Tjinowowila ibabo banotshambilidza bashayi
1 Yee mme wee! Bapalala ibo banoluka maano e bubi,
ibabo banoluka maano e mbipo bali mu malalo abo!
Nge mazhokuyedza banowobe bekushingikadza
ngoti kumu simba labo.
2 Banoyemula shango bebe bedzitapa,
ne ng'umba bebe bedzitapa.
Banotshambilidza nlume ne nsha uwe,
bentolela thaka iye.
3 Ndizo wali Yahwe bakati,
“Ndizo ngwenu ndolongolosa tjakabipa kutjithamila bathu ibaba,
tjamusingowotubula kuzwitjidza mutjili.
Amutjawo yendayenda muzwikudza,
ngoti tjowobe tjili tjibaka tjakabipa.
4 Mu zhuba ilelo banowomba lumbo gunokudadila,
belila nge tjililo tjinogwadza beti,
‘Iswi tathukudzika tjose,
thundu ye bathu bangu yakobanyiwa.
Yahwe bayitola mundili!
Shango yedu bayikobela batapi bedu.’ ”
5 Ndizo wali amutjowobe ne mmwe mu gubungano la Yahwe unokoba shango nge kukandila.
6 Banoti,
“Musilebesembeli,
musilebesembeli ngekwe zwithu izwezwi,
mabhatisashoni haangati wile.”
7 Apa ikoku kungalebgwa imwi, ng'umba ya Jakubo,
“Apa Meya ya Yahwe aina moyo nlefu kene?
Apa mishingo iyeyi nge yabo kene?
“Apa matama angu aatothama tjakanaka,
kuna umu zila yakatambunuka kene?
8 Koga bathu bangu mobamukila se tjita,
mombula hazu muna bana kunyalala
muna ibabo banopinda nge kugalabgwe
basina nkumbulo we ngwa.
9 Betjikadzi be bathu bangu,
mobatata mu ng'umba dzabo mbuya.
Modusa gudzo langu
mu bana babo nge kusingapele.
10 Milikani muyende,
ngoti ipapa ate pali pathu pe kunyaluluka
ngekwe kutemapadza nge golomodzo
linokolomodza kwakabangalala.
11 Ha nnyepi unotjebela angazha eti,
‘Ndowomugadzabgwe nkumbi ne busukwa,’
ndiye unowobe nlebesambeli we bathu ibaba!
Kugadzabgwe kusununguka
12 “Nge malebeswa ndowomukubunganya mose, iwe Jakubo,
nge malebeswa ndowokubunganya malimbelimbe e Iziraela.
Ndowobakubunganya se pkhwizi mu danga,
se ngubi mu mafulo,
kowobe zhoba ye mbunga we bathu.
13 Iye unothuka unowobatungamila,
banowothuka pa nkoba bakabhuda.
Mambo wabo unowopindila mbeli kwabo,
Yahwe ibo banowobe nsholo wabo.”
© Kalanga Bible © Bible Society of Botswana, 2008, 2018.