Kuzwibgwilizila kwe Baiziraela ku Bamidiyani
1 Yahwe bakadwa Mushe bakati, 2 “Bgwilizila Bamidiyani tjabakathama mu Baiziraela, shule kwa ikoku, unowofa.”
3 Ngono Mushe kadwa bathu be Iziraela kati, “Muzwilulwamisile babhayani munogwa ne Bamidiyani, Yahwe babgwilizilile tjabakathamwa ne Bamidiyani. 4 Dusani balume bali tjiwulu tjing'ompela (1 000) mu ludzi gumwe ne gumwe gwe Iziraela bayende ku ngwa.”
5 Ndizo muna bali zwiwulu be Baiziraela kukashalugwa balume bali tjiwulu tjing'ompela (1 000) koga, mu ludzi gumwe ne gumwe, bose bakabe bali zwiwulu zwili gumi lina bubili (12 000) bakazwilulwamisila kuyenda ku ngwa. 6 Mushe wakabatumila kungwa bali tjiwulu kudwa mu ludzi gumwe ne gumwe, bakatungamigwa ne mpirisiti Finihasi nkololo wa Eleazari akabhata zwija zwe bugalo gwakayengemala ne lunyanga gunolaula ngwa. 7 Bakagwa ne Bamidiyani Yahwe sekwa bakadwa Mushe, ngono bakabulaya balume bose, 8 bakabulayilanya kose na bomambo babo bashanu Evi na Rekemu na Zuri na Huri na Reba na pezhugwi kwa ibaba bakabulaya na Bhalamu nkololo wa Bheyori nge thumo. 9 Bathu be Iziraela bakatapa bakadzi ne bana be Midiyani, bakazwitolegwa zwithuwo ne thundu yabo yose. 10 Bakapisa mizi mikulu yose mu magalo abakabe baligele ne makotokelo abo wose. 11 Bakatola zose zwakatapiwa zwabakawana nge ngwa, bathu kose ne zwithuwo. 12 Bakazwizhisa kuna Mushe neku mpirisiti Eleazari ne gubungano le Iziraela lakabe lakotokela mu lubala gwe Moabu seli kwe gwizi gwe Jorodani kulingisana ne Jerikho.
Babhayani banoshanduka ku ngwa
13 Mushe ne mpirisiti Eleazari ne batungamili bose be gubungano le bathu be Iziraela bakabhuda bakanobashanganidza kuzhe kwe bukotokelo. 14 Ngono Mushe kazhala bushongola ngekwe balauli be babhayani ne balauli be babhayani be bali zwiwulu ne balauli be babhayani be bali mazana, bakabe babuya ku ngwa. 15 Kababhuzwa kati, “Apa makaletja bakadzi betjila kene? 16 Bonani, Bakadzi ndibo bakateedza gumbuludzo la Bhalamu ku Peori bakathama kuti bathu be Iziraela bathamile Yahwe mbipo. Ngono tjiga tjikazha mu gubungano la Yahwe. 17 Ndizo ngwenu, bulayani bana bose be tjilume, mube mubulaya bakadzi bose bakatongo walilana. 18 Koga muzwisiyile baanadi bose basathu bakawalilana. 19 Mmwe ne mmwe wabulaya nthu ne mmwe ne mmwe wabhata itumbu anokotokela kuzhe kwe bukotokelo kwe mazhuba ali kutendeka. Mu zhuba le butatu ne muzhuba le butendeka, muzwitjenepadze imwi ne bakadzi bamakatapa. 20 Mutjenapadze tjiambalo tjimwe ne tjimwe, ne tjimwe ne tjimwe tjakathamwa nge ganda ne tjakathamwa nge bukuse gwe mbudzi kene nge lukuni.”
21 Mpirisiti Eleazari kadwa balume bakabe bayenda ku ngwa kati, “Nlayo wakapiwa Mushe ndi Yahwe ndi woyu: 22 Zose zwakathamwa nge golide ne siliva ne phangula ne tshipi ne nge ntodo, 23 nenge tjimwe ne tjimwe tjisingake tjikatshwa mu moto, mutjibabe nge moto, ngono tjowotjenapala. Nenguba kwakajalo, mutjitjenapadze nge vula inotjenapadza. Ne tjingatshwa nge moto, mutjisuke nge vula. 24 Mube musuka zwiambalo zwenyu mu zhuba le butendeka, ngono mowobe matjenapala. Ngono shule kwa ipapo mowodumigwa kungina mu bukotokelo.”
Thubukanyiwa kwe zwakatapiwa
25 Yahwe bakadwa Mushe bakati, 26 “Iwe ne mpirisiti Eleazari ne batungamili be misha mu gubungano, mubale zose zwakatapiwa, bathu kose ne zwithuwo. 27 Mukobanye zwakatapiwa kabili, muzwikobele bakabe bayenda ku ngwa ne gubungano lose. 28 Ngono mutolele Yahwe lukhetho mu babhayani bakabe bayenda ku ngwa, mutole tjing'ompela mu mazana ali mashanu (500) e bathu kene ng'ombe kene madonki kene pkhwizi kene mbudzi. 29 Mutole gwamu le bubili mu gobe labo mupe Eleazari ili tjipo tjinopiwa Yahwe. 30 Mu gobe le bathu be Iziraela, mutole tjing'ompela mu makumi mashanu mamwe ne mamwe e bathu kene ng'ombe kene madonki kene ngubi ye pkhwizi, mu zwithuwo zose, muzwipe Balevi ibo bashingili be bugalo gwa Yahwe.” 31 Mushe na Eleazari bakathama sekwa kadwiwa Mushe ndi Yahwe.
32 Ipapo muna zwakabe zwatapiwa nge babhayani bakabe bayenda ku ngwa kwakasala, pkhwizi dzili zwiwulu zwili mazana ali matathatu ana makumi ali kutendeka ana dzili shanu (675 000) 33 ne ng'ombe dzili zwiwulu zwili makumi ali kutendeka ana mbili (72 000) 34 ne madonki ali zwiwulu zwili makumi matathatu ana ing'ompela (61 000) 35 ne bakadzi bakabe basathu bakawalilana bali zwiwulu zwili makumi matatu ana kubili (32 000). 36 Ngono gwamu lakabe gobe le babhayani bakabe bayenda ku ngwa dzakabe pkhwizi dzili zwiwulu zwili mazana matatu ana makumi matatu ana dzili kutendeka ne mazana mashanu (337 500). 37 Ngono lukhetho gwa Yahwe kwakabe pkhwizi dzili mazana ali matathatu ana makumi ali kutendeka ana dzili shanu (675). 38 Ng'ombe dzakabe dzili zwiwulu zwili makumi matatu ana dzili tathatu (36 000) mudzili lukhetho gwa Yahwe gwakabe guli ng'ombe dzili makumi ali kutendeka ana kubili (72). 39 Madonki akabe ali zwiwulu zwili makumi matatu ana mazana ali mashanu (30 500), muali lukhetho gwa Yahwe gwakabe guli madonki ali makumi ali kutathatu ana kung'ompela (61). 40 Bathu bakabe bali zwiwulu zwili gumi lina kutathatu (16 000), mubali bali makumi matatu ana kubili (32) bakabe lukhetho gwa Yahwe. 41 Ngono Mushe katola zwakabe zwili lukhetho gwa Yahwe kazwipa Eleazari Yahwe sekwa bakabe badwa Mushe.
42 Mushe wakatola gwamu muna zwakabe zwili zwe babhayani bakabe bayenda ku ngwa epa bathu be Iziraela sa woku: 43 Pkhwizi dzili zwiwulu zwili mazana matatu ana makumi matatu ana kutendeka ana mazana ali mashanu (337 500) 44 ne ng'ombe dzili zwiwulu zwili makumi matatu ana kutathatu (36 000) 45 ne madonki ali zwiwulu zwili makumi matatu ana mazana ali mashanu (30 500) 46 ne bathu bali zwiwulu zwili gumi lina kutathatu (16 000) 47 mu gwamu le bathu be Iziraela Mushe wakatola tjili tjing'ompela mu makumi mashanu mamwe ne mamwe epa Balevi bakabe bali batjengeti be bugalo gwa Yahwe, koga sekwa bakabe badwa Mushe.
48 Ndizo batungamili bakabe bakatungamila babhayani ne balauli be babhayani bali zwiwulu ne balauli be babhayani bali mazana bakayenda kuna Mushe, 49 bakandwa bakati, “Balanda benyu babala babhayani ba pasi kwenyu, ngono akuna ne nng'ompela wakatilashikila. 50 Ngono tazhisa zwipo kuna Yahwe, zwadwa mu mmwe ne mmwe wedu, zwitimbi zwe golide, maseka e maboko, rin'gi dze zwinyala, mang'ina e zebe ne zwitimbi, kuzwithamila gadzano mbeli kwa Yahwe.” 51 Mushe ne mpirisiti Eleazari bakaamutjila golide mubali ne mikhabo yose yakathugwa. 52 Golide yose yakadusiwa nge balauli be babhayani bali zwiwulu ne balauli be babhayani bali mazana yakadusiwa kupiwa Yahwe yakabe ingabe bulemo gwe tjilizanyo tje seme dzili mazana mabili (200). 53 Babhayani bakabe bayenda ku ngwa bakazwitolegwa zwakabe zwatapiwa ku ngwa. 54 Ngono Mushe na Eleazari we mpirisiti, bakaamutjila golide mu balauli be babhayani bali zwiwulu ne balauli be babhayani bali mazana. Bakaibiga mu nshasha we bushanganilo, ili tjikumbuludzo mu bathu be Iziraela mbeli kwa Yahwe.
© Kalanga Bible © Bible Society of Botswana, 2008, 2018.