Kudiya kwe bantolo
(Matewu 15:1-9)1 Bafarasi ne bamwe Badiyi be nlayo bakabe badwa ku Jerusalema bakakubungana pana Jesu. 2 Ngono bakabona badiyiwa babe bamwe beja nge maboko asimabuyanana, asakangugwa.
3 Bafarasi ne Bajuta bose, abatoja basangula maboko abo nge tjilenje tjabo. Oku banokuthama belondolodza tjilenje tje bawola. 4 Ha bedwa ku matengeselo abatoja basangula. Banolondolodza zwilenje zwimwe zwinjinji, zwinonga kusuka mikombe ne hali ne zwija zwe phangula.
5 Ndizo Bafarasi ne Badiyi be nlayo bakabhuzwa Jesu bakati, “Ini badiyiwa babo basingalondolodze zwilenje zwe bawola, beja zojiwa zwabo nge maboko asi mabuyanana?”
6 Kadabila kati, “Isaya wakabe elebesa paakalebela mbeli nge kwenyu batjengedzi ndimwi eti, kwakakwagwa kuyi,
“ ‘Bathu ibaba banondilumbidza nge milomo yabo koga,
koga mimoyo yabo ikule nami.
7 Banondithigamilila suli,
ngobe banodiya milayo ye bathu se banodiya nlayo wangu.’
8 “Moletjedza milayo ye Ndzimu, ngono mubhata zwilenje zwe bathu.”
9 Ngono kati ku bali, “Muna zila mbuya seni ye kubigila ntome milayo ye Ndzimu, kuti ndizo mulondolodze zwilenje zwenyu! 10 Mushe wakati, ‘Kudza tate babo na mmeyabo.’ Kakale wakati ‘Iye unoleba bubi ngekwa tate babe kene mmeyabe, nge malebeswa ngaafe.’ 11 Koga moti nthu ha eti kuna tate babe kene mmeyabe, ‘Tjamakabe makafanila tjidziwa ndimi nditjo tjabe Korobhani, kodwa kuti tjapiwa Ndzimu,’ 12 ngono kudwapo amuton'dumila kuthamila tjimwe tate babe kene mmeyabe. 13 Ndiko muthama kuti dama le Ndzimu lisishinge, nge tjilenje tjenyu tjamunopitshila ku bana benyu. Mothama zwithu zwinjinji zwakajalo.”
Zwithu zwinoyita kuti nthu asibe mbuyanana
(Matewu 15:10-20)14 Kakale Jesu kadana mbunga we bathu, ngono kati, “Mundibhulutaneni mose, ngono muhwisise. 15 Akuna tjikuzhe kwe mbili we nthu tjinganthama kuti asibe mbuyanana. Koga tjithu tjinodwa mu nthu nditjo tjinonthama kuti asibe mbuyanana. 16 [Una zebe dze kuhwa ngaahwe.]”
17 Kukati asiya mbunga we bathu angina mu ng'umba, badiyiwa babe bakambhuzwa ngekwe tjifaniso itjetji. 18 Kati ku bali, “Apa namwibo amutohwisisa kene? Amutobona kene kuti akuna tjinongina mu nthu tjidwa kuzhe tjinganlonga shambgwa? 19 Atjitongina mu moyo uwe, koga tjongina mu ntumbu uwe kudwapo tjibhuda mu mbili uwe.” Nge kujalo Jesu wakabe edwa kuti zojiwa zose zwibuyanana.
20 Kadwilila kati, “Tjinobhuda mu nthu nditjo tjinonthama kuti asibe mbuyanana. 21 Ngoti tjinodwa mukati kwe nthu, mu moyo uwe, mikumbulo mibi, kuwalilana kuzhe kwe ndobolo ne bubava ne kubulaya ne bupombwe, 22 ne tjiba ne bubi ne kutjebela ne butjakwani ne bugovu ne ndandala ne tjinya bamwe mazina ne kuzwida ne bulengwe. 23 Zwithu zose izwezwi zwakabipa zodwa mukati kwe nthu, ngono zothama nthu kuti asibe mbuyanana.”
Kugalamoyo kwe nkadzi we N'giriki
(Matewu 15:21-28)24 Jesu wakabhuda ipapo kayenda ku ntuthu we Tire ne we Sidoni, kangina mu ng'umba, ngono kaside kuti kube ne unoziba, koga kasitubule kubgwata. 25 Mmwe nkadzi wakabe ana mwana we tjianadana wakasungwa nge meya mbi, kazha kawila pa makumbo awe. 26 Nkadzi iwoyo wakabe ali N'giriki, akazwagwa mu Siriya mu ntuthu we Fenishiya. Wakakumbila Jesu kuti aduse meya mbi mu nkololokadzi uwe. 27 Jesu kati kunli, “Letja bana baje kutanga, ngobe akuzolulwama kuti zojiwa zwe bana zwitogwe zwiposegwe mbgwa.”
28 Nkadzi iwoyo kadabila eti, “Kwakajalo She, koga na idzo mbgwa dzikusi kwe tafuli, dzoja mamburumburu anowila pasi edwa mu ndilo dze bana.”
29 Ipapo kan'dwa kati, “Wadabila zubuyanana, ndizo ungayenda, meya mbi yabhuda mu nkololokadzi uwo.”
30 Kayenda kanyi, ngono kawana mwanadana uwe ali lele mu bulalo meya mbi yabhuda munli.
Jesu unopodza nlume wakabe ali bhubuzebe ntome ali mbebebe
31 Ipapo Jesu kashanduka edwa ku ntuthu we Tire, kapalama Sidoni edelukila ku gungwa gwe Galili nge zila ye ntuthu we Dekapoli. 32 Bamwe bathu bakazhisa mmwe nlume wakabe ali bhubuzebe, kakale asingatubule kulebeleka zubuyanana. Ndizo bakakumbila Jesu kumbiga maboko. 33 Jesu kati antolela ntome, edwa naye pa mbunga we bathu, kalonga zwinyala zwizwe mu zebe dze nlume iwoyo. Ipapo kathwa mate, ngono kabhata lulimi gwe nlume iwoyo. 34 Kalinga zhuzhugwi kudzimu, kafemela pezhugwi, kati kunli, “Efata” kunodwa kuti, “Zhulika.”
35 Zebe dze nlume iwoyo dzikazhulika ne lulimi gugwe gukasununguka, ndizo katangisa kulebeleka zubuyanana. 36 Jesu kabalaya kati kushaye wababudza. Koga kati ajalo ibo bakakuandamisa kwazo. 37 Bakatjenama kwazo bakati, “Unothama zwithu zose kubuyanana seni? Unothama ne mabhubuzebe akahwa ne mbebebe dzikalebeleka.”
© Kalanga Bible © Bible Society of Botswana, 2008, 2018.