1 Kwakati shule mu tjibaka tje kuvun'gwa kwe koroni, Samisoni kanokumba nkadzi uwe ngono kansengela tjibudzana. Ngono kati, “Ndongina mu ng'umbana ye nkadzi wangu.” Koga tate babe bakanlambila ku ngina mukati. 2 Tate babe bakati, “Ndakakumbula kuti unonshima dumbu, ndizo ndikampa nzwalani uwo. Nnunguna uwe unompinda nge naka, ndokumbila utole iye mu bumo gugwe.” 3 Samisoni kabadwa kati, “Ngwenu ndowobendisi nlandu ngekwe Bafilisitiya apa ndibakubadza.” 4 Ndizo Samisoni kanobhata bophungubgwe zwili mazana matatu (300) kazwisungilikanya nge mimwise bubili ne bubili, katola zwinovoneka kazwisungila mu bubili gose. 5 Ngono kati abhatidza moto muna zwinovoneka kaletja bophungubgwe zwiyenda ku minda dze Bafilisitiya zwikapisa mathunde kose ne minda dze mizhambi nedze mitoba.
6 Kwakati Bafilisitiya bebhuzwa beti, “Ndiyani wathama ikoko?” Bakabudziwa kuyi, “Ndi Samisoni, nkwasha we nlume we Timina, ngoti batola nkadzi uwe bempa nzwalani uwe.” Ngono Bafilisitiya bakazha bepisa nkadzi na tate babe nge moto. 7 Samisoni kabadwa kati, “Apa kuli itjo tjamunothama, ndotuna kuti andingamuletje kuswikila nda mubgwilizila.” 8 Kabanginilila kwakabangalala kabulaya banji. Ipapo kayenda kanogala mu guwu mu shongwe ye Etami.
Samisoni unokunda Bafilisitiya
9 Bafilisitiya bakayenda bakakotokela ku Juda, betalabukila ku Lehi. 10 Ngono balume be Juda bakabhuzwa beti, “Ini wazha kuwotigwisa kene?” Bakashandula beti, “Tazhila kuwosunga Samisoni, kunthama tjaakatithama.” 11 Balume bali zwiwulu zwili zwitatu (3 000) bakayenda ku shongwe ye Etami bakadwa Samisoni bakati, “Autoziba kuti Bafilisitiya banotibusa kene? Watithamilani kene?” Kadabila eti, “Ndabathamila tjabakandithama.” 12 Bakandwa bakati, “Tazha towokusunga kuti tinokulonga mu maboko e Bafilisitiya.” Samisoni kabadwa kati, “Tunani kundili kuti amungandibulaye nebukwenyu.” 13 Bakan'dabila beti, “Aa, towokusunga koga tikokulonga mu maboko abo, atingakubulaye.” Ndizo bakansunga nge misungo mibili mitshwa bakandusa mu shongwe.
14 Wakati eswika ku Lehi, Bafilisitiya bakanshanganidza be mimila, Meya ya Yahwe ikazha munli nge simba, ngono misungo yakabe ili mu maboko awe ikanga thali dzapisiwa nge moto, misungo ikaletja mu maboko awe. 15 Kawana shaya dze donki dzitjazwihwa, kadzitola kabulaya balume bali tjiwulu (1 000) nadzo. 16 Samisoni kati,
“Ne shaya dze donki
ndakabathama matuluthulu,
Ne shaya dze donki
Ndakabulaya balume bali zwiwulu.”
17 Wakati apedza lebeleka, kalasha shaya dze donki, ngono pathu ipapo kuka dang'wa Ramatilehi.
18 Ngobe wakabe ana nyota kwazo, kalilila kuna Yahwe kati, “Mapa nlanda wenyu kukunda kukulu. Ngwenu ndingafa ne nyota kene, ndiwila mu maboko e bathu basakathumbigwa?” 19 Ngono Ndzimu bakapubula gomba lakabe lili ku Lehi kukabhuda vula. Kati e ng'wa kabuyigwa nge simba lile katjila. Ndizo nsenya ukadang'wa kuyi Enehakori, na nasi uyapo ku Lehi. 20 Samisoni katungamila Baiziraela kwe makole ali makumi mabili (20) mu mazhuba e Bafilisitiya.
© Kalanga Bible © Bible Society of Botswana, 2008, 2018.