Ntembezelo we sununguko ye itjaba
1 Imwi Ndzimu, Bezwitjaba bakanginilila lukata gwenyu,
bakatemapadza ng'umba yenyu yakayengemala,
bakaliga Jerusalema ukabe matongo.
2 Bakapa magola zwitumbu zwe balanda benyu kuti aje,
bakapa zwibandana zwe shango nyama ye bayengemali benyu.
3 Bakatebulila malopa abo pasi se vula,
kupoteleka Jerusalema wose,
ngono akuna wakababiganya.
4 Tatjibe sapa mu babakidzani naswi,
todadigwa tikasekwa nge bakatipoteleka.
5 Apa kowodza kukabe lini Yahwe,
makagwadzamoyo kene?
Apa kowodza kukabe lini kene,
bushongola gwenyu gowodwilila gupisa se moto?
6 Delusilani bushongola gwenyu mu zwitjaba zwisingamuzibe,
ne mu mibuso iyeyo isingadane zina lenyu.
7 Ngobe bakalobesa Jakubo
bakakolomola nzi uwe.
8 Musititilike milandu yabo batategulu bedu,
tjimbidzani mutihwile ngoni,
ngobe takaisiwa pasi kwazo.
9 Mutibhatshe, imwi Ndzimu we jidzo ledu,
ngentha ye gudzo le zina lenyu,
mutisunungule kakale mutizwiibhatigwe zwibi zwedu,
ngentha ye zina lenyu.
10 Ini zwitjaba zwingabhuzwa zwiti,
“Ndzimu wabo ungayi kene?”
Kubgwilizila kwe kutebugwa kwe malopa
e balanda benyu ngakuzibgwe mu zwitjaba mbeli kwenyu.
11 Gomela kwe basungwa ngakuswike mu zebe dzenyu,
nge simba lenyu bakililani ibabo bakasumikilisigwa lufu.
12 Bgwilizilani katendeka babakidzani naswi,
kugongobola kwabakamugongobola imwi She!
13 Ndizo iswi bathu benyu, ngubi ye mafulo enyu,
towomuboka nge kusingapele,
kudwa mu tjizekugwana kunoti ku tjizekugwana,
towoleba ngekwe kukudziwa kwenyu.
© Kalanga Bible © Bible Society of Botswana, 2008, 2018.