Kufuluka 38 - Kalanga Bible (KBTP)

Kuthama tjibeso tjinopisigwa zwipo

1 Kathama tjibeso tjinopisigwa zwipo zwe zwibhayilo, naitjobo katjithama nge gwasayile le nti unoyi n'wunga, bulefu gwatjo guli thambo mbili dzina gaswa ne bupabi gwatjo guli thabo mbili dzina gaswa, tjakalizalizana koga, bulefu gwatjo kudwa pasi kuyenda pezhugwi guli thambo ing'ompela. 2 Kathama nyanga dzatjo dzili nna mu midzibo yatjo, nyanga dzatjo dzili tjithu tjing'ompela natjo, ngono katjidzulula nge phangula. 3 Kathama zwija zose zwe tjibeso tjinopisigwa zwibhayilo, hali ne maharawo ne zwikutili ne mbambo dzinobhaya nyama ne makambana e moto, zwija zose kazwithama nge phangula. 4 Kathamila tjibeso tjinopisigwa zwibhayilo sefo ye phangula kusi pakati kwe tjibeso kudwa pezhugwi kuyendila pasi 5 Kalonga milipo minna mu midzibo ye sefo ye phangula ili inobhata mapango. 6 Kathama mapango nge nti unoyi n'wunga, kaadzulula nge phangula. 7 Kalonga mapango mu milipo mu mbizho dze tjibeso tjinopisigwa zwibhayilo, kuti tjisengiwe ndiwo, tjibeso tjinopisigwa zwibhayilo tjakathamwa nge makwasayile mukati kwatjo kusina tjimwe kuli phako koga.

Kuthamwa kwe bhavu le phangula

(Kufuluka 30:18)

8 Kathama bhavu linongulila nge phangula ne tjigadziko tjalo nge phangula, wakazwithama nge zwiponi zwe bashingili be tjikadzi bakabe beshinga pa nkoba we nshasha we bushanganilo.

Kuthamiwa kwe nsha

(Kufuluka 27:9-19)

9 Wakabakilila nsha we bugalo gwa Yahwe nge matyila akalembeleka akalukwa bubuya. Ku lubizho gwe burwa matyila akalembeleka akabe ali bulefu gwe thambo dzili zana (100). 10 Matyila akabe akabhakhwa nge mapango ali makumi mabili (20) ne zwigadziko zwawo zwili makumi mabili (20) zwe phangula, koga zwibhali ne zwisimiso zwakabe zwili zwe siliva. 11 Ku lubizho gwe bunandzwa matyila akalembeleka akabe ali bulefu gwe thambo dzili zana (100), mapango ali makumi mabili (20), zwigadziko zwawo zwili makumi mabili (20) zwe phangula, koga zwibhali ne zwisimiso zwazo zwili zwe siliva. 12 Ku lubizho gwe golombedzo matyila akalembeleka akabe ali bulefu gwe thambo dzili makumi mabili ana dzili shanu (25), mapango ali gumi, ne zwisimiso zwili gumi, zwibhali zwe mapango ne zwisimiso zwawo zwakabe zwili zwe siliva. 13 Ngono mbeli kwe nsha ku bhezhuba akabe ali bulefu gwe thambo dzili gumi lina shanu (15). 14 Bulefu gwe matyila akalembeleka ku lubizho gumwe gwe nkoba gwakabe guli thambo dzili gumi lina shanu (15), ne mapango ali matatu ne zwigadziko. 15 Ngono mu lubizho gumwe ne gumwe gwe nkoba we mbakililo ye nshasha matyila akalembeleka akabe ali bulefu gwe thambo dzili gumi lina shanu (15) ne mapango matatu ne zwigadziko zwitatu. 16 Matyila wose akalembeleka akabakilila nsha akabe akanaka lili jila lakalukwa. 17 Ngono zwigadziko zwe phanda zwakabe zwili zwe phangula, koga zwibhali zwe mapango ne zwisimiso zwazo zwakabe zwili zwe siliva, ngono mishogwana yazo naiyobo yakabe ili siliva, ngono mapango wose e mbakililo ye nshasha akabe akasimisiwa nge siliva. 18 Ngono tjisitilo tje nkoba we mbakililo ye nsha tjakabe tjakanakisiwa kwakanaka nge mbala we gova ne bushaba gwakabondelela ne bushaba gwe dundubusi lili jila buya lakalukwa. Bulefu gwatjo guli thambo dzili makumi mabili ana thambo dzili shanu (25) kudwa pasi kuyenda pezhugwi ne bupabi, kuyendidzana ne matyila akalembeleka e mbakililo ye nsha. 19 Akabe akabhakhwa nge mapango ali manna ne zwigadziko zwawo zwinna zwe phangula zwibhali zwawo zwili zwe siliva, ne mishogwana yayo ne zwisimiso zwili zwe siliva. 20 Ngono mbambo dzose dze bugalo gwe Ndzimu ne dze mbakililo ye nsha wose dzakabe dzili dze phangula.

Zwakashingisiwa kubaka bugalo gwe Ndzimu

21 Ezwi ndizo zwithu zwe bugalo gwe Ndzimu, nshasha we butendeki sekwa zwakabagwa ku nlayo wa Mushe, uli nshingo we Balevi bali pasi kwe ndaulo ya Ithamari nkololo wa Aroni we mpirisiti. 22 Bhezaleli nkololo wa Uri, nkololo wa Huri we ludzi gwa Juda, kathama kose kwakadwiwa Mushe ndi Yahwe. 23 Wakabe ebhatshiwa ndi Oholiyabu nkololo wa Ahisamaki we ludzi gwa Dani nyambi ye tjeka ne nakisa nge butala gwe gova ne bushaba gwakabondelela ne bushaba gwe dundubusi kakale eluka jila kwakanaka.

24 Golide yose yakashingisiwa mu nshingo, mu mbako yose ye bugalo gwakayengemala yakabe ili talenta dzili makumi mabili ana zhanalume (29) ne mazana ali kutendeka ana makumi matatu (730) e shekele, kuyendidzana ne shekele dze bugalo gwakayengemala. 25 Siliva yakawang'wa mu gubungano yakabagwa ikabe talenta dzili zana (100) ne shekele dzili tjiwulu tjina mazana ali kutendeka makumi mabili ana shanu (1 725), kuyendidzana ne shekele dze bugalo gwakayengemala. 26 Bheka ing'ompela yakabe idusiwa ne nsholo we nthu kuli gwamu le shekele, kuyendidzana ne shekele dze bugalo gwakayengemala, kudwa mu mmwe ne mmwe wakabe abagwa, kutangisa ne bana makole ali makumi mabili (20) kuyenda pezhugwi, bakabe bali balume bali zwiwulu zwili mazana ali tathatu ana batatu ne mazana mashanu ana makumi mashanu (603 550). 27 Zana (100) le talenta dze siliva lakashingisiwa mukulonga zwigadziko zwe bugalo gwakayengemala ne zwe matyila akalembeleka, zana (100) le zwigadziko lishingisigwa talenta dzili zana (100), talenta ing'ompela yakabe ishingisiwa mu tjigadziko tjing'ompela. 28 Ngono tjiwulu tjina mazana ali kutendeka ne makumi ali kutendeka ana shanu (1 775) e shekele wakathama zwibhali ne mapango, ebuya edzulula mishogwana ne kuthama zwisimiso zwayo. 29 Phangula yakadusiwa yakabe talenta dzili makumi mabili (20) ne shekele dzili zwiwulu zwibili zwina mazana manna (2 400). 30 Wakathama ndiyo zwigadziko zwe dendele le nshasha we bushanganilo ne tjibeso tjinopisigwa zwibhayilo tje phangula ne sefo ye phangula, ne zwija zose zwe tjibeso tjinopisigwa zwibhayilo, 31 zwigadziko kupoteleka nsha ne zwe nkoba wayo ne mbambo dzose dze bugalo gwe Ndzimu na zose zwe mbakililo.