Ng'ong'ola ngekwe bupitipiti gwe nzwalani
1 Teedzani ntembezelo wangu, Ndzimu;
musizwisumbikile kukumbila kwangu.
2 Mundibhatshe mundidabile;
ndodziyidzika mu kung'ong'ola kwangu.
Nsholo wangu wakashangashangana koga,
3 ngekwe zhoba ye tjita,
kakale ngekwe zhoba ye babi.
Banondisimisila butjilo,
banoshathisiwa nge kundigwadzila moyo.
4 Moyo wangu unogwadziwa kukulu,
lufu ne tjisa kwago zwimundili.
5 Lutjo ne tetema kwabe mundili,
ne kutjisa kunopalusa moyo kumundili.
6 Ndozwidwa nditi,
“Ha ndabe ndina mapapilo se njiba!
Ndabe ndowowuluka,
ayenda zwangu anonyaluluka;
7 Nge malebeswa, ndabe ndowotizhila kulekule;
ndabe ndowogala mu tjilambanyika;
8 Ndabe ndowolibilidzila kuzwiwanila bugalo
gwandinowotizhila phepo ne matutu muguli.”
9 She, shangashanganyani ndebo dzabo
mudzizhadze bulengwe;
ngoti ndobona bugebeng'a
ne kukwebakwebana mu nzi nkulu.
10 Siku ne sikati banopoteleka
liswingo gwakabakilila nzi nkulu,
butjinyi ne kudziyidzika zwimukati kwawo;
11 Kolomoka kwabe pakati kwawo;
matengeselo awo azhele
tshambilidzo ne bupitipiti.
12 Ate zwita zwinondidadila,
ngobe ndabe ndingadzikitadza;
ate babhayani nami banondishayila buthu,
ngobe ndabe ndowobagwatila.
13 Koga ndiwe, nkwinya wangu,
iwe wandinogala ntutshi nawe,
nzwalani wangu wandakawolobela,
14 ibabo bandakabe ndibe nabo nge zila yakanaka;
takayenda mu Ng'umba ye Ndzimu ne mbunga.
15 Ngabazhigwe nge lufu;
ngabayende be tjila ku bugalo gwe bafi;
ngobe bubi gumu mizi yabo nenge mu mimoyo yabo.
16 Koga imi ndodana Ndzimu,
ngono Yahwe banowonditjidza.
17 Madekwana ne mangwanana nenge masikati
ndoleba ng'ong'olo yangu kakale ndigomela,
koga She banowohwa hwi langu.
18 Banowondidzutunula nge mbakiso
mu ngwa iyeyi yandinotangisa,
ngobe bathu banjinji bakazwilulwamisila kundigwisa.
19 Ndzimu, iwo ugele mu tjigalo tje bushe kudwa ntolo,
unowohwa, ngono unowobadelusa
ngobe abatoshanduka
kakale abatotja Ndzimu.
20 Nkwinya wangu wakabhata nzwalani uwe nge maboko
ndizo kashandukila tjidumano tjedu.
21 Nge matama manyolo kupinda bhatha,
koga moyo uwe unoalakana ngwa koga;
nge matama manyolo kupinda mafuta,
koga malebeswa wukuti matama iyawo akabe ali mathumo akateya.
22 Tola mitolo iyo uyibige muna Yahwe;
ndizo banowokumilidza;
Yahwe abatowotongoletja balulwami bakatshedugwa.
23 Koga imwi, Ndzimu, mowobalashila pasi ibabo basakalulwama,
mu gomba lakangina.
Zwing'wamalopa ne mapitipiti abatowotjila
nenguba lili gaswa le mazhuba abo.
Koga imi ndowogalabgwe mu muli Ndzimu.
© Kalanga Bible © Bible Society of Botswana, 2008, 2018.