Mishingo ya Dafite ali mu Jerusalema
(2 Samuele 5:11-16)1 Mambo Hiramu we Tire katumila batumwa bakasenga mapango e miti ye sida ne babezhi be mabgwe ne babezhi kuna Dafite kuti babakile Dafite ng'umba ye bushe. 2 Dafite kabona kuti Yahwe bambiga mambo we Iziraela kakale bushe gugwe gukudziwa kwazo ngekwe bathu babe Baiziraela. 3 Ngono Dafite kalobola bakadzi banjinji mu Jerusalema ngono kabe ne bakololo ne bakololokadzi banjinji. 4 Awa mazina e bana baakabe nabo ku Jerusalema: Shamuya na Shobabu na Nathani na Solomoni 5 na Ibihari na Elishuwa na Elipheleti 6 na Nogha na Nefegi na Jafiya 7 na Elishama na Bheliyada na Elifeleti.
Kundiwa kwe Bafilisitiya
(2 Samuele 5:17-25)8 Kwakati Bafilisitiya behwa kuti Dafite wa zhodziwa kube mambo we Iziraela, Bafilisitiya bose bakabhuda itethela kunoshaka Dafite ngono Dafite kati ehwa nge kwako kabhuda kanobanginilila. 9 Bafilisitiya bakabe bazha pa nkuku we Refaimu ngono bakatapa kose. 10 Ngono Dafite kashakisisa ku Ndzimu eti, “Ndiyende kunonginilila Bafilisitiya kene? Apa mowothama kuti ndibakunde kene?” Ngono Yahwe bakan'dabila beti, “Yenda! Ndowobalonga mu maboko awo.” 11 Ngono katathila ku Bhaaleparazimu ngono Dafite kabakunda ikoko, ngono Dafite kabe eti, “Ndzimu wandishingisa kuti ndipaladze zwita zwangu se nkubila unothwa nge shango.” Ndizo zina la ipapo likadang'wa kuyi Bhaaleparazimu. 12 Bafilisitiya bakasiya midzimu yabo ipapo ngono Dafite kalaula kuti ipisiwe.
13 Ngono Bafilisitiya bakanginilila nkuku kakale. 14 Ngono kukati Dafite ebhuzwa Ndzimu ngono Ndzimu ukadabila uti, “Usitongobashangamidza ubapoteleke shule ngono ubanginilile udwa ku lubizho gwe miti ye malibheri. 15 Ngono uti uhwa nsindo we makumbo mu theswi dze malibheri, ipapo ube utangisa gwa, ngobe Ndzimu wayendila mbeli kuko kubulaya babhayani be Bafilisitiya.” 16 Ngono Dafite wakathama sekwa akadwiwa nge Ndzimu ngono bakabulaya ngwa ye Bafilisitiya kudwa ku Gibiyoni kunoti ku Gezeri. 17 Ngono tjilumbi tja Dafite tjikaandama nge shango dzose kakale Yahwe bakathama kuti atjiwe nge zwitjaba zose.
© Kalanga Bible © Bible Society of Botswana, 2008, 2018.