1 Mu mazhuba iyawo, Bafilisitiya bakakubunganya babhayani babo kunobhayana ne Iziraela. Akhishi kadwa Dafite Kati, “Wakafanila ziba kuti iwe ne bathu babo moshanganyila nami mu ikwata.”
2 Dafite kashandula eti, “Imwi ndimwi monowobona kuti nlanda wenyu ungathamani.”
Akhishi kan'dabila eti, “Kwakalulwama, iwe ndokuthama ntjengeti wangu butjilo gugo gose.”
Saulo unolebeleka ne badzimu
3 Ipapo Samuele wakabe afa, ngono Baiziraela bose bakan'galila tjililo, bakambiganya mu Rama nzi kanyi kwabo. Saulo wakabe atata banodana badzimu ne ng'anga dzinokandila mu shango. 4 Bafilisitiya bakakubungana bakathibelela ku Shunemu, Saulo kakubunganya Baiziraela bose, bakathibelela ku Gilibhowa. 5 Kwakati Saulo ebona babhayani be Bafilisitiya, katja, moyo uwe ukazhala lutjo. 6 Kabhuzwa kuna Yahwe, Yahwe bakasitongo n'dabila, nakuto kuli nge hwope kene Urimu kene nge balebesambeli. 7 Ndizo Saulo kadwa bashingili babe kati, “Mundishakile nkadzi unolebeleka ne badzimu, kuti ndizo ndiyende kunli ndinombuzwa.”
Bankandwa bakati, “Kuna mmwe ku Enidori.”
8 Ndizo Saulo kazwishandula mbumbiko, kaambala zwiambalo zwipoga, busiku katola balume babili kayenda nabo ku nkadzi iwoyo. Kandwa kati, “Undidanile badzimu, undimusile wandinowodana nge zina.”
9 Koga nkadzi kan'dabila eti, “Nge malebeswa moziba tjakathamwa ndi Mambo Saulo. Bakatata bose banodana badzimu ne ng'anga dzinokandila mu shango. Hwutini munditshila gwanga munditeela kuti ndibulawe kene?”
10 Saulo katuna ndi Yahwe, kandwa kati, “Ndolebesa ndotuna ndi Yahwe banotjila, aungalobgwe shamu ngekwe kuthu ikoku.”
11 Ndizo nkadzi kabhuzwa kati, “Ngono ndowomumusila ani kene?”
Kan'dabila eti, “Undimusile Samuele.”
12 Kukati nkadzi ebona Samuele, kalila ekuila pezhugwi, ngono kadwa Saulo kati, “Apa hwutini manditjebela kene? Imwi Mambo Saulo!”
13 Mambo kandwa kati, “Usitje. Unobonani?”
Nkadzi kadabila eti, “Ndobona ndzimu uzhuzhulukila pezhugwi udwa pasi.”
14 Kambhuzwa kati, “Mbumbiko yayo yakatini kene?”
Nkadzi kandwa kati, “Nthuntana wakambala hazu.”
Ndizo Saulo kaziba kuti ndi Samuele, kakotamisa nsholo kalinga pasi.
15 Samuele kadwa Saulo kati, “Apa hwutini wandidziyidza nge kundimusa kene?”
Saulo kadabila eti, “Ndimu manikano hwulu kwazo, Bafilisitiya banogwa nami, ngono Ndzimu wakandifupatila kakale autjandidabila, kene kuli nge balebesambeli kene nge hwope. Ndizo ndamudana kuti mundibudze tjandingathama.”
16 Samuele kandwa kati, “Ini wandidana ngwenu Yahwe batjikufupatila bakakushandukila babe tjita tjitjo kene? 17 Yahwe bathama sekwa bakaleba beti ndikubudze, kuti bapaladza mbuso mu maboko awo, ngono baupa mmwe we zwikamu zwizo, baupa Dafite. 18 Ngobe auzohwilila hwi la Yahwe, kene kushingikadza bushongola gwabo mu Bamaleki, ngono nasi, Yahwe bathama kuthu ikoku mukuli. 19 Yahwe banokulongelanya ne Iziraela mu maboko e Bafilisitiya, ngono mangwana iwe ne bakololo babo mowobe munami. Yahwe banowolongelanya ne ikwata tje Iziraela mu maboko e Bafilisitiya.”
20 Tjinyolotjo Saulo kawa katandabala pasi, katja kwazo, etjisiwa nge matama a Samuele. Wakapelegwa nge simba ngobe wakabe ashwa kakale kalala kusina tjaaja. 21 Kukati nkadzi ezha kuna Saulo, kati ebona kuti unotetema kwazo, kati kunli, “Bonani, nlandakadzi wenyu wakamuteedza, ndalonga butjilo gwangu mu mbatsha, ngothama tjamati ndithame. 22 Ngono ngwenu, tjiteedzani nlandakadzi wenyu, imani ndimupe zojiwa muje, kuti muwane simba muzwiyendigwe zwenyu.”
23 Kalamba kandwa kati, “Andingaje.” Koga balanda babe bakabhatsha nkadzi iwoyu bakantshindilila, ngono kabateedza, kamuka pasi kagala tjigalo tje mapobepobe. 24 Nkadzi wakabe ana ikondolo tjakakodziwa mu nzi uwe, katjibhaya tjinyolotjo, katola bgwisa gwe tjiwunga, kaguvanga kabhika tjiwunga tjisina mbidzo. 25 Kazwibiga mbeli kwa Saulo ne balanda babe, bakaja. Ndizo bakamilika bakayenda busiku igogu.
© Kalanga Bible © Bible Society of Botswana, 2008, 2018.