1 Ndimi Paulo ntumwa wa Kirisiti Jesu nge kuda kwe Ndzimu, ndina Timoti ikamu tjedu.
Todumilisa gubungano le Ndzimu limu Korinta ne bayengemali bose bamu Akaiya yose titi:
2 Ngoni ne kunyalala kunodwa ku Ndzimu Tate bedu na She Jesu Kirisiti ngakube namwi.
Paulo unoboka Ndzimu
3 Ngakukudziwe Ndzimu, Tate ba She wedu Jesu Kirisiti, Tate be ngoni, Ndzimu we nyaladzo mu zwithu zose, 4 iwo unotinyaladza mu kudziyila kwedu kose, kuti ndizo titubule kunyaladza ibabo bana kudziyila kumwe ne kumwe nge nyaladzo yatinonyaladziwa ndiyo nge Ndzimu. 5 Ngobe se tina gobe mukudziyila kwa Kirisiti kwakatiwandila, ne nyaladzo ya Kirisiti yakatiwandilabo. 6 Ha tidziyila, todziyilila nyaladzo ne jidzo lenyu; ha tinyaladziwa, namwibo mobe ne nyaladzo yamunowana ha mudzikitadza nge moyonlefu kudziyila kwatinodziyilabo ndiko. 7 Kugalabgwe kwedu mu muli akutozunguzika; ngobe toziba kuti se muna gobe mukudziyila kwedu, muna gobebo mu kunyaladzika kwedu.
8 Atitoshaka kuti musizibe, zwikamu, ngekwe kudziyila kwatakabe nako mu ntuthu we Ezhiya, ngobe takabe takamanikanyiwa kukulu kwazo, kwakabe kwakatipinda, ndizo tikawana ne butjilo dumbu tagutoboka. 9 Dumbu dumbu takazwiwana tinga bathu basumikilisigwa lufu; koga ikoko kwakabe kuli kutithama kuti tisizwigalebgwe koga tigalebgwe Ndzimu iwo unomusa bafi. 10 Wakatidzutunula mu mbhatsha dzinotjisa dze lufu, ngono unowotidzutunula, muuli takabiga kugalabgwe kwedu kuti unowoti dzutunula kakale. 11 Namwibo mutibhatshe nge ntembezelo, kuti ndizo banji banowotibokela ku Ndzimu ngekwe makombolelo atakapiwa ili kudabigwa kwe mitembezelo minjinji.
Paulo unoshandula mano awe
12 Tozwikudza nge butendeki gunopiwa nge hana dzedu kuti takazwibhata zubuyanana mu shango, kwazo kwazo mu kushingidzana kwedu namwi nge bubuyanana nenge kushaladuka kunodwa ku Ndzimu, kusi nge butjenjedu gwe shango, koga nge ngoni dze Ndzimu. 13 Ngobe atina tjatinomukwalila kuzhe kwe tjamungabala kakale tjamungahwisisa. Ndogalabgwe kuti mowohwisisa nge buzhalo, 14 sekwa makahwisisa kutukununu kuti mungazwikudza nge kwedu, saswi tingazwikudza nge kwenyu mu zhuba la She Jesu.
15 Ndakabe ndina malebeswa a ikoku, ndakabe ndishakazha ikoko kutanga kuti kushatha kwenyu kuzhadzisike kabili. 16 Ndakabe ndishaka kumukumba ndili mu zila yangu ndiyenda ku Makedoniya ne ndobuya ku Makedoniya kuti mundibhatshe mu gwendo gwangu kuyenda ku Judiya. 17 Apa mu kuleba ikoku ndakabe ne bulelu koga kene? Apa ndongoloso dzangu dzonga dze nthu tjinyama kene, ndili zwimisile kuti “Ee” na “Aa” tjibaka tjing'ompela kene? 18 Se Ndzimu nge malebeswa ugalikabgwe, dama ledu kumuli alizotongobe “Ee” na “Aa.” 19 Ngobe Nkololo we Ndzimu, iye Jesu Kirisiti wakasumikigwa pakati kwenyu ndimi na Silivano na Timoti, wakabe asi “Ee” na “Aa.” Koga munli misi yose ndi “Ee.” 20 Ngobe kugadzabgwe kose kwe Ndzimu kuna “Ee” munli, ndizo toleba titi “Ngakujalo” ndi Kirisiti kukudza Ndzimu. 21 Koga Ndzimu ndiwo unotithama tose iswi namwi kuti tibhatilile muna Kirisiti, ngono wakatishalula, 22 wakatibiga lutjwayo gwawo, ngono ukatipa Meya yawo mu mimoyo yedu ili tjipo tjinogadzabgwe. 23 Koga ndodana Ndzimu kupa butendeki nge kwangu! Kusazha kwangu ku Korinta kwakabe kuli kumutjengeta. 24 Atitomulaulila kugalamoyo kwenyu, ngobe toziba kuti mumile mu kugalamoyo kwenyu koga toshinga namwi tishingila kushatha kwenyu.
© Kalanga Bible © Bible Society of Botswana, 2008, 2018.