Zakhariya 7 - Kalanga Bible (KBTP)

Ndulamo ne ngoni kusi kuzwinyima zojiwa

1 Kwakati mu gole le bunna le mbuso wa Mambo Dariyasi, mu zhuba le bunna le mwedzi we buzhanalume unodang'wa we Khisilevi dama la Yahwe likazha kuna Zakhariya. 2 Bathu be Bhetele bakabe batuma Sharezeri na Regemu Meleki ne bamwe babo kukumbila lubu muna Yahwe 3 ne kukumbila bapirisiti be Ng'umba ye Ndzimu ya Yahwe Masimbawose banobusa shango yose ne balebesambeli beti, “Apa takafanila lila ne kuzwinyima zojiwa mu mwedzi we bushanu sekwa tagala tithama makole wose kene?”

4 Dama la Yahwe Masimbawose banobusa shango yose ngono likazha kundili liti, 5 “Bhuzwa bathu bose kose ne bapirisiti be shango uti, ‘Apa makati muzwinyima zojiwa kakale mulila mu mwedzi we bushanu ne we butendeka mu makole wose iyawa ali makumi ali kutendeka, apa makabe muzwinyimila imi, imi dumbu kene? 6 Ngono ngwenu amuja mung'wa apa amutobe muzwithamila kene? 7 Apa makabe musakafanila bhulutana matama a Yahwe abakapa balebesambeli bekutanga tjibaka tje Jerusalema itjina mbakiso ne mizi yakaipoteleka, ne burwa ne shango yakawila kutjina bathu banjinji kene?’ ”

8 Dama la Yahwe likazha kakale kuna Zakhariya liti, 9 “Yahwe Masimbawose bakati, ‘Sumikilisani nge lebeswa kakale mulakidzane lubu ne ngoni. 10 Amuzofanila tshambilidza tjilikadzi ne siyang'wa ne bazhi kene bashayi, kushete wakumbulila mmwe bubi.’

11 “Koga bakalamba teedza, bakabhatilila mu bukomba bakazwina zebe dzabo kuti ndizo basihwe. 12 Nge malebeswa bakakukutadza mimoyo yabo, ikawomelela se bgwe, kuti ndizo basilondolodze nlayo ne matama a Yahwe Masimbawose abakatumila nge Meya yabo nge balebesambeli be kutanga. Ndizo, Yahwe Masimbawose bazhisa bushongola gusibushoma.

13 “Ngono kwakashingikala koga sekwa ndakaleba koga bakadwilila bakasibhulutane ndizo banowolila koga anditowobateedza, kojalo Yahwe Masimbawose. 14 Ndizoke ndowobapaladza nge dutu ndibapaladzila mu shango dzabasinga zibe. Ndizo shango inowosala ili matongo nge kwabo kusina ndodwa ne unoyenda yenda ngono shango yakanaka ikabe dongo.”