Mbono ye kuwa kwe Bhabhiloni
1 Dama ngekwe tjilambanyika tjipa gungwa.
Se tjampupudze tjitutudza mu Negebu,
tjita tjozha tjidwa mu tjilambanyika,
mu shango inotjisa.
2 Ndalakidziwa mbono yakabangalala,
ntoleli unotapa,
nkolomodzi unokolomola.
Elamu, nginilila nge ngwa,
Mediya, komba nge ngwa,
ndowopedza tjililo tjose tjaakazhisa.
3 Ndizo wali ndamanukigwa mu thunji, zwibhayo zwandinabula se nkadzi ali mu zwibhayo zwe kutshibama,
ndakawoneswa ngekwe tjandinohwa,
ndakanyala moyo ngekwe tjandinobona.
4 Ndotogwa nge dzungu,
ndotetemeswa nge kutja,
madekwana andabe ndakashuba kuabona
azhisa kutetema ne lutjo kundili.
5 Banolulwamisa pabanojila,
bewala thobgwana dzabanogala,
bebe beja beng'wa.
Milikani imwi balauli
muzhodze zwiviko zwenyu mafuta!
6 Ngoti She bakati kundili,
“Yenda unobiga nlindi,
un'dwe alebe tjaanobona.
7 Ati ebona bataswi,
bakataswa mbizi beyenda bakabapa, ne bakataswa madonki, ne bakataswa kamela,
ngaahwilile,
ahwilile kwazo.”
8 Ipapo nlindi kamilidza hwi kati,
“She zhuba ne zhuba ndogala ndima pezhugwi kwe ngadzi,
pa nshingo wangu ndipo pandinoma busiku gose.
9 Ngono bonani, aba bataswi banozha,
bataswi be mbizi baswika bakabapa!”
Kashandula eti,
“Yawa, yawa Bhabhiloni,
ngono midzimu yawo yose ye zwifano
wayi pkhwanyila pasi.”
10 Imwi bathu bangu bakashokogwa, bakawulusiwa,
tjandahwa tjidwa kuna Yahwe Masimbawose,
Ndzimu we Iziraela ndomubudza itjo.
Mbono ngekwe Edomu
11 Dama nge kwe Duma.
Mmwe unondidana kudwa ku Seiri eti,
“Nlindi busiku gwakatini?
Nlindi busiku gwakatini?”
12 Nlindi kadabila eti,
“Mangwanana aswika ne busiku gwaswika.
Ha ungabhuzwa, bhuzwa,
ngono ubuye kakale.”
Mbono ngekwe Arabiya
13 Dama ngekwe Arabiya.
Imwi nlongolongo we koloyi dze Badedani
mokotokela mu zwishakana zwe Arabiya.
14 Muzhile vula bana nyota,
mupe batizhi zojiwa
imwi bagali be Tema.
15 Ngoti bakatizha thumo,
thumo labakamilidziwa
ne dati lakapetiwa,
betizha ngwa yakabangalala.
16 She bakalebeleka nami bakati, “Kowoti mu gole ling'ompela gudzo le Kedari likapela, tibala gole tilizanya nge gole linobaligwa ntapiwa unoshinga. 17 Balume bakasima, bakololo ba Kedari banobhayana nge misebe, bakasala banowobe bali bashomanana, ngoti Yahwe, Ndzimu we Iziraela walebeleka.”
© Kalanga Bible © Bible Society of Botswana, 2008, 2018.