Mako 16 - Kalanga Bible (KBTP)

Kumuka kwa Jesu

(Matewu 28:1-8Luke 24:1-12Johani 20:1-10)

1 Ngono kukati nsi we Sabata wapinda, Mariya we Magadala na Mariya mme ba Jakubo na Salome bakatenga zwipayisi kuti banozhodza mbili wa Jesu. 2 Kukati kutji mangwanana e zhuba le kutanga le tshipi zhuba labhuda, bakayenda ku ikumbu tja Jesu. 3 Bakati bali mu zila bakabhuzwana beti, “Apa ndiani unowonotikunguludzila shongwe ipa nkoba we ikumbu kene?” 4 Koga bakati belinga bakabona kuti shongwe iyeyo yakakunguludzigwa ntome. Yakabe ili shongwe hwulu hwulu kwazo. 5 Ngono bakati bengina mu ikumbu, bakawana kuna nzhuzha ugele tje ku luji gwe pakabe pa kushikiwa Jesu, akaambala zwiambalo zwitjena, bakatjenama kwazo.

6 Kabadwa kati, “Musitjename, moshaka Jesu we Nazareta wakabambugwa. Wamuka, aapo ipapa, lingani paakabe akakushikiwa. 7 Koga, yendani munobudza badiyiwa babe na Pita kuti, ‘Unoyenda ku Galili mbeli kwenyu, mowonombonako sekwa akamubudza.’ ”

8 Ndizo bakabhuda mu ikumbu ngono bakatizha, betetema bakakaabala, bakayenda kusina wabanobudza tjimwe, ngoti bakabe betja.

BUPELO GWA NTOLO GWE NDEBO MBUYA

(Mako 16:9-20)

Jesu unozwilakidza kuna Mariya we Magadala

(Matewu 28:9-10Johani 20:11-18)

9 Wakati emuka nge zhuba le kutangisa le tshipi, kabong'wa gwe kutanga ndi Mariya we Magadala, iye waakadusa meya mibi ili kutendeka. 10 Kayenda kanobudza bamwe bose bakabe beyenda na Jesu atjatjila, bakabe batjimu tjililo. 11 Ngono bakati behwa kuti unotjila ne kuti Mariya we Magadala wambona, bakasigalemoyo tjaanoleba.

Jesu unozwilakidza ku badiyiwa babe babili

(Luke 24:13-35)

12 Shule kwa ikoku Jesu kabong'wa kakale nge bamwe babili be badiyiwa babe beyenda bali mu shango. 13 Ngono na ibo bakati bambona bakashanduka, bakanobudza bamwe, koga bakanyanyayidza.

Jesu unozwilakidza kuna bali gumi lina ng'ompela

(Matewu 28:16-20Luke 24:36-49Johani 20:19-23Mishingo 1:6-8)

14 Kukati shule kabong'wa nge bali gumi lina ng'ompela, wakabawana beja, ngono kabakayikanyila kusagalamoyo kwabo ne kube ne moyo nkukutu ngobe basakagalamoyo ibabo bakambona asinomusiwa. 15 Ndizo kabadwa kati, “Yendani mu shango yose, mudiye dama le Ndzimu mu bathu bose. 16 Mmwe ne mmwe unowogalamoyo kabuya kadubikiwa, unowotjidziwa, koga usingagalemoyo unowobong'wa nlandu, kalobesiwa. 17 Ezwi zwilakidzo zowoboneka muna banogalamoyo: nge zina langu banowodusa meya mibi mu bathu, banowolebeleka nge ndimi dzipoga. 18 Banowobhata nyoka nge maboko, ha bangang'wa tjimwe tjinobulaya, atjitowobati tjimwe, banowopodza bagwele nge kubabiga maboko.”

Jesu unotolegwa kudzimu

(Luke 24:50-53Mishingo 1:9-11)

19 Ndizo She Jesu kati alebeleka nabo, kamilidzigwa kudzimu, kanogala ku luboko gwe luji gwe Ndzimu. 20 Ngono badiyiwa babe bakamilika bakayenda besumikila Ndebo mbuya kumwe ne kumwe. She wakabe eshinga nabo elakidza kuti malebeswa nge zwilakidzilo.

GUMWE BUPELO GWA NTOLO GWE NDEBO MBUYA

(Mishingo 16:9-10)

9 [Bakadzi bakayenda kuna Pita ne bazwalani babe ngono bakababudza nge bufupi tjababudziwabo. 10 Kudwa ipapo Jesu nge kukwe wakadzwala shango yose kudwa ku bhezhuba kunoti ku golombedzo, matama akayengemala e jidzo lisingapele.]