanana. 16 Koga etji nditjo tjakalebgwa nge nlebesambeli Jowele eti,
17 “ ‘Ndzimu ukati: Kowoti mu mazhuba e bupelo
ndowodila Meya yangu mu bathu bose.
Bakololo ne bakololokadzi benyu banowolebela mbeli
bazhuzha benyu banowobona mbono
ne bathuntana benyu banowowolota.
18 Kose ne mu balandalume bangu ne mu balandakadzi bangu
ndowodila Meya yangu mu mazhuba iyawo,
ngono banowolebela mbeli.
19 Ngono ndowothama matjenamiso pezhugwi kudzimu
ne zwilakidzo mu shango, pasi,
kowobe ne malopa ne moto nenge bhulubusi.
20 Zhuba lowotemapala kukabe zhalima
ngono mwedzi ukashandugwa ukashabapala se malopa
mbeli kwe kuzha kwe zhuba gulu la She.
21 Ngono kowoshingikala kuti iye unodana
zina la She mu tjibaka itjetjo atjidziwe.’
22 “Bathu be Iziraela, hwililani woku, Jesu we Nazareta nthu wamakalakidziwa nge Ndzimu nge matjenamiso makaabadzo nenge matjenamiso ne zwilakidzo, Ndzimu zwawakathama pakati kwenyu ndiye, sekwa munoziba imwi. 23 Jesu iwoyu makampiwa nge ndongoloso yakabigwa ye Ndzimu nenge kuziba zwimbeli kwawo; koga imwi makashingisa bathu babi kumbulaya nge kumbambula. 24 Koga Ndzimu wakammusa; unsunungula mu zogwadza zwe lufu, ngobe kwakabe kusingatubuke kuti lufu gumbhatile tjose. 25 Dafite wakati nge kukwe,
“ ‘Ndobona She misi yose mbeli kwangu.
Se bali ku luboko gwangu gwe luji, akuna tjingandizunguza.
26 Ndizo moyo wangu unoshatha
ne lulimi gwangu goshatha
ne mbili wangubo unowotjilila mu kugalabgwe,
27 ngobe amutowondisiya mu ikumbu
naiko amungaletjedzele N'yengemali wenyu kubola.
28 Makandilakidza zila ye butjilo,
mowondishathisa nge kubepo kwenyu!’
29 “Zwikamu, ndomubudza nge malebeswa kuti batategulu Dafite bakafa bakabiganyiwa, ngono ikumbu tjabo tjiyapo na nasi. 30 Bakabe bali nlebesambeli ngono bakaziba kuti Ndzimu wakabagadzabgwe nge kutuna kuti unowobiga mmwe we bana babo mu tjigalo tjabo tje bushe. 31 Bakabona zwimbeli ndizo bakaleba ngekwe kumuka kwe Mesiya kuti, ‘Aazosiyiwa mu ikumbu ne mbili uwe auzobola.’ 32 Ndzimu wakamusa Jesu ihwoyu, ngono iswi tose ti batendeki bekuti ikoku kwakayitikala. 33 Kati amilidzigwa ku luboko gwe luji gwe Ndzimu, aamutjila Meya yakayengemala se kugadzabgwe kwa Tate, ndizo watebulila mutili itjetji tjamunobona ne tjamunohwa. 34 Ngobe Dafite aazotathila kudzimu, koga iye kati,
“ ‘She bakati kuna She wangu:
Gala ku luboko gwangu gwe luji
35 kudzina ndithama zwita zwizo tjigalo tje makumbo awo.’
36 “Ndizo bose be ng'umba ye Iziraela ngabazibe nge malebeswa kuti Ndzimu wakathama Jesu iwoyu wamakabambula kube She ne kube Mesiya!”
37 Kukati bathu behwa ikoku, bakadziyidzika, ngono bakati kuna Pita ne batumwa bamwe, “Zwikamu, tishingeni ngono?”
38 Pita kashandula eti, “Shandukilani matjinyo enyu mudubikiwe, mmwe ne mmwe wenyu nge zina la Jesu Kirisiti kuti ndizo matjinyo enyu muazwiibhatigwe. Ngono mowoamutjila tjipo tje Meya yakayengemala. 39 Kugadziwabgwe nge kwenyu ne bana benyu na bose bakule kule, mmwe ne mmwe She Ndzimu wedu waunowodana.”
40 Ngono katendeka nge matama mamwe manjinji kabakulumbidza eti, “Muzwitjidze mu tjizekugwana itjetji tjakabipa.” 41 Ibabo bakaamutjila ndebo iye bakadubikiwa, ngono ilelo zhuba bakapaphidziwa nge bathu bali zwiwulu zwitatu (3 000). 42 Bakamusila meya zwidiyo zwe batumwa ba Jesu nenge kushangana nenge kupemula tjiwunga nenge mitembezelo.
Butjilo gwe bagalimoyo
43 Mmwe ne mmwe kazhigwa ngotja, ngono makaabadzo manji ne zwilakidzo zwinotjenamisa zwinji zwakathamiwa nge batumwa ba Jesu. 44 Bagalimoyo bose bakabe bali tjithu tjing'ompela, bakashanganyila tjimwe ne tjimwe. 45 Bakatengesa zwithu zwabo, kose ne thundu dzabo, ngono bakapa mmwe ne mmwe kuyendidzana nge kushaya kukwe. 46 Bakadwilila mazhuba wose beshangana mu Ng'umba ye Ndzimu. Bakabe bepemula tjiwunga mu mizi yabo beja bose nge moyo yakashatha nenge moyo mitjena, 47 bekudza Ndzimu kakale beamutjigwa zubuyanana nge bathu bose. Ngono She bakapapha zhuba ne zhuba ibabo bakabe betjidziwa.
© Kalanga Bible © Bible Society of Botswana, 2008, 2018.