Lufu gwe nkololo wa Jeroboamu
1 Mu tjibaka itjetjo Abija nkololo wa Jeroboamu kagwala. 2 Jeroboamu kadwa nkadzi uwe kati, “Milika uyende ku Shilo, ngono uambale nge zila yausingawozibgwa ndiyo kuti u nkadzi wa Jeroboamu. Ngono bona, nlebesambeli Ahija uikweno, iye wakati ndakafanila kube mambo we bathu ibaba. 3 Uyende wakambhatila zwiwunga zwili gumi ne makhekhe ne tjilongo tje butji gwe nyutji. Ukumbile akubudze tjinowoshingikalila nkololo wedu.”
4 Nkadzi wa Jeroboamu kathama sekwa adwiwa nge nlume uwe, kamilika kayenda ku Shilo ku nzi wa Ahija. Ipapo Ahija wakabe asingabone, ngoti mesho awe akabe atjipofupala ngobe akwegula. 5 Ngono Yahwe bakadwa Ahija bakati, “Nkadzi wa Jeroboamu waswika kuhwokubhuzwa ngekwe nkololo uwe, ngoti unogwala. Ngono umbudze woku na woku.”
Wakati eswika kazwithama mmwe nkadzi upoga. 6 Koga kati eswika pa nkoba, Ahija kahwa nsindo we makumbo awe, kandwa kati, “Ngina, iwe nkadzi wa Jeroboamu. Apa ini uzwithama mmwe nkadzi upoga kene? Ndatumwa ku kuli kukubudza thawu dzinolema. 7 Yenda unobudza Jeroboamu uti, ‘Yahwe Ndzimu we Iziraela bakati bakakutola pakati kwe Baiziraela bakakumilidza bakakuthama mbusi we bathu babo Baiziraela, 8 “Ndakapalalanya mbuso mu nsha wa Dafite akupa iwo. Koga auzofanana na Dafite nlanda wangu, wakabe elondolodza milayo yangu, enditobela nge moyo uwe wose, ethama ndulamo koga mbeli kwangu. 9 Koga iwe wakandilamba, wakanditanga undilonga bushongola, ngothama mbipo kupinda bose bakabusa mbeli kuko, ubuya uzwithamila midzimu ipoga ye zwifano kuinamata. 10 Ndizo bona, ndozhisa mbipo mu ng'umba ya Jeroboamu, ndowolobesa bana bose babo be tjilume, bose bamu busungwa ne bakasununguka. Ndowobalobesa se nthu episa dokonobe litshwa lilota. 11 Mmwe ne mmwe we nsha wa Jeroboamu unowofila mu nzi nkulu unowojiwa nge mbgwa, mmwe ne mmwe wafila ku shango unowojiwa nge magola, koleba imi Yahwe.” ’
12 “Tjimilika uyende ku nzi uwo. Kowoti ulonga gumbo mu nzi nkulu, mwana unowobe efa. 13 Ngono Baiziraela bose banowonlilila, bebuya bembiganya. Ngoti ndiye ega unowobiganyiwa, ngobe mu nsha wa Jeroboamu, ndiye ega unowang'wa tjimwe munli tjinoshathisa Yahwe, Ndzimu we Iziraela. 14 Shule kwa ikoko Yahwe banozwimusila mambo unowobusa Iziraela, unowozhisa bhelelo mu mbuso wa Jeroboamu kudwa ngwenu, naiko ngwenu wali. 15 Yahwe banowoloba Iziraela, kwainowozunguzika se lushanga guli mu vula. Banowodzikunula Iziraela mu shango iyeyi yakanaka yabakapa bobatategulu babo, bakaipaladzila seli kwe Gwizi gwe Yufuratesi, ngobe bakalonga Yahwe bushongola ngozwithamila ndzimukadzi we Asherimu. 16 Yahwe banowolasha Iziraela ngekwe zwibi zwa Jeroboamu, zwaakathama kabuya kakwebela Iziraela mu kuzwithama.”
17 Ndizo nkadzi wa Jeroboamu kamilika kayenda ku Tireza. Ngono kwakati koga etshamba pa itubhu tje ng'umba, mwana kabe efa. 18 Baiziraela bose bakagalila mwana tjililo, bebuya bembiganya, kuyendidzana ne dama la Yahwe labakadwa nlebesambeli Ahija.
Lufu gwa Jeroboamu
19 Mimwe mishingo ya Jeroboamu ne ngwa dzaakagwa ne sekwa akabusa, yose yakakwagwa mu Lukwalo gwe Zwiyitikalo zwa Bomambo be Iziraela kene? 20 Jeroboamu wakatola makole ali makumi mabili ana ali mabili (22) ebusa. Akafa, katobela botate babe, ngono nkololo uwe Nadabu kan'gala thaka mu bumambo gugwe.
Mambo we Juda Rehoboamu
(2 Zwiyitikalo 11:5—12:15)21 Rehoboamu wakabusa mu Juda, ana makole ali makumi manna ana gole lili ling'ompela (41). Wakabusa makole ali gumi lina kutendeka mu nzi nkulu Jerusalema, nzi wakabe Yahwe bazwishalulila iwo mu njudzi dzose dze Iziraela, kubiga zina labo muuli. Zina la mmeyabe lakabe liyi Naama bali N'ammoni.
22 Bajuda bakathama mbipo mbeli kwa Yahwe, Yahwe bakazhala bushongola ngekwe zwibi zwabo zwabakathama kupinda zwakatongo thamwa ndi bobatategulu babo. 23 Ngoti naibo bo bakazwibakila magalo a pezhugwi e kunamata pezhugwi kwe duthu limwe ne limwe lefu ne zwifano zwe Ashera kusi kwe ntutshi we nti mmwe ne mmwe. 24 Kakale kwakabe kuna balume bakabe bezwitengesela kuwalilana mu magalo e kunamata midzimu ipoga mu shango. Bakathama zose zwinoshimisa zwakabe zwithamiwa nge zwitjaba zwakatatiwa mu shango ndi Yahwe mbeli kwe Baiziraela.
25 Mu gole le bushanu Mambo Rehoboamu ebusa, Mambo Shishaki we Egipiti kanginilila Jerusalema. 26 Katola fumwa yose mu ng'umba ya Yahwe ne mu ng'umba ye bumambo, nenge zwiviko zose zwe golide zwakabe zwathamwa ndi Solomoni. 27 Ngono mu bumo gwazo Rehoboamu kathama zwiviko zwe phangula kazwipa balisi be mikoba ye ng'umba ye bumambo. 28 Kwakabe kuti mambo angina mu ng'umba ya Yahwe, balindi bebe bezwitola, eti abhuda bezwibgwiliza ku ng'umba ye bulindi.
29 Apa mimwe mishingo ya Rehobhuamu aizokwagwa mu Lukwalo gwe Zwiyitikalo zwa Bomambo be Juda kene? 30 Kwakadwilila kube ne ngwa pakati kwa Rehoboamu na Jeroboamu. 31 Ngono Rehoboamu wakafa katobela botate babe, kabiganyiwa pakabiganyiwa botate babe mu nzi nkulu wa Dafite. Zina la mmeyabe lakabe liyi Naama bali N'ammoni. Nkololo wa Rehoboamu, Abijamu kan'gala thaka mu bushe gugwe.
© Kalanga Bible © Bible Society of Botswana, 2008, 2018.