Ndebelombeli ngekwa mambo we Tire
1 Dama la Yahwe lakazha kundili liti, 2 “Nkololo we nthu, idwa mbusi we Tire uti, She Yahwe bakati,
“ ‘Se uzwida,
ubuya uti, “Imi ndi ndzimu.
Ndigele mu tjigalo tje midzimu,
pakati kwe makungwa.”
Koga iwe u nthu aute uli ndzimu
nenguba uzwidwa uti
wakatjenjela se ndzimu.
3 Bona wakatjenjela kupinda Daniyele,
uti akuna ikohwa tjakasumbikala ku kuli.
4 Nge butjenjedu gugo nenge kuhwisisa kuko
wakazwikubunganyila fumwa,
ukazwikubunganyila golide ne siliva
mu mbiganyilo dze fumwa iyo.
5 Nge butjenjedu gugo bukulu mu kutengesa
wakawatsha fumwa iyo
ngono ukazwida ngekwe fumwa iyo.
6 “ ‘Ndizo wali She Yahwe bakati,
“ ‘Se ufananya nkumbulo uwo
newe ndzimu,
7 ndizo bona, ndowozhisa bataya kubhayana nawe,
be ludzi gwakabangalala mu njudzi dzose
banowobhata mathumo kugwa ne bubuya gwe butjenjedu gugo
banowotjinya kunaka kuko.
8 Banowokuyisa pasi mu gomba
ngono unowofa lufu gwakabipa
pakati kwe makungwa.
9 Apa unowobe utjati, “Ndi ndzimu,”
uli pana ibabo banokubulaya kene?
Unowobe uli nthu koga usi ndzimu
mu maboko aibabo banokubulaya.
10 Unowofa lufu gwe nthu usakathumba
nge maboko e bataya, ngoti imi She Yahwe ndaleba.’ ”
11 Dama la Yahwe likazha kakale kundili liti, 12 “Nkololo we nthu, lilila mambo we Tire undwe uti, ‘She Yahwe bakati,
“ ‘Iwe wakabe uli tjilakidzo tje kupelela
uli zhele butjenjedu wakanaka kwakapelela.
13 Wakabe uli mu Edeni, nnda we Ndzimu
bgwe limwe ne limwe lakanaka lakabe lakakunakisa
Kaneliani ne topazi ne yasiperi ne dayimani
ne onikisi ne tukhoise
safire ne emeralidi,
mabgwe iyawa akabe akalumanyiwa nge golide
zwithamigwa iwe.
Muzhuba lawakabumbiwa
zwakathamiwa.
14 Iwe u kherubhu yakazhodziwa inobakilila,
ndaka kuthama wakajalo.
Wakabe uli mu dombo lakayengemala le Ndzimu,
uyenda pakati pe mabgwe ana moto.
15 Wakabe wakatambunuka mu zila dzidzo
kudwila mu zhuba lawakabumbiwa
kuswikila jinyo liwang'wa mu kuli.
16 Nge kuwanda kwe thundu yaunotengesa
wakada kumukilana ngono ukatjinya.
Ndizo ndakakulasha se tjakabipa kudwa mu Dombo le Ndzimu
ngono akutata iwe kherubhu inobakilila
kudwa pakati kwe mabgwe ana moto.
17 Wakati ukazwida mu moyo uwo ngekwe bubuya gugo,
wakatjinya butjenjedu gugo ngekwe kunaka kuko.
Ndakakulashila pasi,
akubonyolola mbeli kwa bomambo
kuti bakubone.
18 Nge kuwanda kwe matjinyo awo,
nge kutengesa kusakalulwama,
wakalengudza magalo awo akayengemala.
Ndizo ndakathama moto kudwa mukati kuko,
ngono ukakupisa
ngono aku thama nlota pasi
mu mesho abo bose bakakubona.
19 Bose banokuziba pakati kwe njudzi
bakakukaabalila.
Bhelelo lilo lakabipa
autjowobepo kakale.’ ”
Ndebelombeli ngekwe Sidoni
20 Dama la Yahwe likazha kundili liti, 21 “Nkololo we nthu, lingisana ne Sidoni ulebesembeli ngekwayo 22 uti, ‘She Yahwe bakati,
“ ‘Ndobhayana nawe Sidoni,
ngono ndowokudziwa pakati kuko.
Banowoziba kuti ndimi Yahwe
pandinoisumikilisa
ndilakidza kuyengemala kwangu muili.
23 Ndowozhisa bugwele muili
ne malopa anowotebugwa mu zila dzayo.
Babulawa banowowila muuli,
beligwa nge thumo linobhayana nayo mbizho dzose.
Ngono ipapo banowoziba kuti ndimi Yahwe.
24 “ ‘Bathu be Iziraela abatjowobe ne babakidzani banonga mihwa ipakati kwabo inobabhaya, banobalingila pasi. Ndizo banowoziba kuti ndimi She Yahwe.
Makombolelo anowozhila Iziraela
25 “ ‘She Yahwe bakati, Ndowoti ndikubunganya bathu be Iziraela kudwa mu njudzi dzabakapaladzigwa mu dzili ngono ndibe ndilakidza kuyengemala kwangu mu bali njudzi dzose dzibona, ipapo banowogala muna yabo shango yandakapa nlanda wangu Jakubo. 26 Banowogala nge kusununguka muili ngono bakabaka ng'umba bakalima minda ye mizhambi, bakatjila nge kunyalala imi ha ndiloba shamu babakidzani babo bakatongo babhata nge kubalingila pasi. Ngono banowoziba kuti ndimi She Yahwe.’ ”
© Kalanga Bible © Bible Society of Botswana, 2008, 2018.