1 Ntungamili we bapirisiti mmwe ne mmwe unoshalugwa mu bathu unopiwa nshingo we kuzwadzanya bathu ne Ndzimu, eyisa zwipo ne zwibhayilo zwe zwibi. 2 Unotubula kubhata zubuyanana ibabo banotjinya ngosheta zibo, se naiye ekuligwa ngokong'wa. 3 Ndizo wali akafanila kudusa tjibhayilo tje zwibi zwizwe ne zwe bathubo. 4 Akuna unozwipa mamo ekube Ntungamili we bapirisiti, koga wakafanila kudang'wa nge Ndzimu sekwa kwakadang'wa Aroni.
5 Ndizo sayikoko Kirisiti aazozwipa mamo ekube Ntungamili we bapirisiti, koga wakapiwa nge Ndzimu iwo wakati kunli,
“U Nkololo wangu,
nasi ndabe Tate babo.” 6 Sekwa wakaleba pamwe pathu uti,
“Unowobe mpirisiti nge kusingapele,
mu ndongoloso ya Melikizedeki.”
7 Mu butjilo gugwe muno mu shango, Jesu wakabe etembezela nge tjililo ekumbila nge mishodzi, ku Ndzimu iwo wakabe ungantjidza mu lufu. Ngono Ndzimu ukan'hwa ngoteta kukwe. 8 Nenguba akabe ali Nkololo, wakazwidiya kuhwa nge kudziyila kwaakadziyila ndiko. 9 Wakati ahwa nge buzhalo, kabe nsenya we kutjidziwa kusingapele kwabo bose banonhwa. 10 Ndzimu ukan'dana Ntungamili we bapirisiti kuyendidzana ne ndongoloso ya Melikizedeki.
Musilashe kugalamoyo muna Kirisiti
11 Nge kwaikoku kunjinji kwatingaleba, koga kwakasima kutjenesa, ngobe makazwina zebe. 12 Ngoti nenguba mu tjibaka tjino makafanila kube badiyi, mutjashaka mmwe kumudiya kakale zwidiyo zwe kutanga zwe dama le Ndzimu. Moshaka nkaka pana kuti mushake zojiwa zwakabhata. 13 Ngobe iye unotjila nge nkaka utji mwana, aana luzibo gwe dama le ndulamo. 14 Zojiwa zwakabhata nge zwe bakulukulu, nge zwe bana njalakang'wa dzakawolobeleka ngoshingisiwa kuthubukanya tjakalulwama ne tjisakalulwama.
© Kalanga Bible © Bible Society of Botswana, 2008, 2018.