Lumbo gwa Mushe
1 Ipapo Mushe ne Baiziraela bakambila Yahwe lumbo beti:
“Ndowombila Yahwe ngoti bakunda kukulu kwazo,
baposela mbizi ne ntathi wayo mu gungwa.
2 Yahwe ndibo simba langu ne lumbo gwangu.
Ndibo Ndzimu wangu, ndowobakudza,
ba Ndzimu wa tate bangu ngono ndowobalumbidza.
3 Yahwe in'gwi wakasima,
Yahwe ndilo zina labo.
4 “Koloyi dze ngwa dza Faro ne bathu babe
bakadzilashila mu gungwa,
makombgwa awe ana mamo
akanyungila mu Gungwa Shaba.
5 Mikubila yakabakwitidza,
bakawila se bgwe liwila mu dziba lakangina.
6 “Luboko gwenyu gwe luji Yahwe, gokudzigwa mu simba,
luji gwenyu Yahwe, gopkhwanya gukapaladza tjita.
7 Mokunda banyanyayidzi benyu nge bukulu gwe bushe gwenyu,
bushongola gwenyu goja zwita zwenyu se moto upisa mashanga.
8 Ha mufula nge zwimilo zwenyu vula inokubungana,
vula dzinowunga dzoma dzikabe duthu,
vula yakangina inowomelela mukatikati kwe gungwa.
9 Tjita tjakazwidwa tjikati, ‘Ndowobalonda ababhata mu zila,
ndowokoba zwandatapa, athama sekwa ndinoshaka,
ndowolidza bukanu gwangu, abalobesa nge maboko angu.’
10 Makafula meya yenyu, gungwa gukabakwitidza.
Bakanyumbwila se ntodo mu vula inotjisa.
11 “Apa ndiupi kene unonga imwi Yahwe, pakati kwe midzimu?
Ndiupi unofana imwi, mu bushe gwakayengemala,
ungathama makaabadzo ne mishingo mikulu zwingapa?
12 Makatambunudza luboko gwenyu gwe luji,
pasi pakabamidza.
13 Makatungamila nge ludo gwenyu gusingazunguzike
bathu bamakadzutunula,
makabapeleka nge simba lenyu ku bugalo gwenyu gwakayengemala.
14 Njudzi dzakahwa ikoku dzikatetema,
hana dzikaloba bagali be Filisitiya.
15 Boshe be Edomu bapaluka moyo,
batungamili be Moabu bakabhakhwa nge luzhazhamo,
bagali bose be Kanana bakapela masimba.
16 Bakawigwa ne hana ne lutjo,
ngobona bukulu gwe luboko gwenyu,
bakama se bgwe basingazunguzike
kudzina bathu benyu imwi Yahwe bepinda,
kudzina bathu bamakadzutunula bepinda.
17 Mowobakotosa mukabadzikila mu dombo lenyu,
pathu pamakathama bugalo gwenyu, imwi Yahwe,
bugalo gwakayengemala, gwamakathama nge maboko enyu imwi Yahwe.
18 Yahwe banowobusa nge kusingapele.”
Lumbo gwa Miriyamu
19 Kwakati mbizi dza Faro ne batathi badzo ne koloyi dzidze dze ngwa dzingina mu gungwa Yahwe bakabuzila vula pezhugwi kwabo, koga Baiziraela bakatjuluka gungwa beyenda pasi pakawoma mukatikati kwe gungwa.
20 Ipapo nlebesambelikadzi Miriyamu hazwadzi ya Aroni katola tjilidzo tje thamborini kalidza ngono bakadzi bose bakantobela belidza zwilidzo zwe thamborini bezana. 21 Ngono Miriyamu kabambila eti:
“Mbilani Yahwe ngoti bakunda kukulu kwazo,
mbizi ne ntathi wayo kose balashila mu gungwa.”
Vula inobaba
22 Kudwa ipapo Mushe katungamila Baiziraela kuyenda mbeli kudwa pa Gungwa Shaba. Bakangina mu tjilambanyika bakayenda mu tjili mazhuba matatu basingawane vula. 23 Bakati beswika ku Mara bakasitubule kung'wa vula ye Mara ngoti yakabe ibaba. Ndizo pathu ipapo pakadang'wa kuyi Mara. 24 Bathu bakang'ong'ola kwazo kuna Mushe beti, “Towong'wani sangwenu kene?” 25 Mushe kalilila kuna Yahwe, ngono Yahwe bakanlakidza nti kavuna lutabi kagulashila mu vula, vula ikazipa. 26 Eleba matama awa akalebgwa ndi Yahwe eti, “Ha mungalondolodza tjakalebgwa ndi Yahwe Ndzimu wenyu, ngono mukashinga tjakalulwama mu mesho abo, mukalondolodza milayo yabo mulondolodza ndaulo dzabo, anditowomulonga njigwele idzedzi dzandakalonga Baegipiti, ngoti ndimi Yahwe mpodzi wenyu.”
27 Kudwa ipapo bakanoswika ku Elimu kwakabe kuna misenya ye vula ili gumi lina mibili (12) ne miti ye nlala ili makumi ali kutendeka (70), ngono bakathibelela ipapo pa vula.
© Kalanga Bible © Bible Society of Botswana, 2008, 2018.