Esita 9 - Kalanga Bible (KBTP)

Bajuta banokunda zwita zwabo

1 Ndizo mu zhuba le bugumi lina matatu le mwedzi we Ada, ndaulo ne nlayo zwa mambo, zwikabe zwakafanila shingikadziwa, zhuba ileli ndilo zhuba lakabe zwita zwe Bajuta zwigalabgwe kuti zowobe zwikunda Bajuta ndilo, koga likashanduka kube zhuba Bajuta labakabe bowokunda zwita zwabo. 2 Bajuta bakazwikubunganya mu mizi yabo yose imu mituthu yose ya Mambo Ahasurusi kuti ndizo bamukilane na ibabo banoshaka kubagwisa. Kwakabe kusina nthu ungamilana nabo ngobe be njudzi dzimwe bakabe bobatja kunotjenamisa. 3 Kakale makulukota e mituthu yose ne batungamili ne balauli ne makombgwa bakabhatsha Bajuta ngobe bakabe betja Modekayi. 4 Modekayi wakabe abe nkulu mu ng'umba ya mambo ngono tjilumbi tjitje tjikazibgwa mu mituthu yose ngobe simba lile lakabe lipaphidzika tjibaka ne tjibaka. 5 Ndizo Bajuta bakabulaya zwita zwabo zose nge thumo, be babhaya be balobesa, bathama sekwa banoda nge zwita zwabo. 6 Ku nzi nkulu Susa Bajuta bakabulaya balume bali mazana ali mashanu (500). 7-10 Mubali bakabulaya Pashandatha na Dalifoni na Asifatha na Poratha na Adaliya na Aridatha na Pamashita na Arisai na Aridayi na Vayizatha. Bose ibaba bali gumi bakololo ba Hamani nkololo wa Hamedatha tjita tje Bajuta. Koga kutapa iko bakasikukume. 11 Mu zhuba ilelo zwalo, mambo wakabikigwa mbalo ye balume bakabulawa mu nzi nkulu we Susa. 12 Kudwapo mambo kayenda kuna Nfumakadzi Esita ngono kandwa kati, “Mu nzi nkulu Susa, Bajuta babulaya balume bali mazana ali mashanu (500) ne bakololo bali gumi ba Hamani. Ngono dumbu, bathamani mu mimwe mituthu yangu yasala kene! Ngwenu ini tjaunoshaka? Leba koga unowotjipiwa. Ini tjaunokumbila kakale? Naitjo ndowokupa itjo.”

13 Ngono Esita kashandula eti, “Apa kushathisa mambo, ndokumbila kuti Bajuta bamuke bashingikadze nlayo iwoyo wa nasi kakale, bakololo ba Hamani ibaba bali gumi basungiligwe mu thungamakole.” 14 Ndizo mambo kalaula kuti itjetjo tjishingwe. Ngono kukadusiwa ndaulo yakajalo mu Susa ndizo bana ba Hamani bakasungiligwa. 15 Bajuta bakabe bali mu Susa bakazwikubunganyabo mu zhuba le bugumi lina manna mu mwedzi we Ada ngono bakabulaya balume bali mazana ali matatu (300), koga kutapa iko bakasikuthame. 16-17 Mu zhuba le bugumi lina matatu le mwedzi we Ada, Bajuta bamwe bakabe basala mu mituthu mimwe ya mambo bakazwikubunganya kuti bazwigwile basununguke mu zwita zwabo. Bakabulaya zwita zwabo zwili zwiwulu zwili makumi ali kutendeka ana bushanu (75 000), koga kutapa iko bakasikuthame. Kudwapo mu zhuba le bugumi lina manna Bajuta bakanyaluluka ngono bakathama zhuba le nzano we kushatha. 18 Koga Bajuta bakabe bali mu Susa bakakubungana mu zhuba le bugumi lina matatu nele bugumi lina mashanu ngono bakanyaluluka mu zhuba le bugumi lina mashanu, muna ilelo zhuba bakathama nzano we kushatha. 19 Ndizo Bajuta banogala ku makanyi bethama zhuba le bugumi lina manna le mwedzi we Ada zhuba le kushatha, ne le kunyaluluka kakale ili zhuba le kupana zwipo zwakanaka zwe zojiwa.

Nzano we Shatho

20 Modekayi kakwala zwiyitikalo zose izwezwi, kudwapo katumila hwalo ku Bajuta bose bakabe bali mu mituthu yose ya Mambo Ahasurusi bapejo ne bakule, 21 ebabudza kuti bakafanila kuti gole ne gole bathame nzano we shatho mu zhuba le bugumi lina manna (14) ne mu zhuba le bugumi lina mashanu (15) le mwedzi we Ada, 22 iwo mazhuba akati Bajuta bakawana sununguko mu zwita zwabo kakale ili mwedzi wakati zhuba le tjililo likashanduka zhuba le shatho ne mpululu. Bakafanila kuti baathame mazhuba e nzano we shatho, mazhuba ekupa bamwe zwipo zwakanaka zwe zojiwa ne kukobana ne banosheta. 23 Ndizo Bajuta bakathama sekwa bakatanga bethama ne kulondolodza tjimwe ne tjimwe tjabaka kwaligwa ndi Modekayi.

24 Hamani we N'agati nkololo wa Hamedatha, tjita tje Bajuta bose, wakabe alukila Bajuta gwanga ngoposa hakata, kubona tjibaka tjakalingisana kubabulaya ne kubalobesa. 25 Esita wakati ayenda kuna Mambo Ahasurusi kankumbila kuti atjidze bathu babe, mambo wakadusa ndaulo nge nkwalo kuti maano a Hamani mabiibi aakabe alukila Bajuta athamigwe iye ne bakololo babe basungiligwe mu thungamakole. 26 Ngekwe kose kwakakwagwa mu lukwalo gwa Modekayi ne tjakabe tjakabalingisana bakadana mazhuba iyawa beti Purimu , Purimu ili dama lidwa mu dama linoyi Puri, 27 ndizo Bajuta ne zwizekugwana zwabo na bose bakazwishanganya nabo, bakazwimisila kuti banowolondolodza mazhuba iyawa gole ne gole sekwa kwakakwagwa. 28 Mazhuba iyawa akapelela ili kuti akafanila kumbulukigwa kakale alondolodziwe kudwa mu tjizekugwana kunoti ku tjizekugwana, mu nsha mmwe ne mmwe, ne mu ntuthu mmwe ne mmwe ne nzi nkulu mmwe ne mmwe. Kakale mazhuba iyawa e purimu azofanila lengudziwa kene Bajuta bakamisa kualondolodza.

29 Ndizo Nfumakadzi Esita nkololokadzi wa Abihaile na Modekayi we Njuta, kakwala lukwalo nge simba le bufumakadzi esisithila lukwalo gwe bubili gwakabe guleba ngekwe nzano we Purimu. 30 Hwalo dzakatumiligwa Bajuta bose ne ku mituthu ili zana lina makumi mabili ana ali kutendeka ye bushe gwa Ahasurusi, dzibayemulila mbakiso ne mbakililo, 31 ne kuti mazhuba e Purimu alondolodziwe tjibaka tjakabigwa sekwa Modekayi we Njuta ne Nfumakadzi Esita bakalaulila Bajuta, ngono ibo bakazwimisila kupitshila kulondolodza ikoku ku zwizekugwana zwabo koga sekwa bakazwimisila kulondolodza misi yekuzwinyima zojiwa neye tjililo. 32 Ndizo zila dze kulondolodza nzano we Purimu dzakazhadzisiwa ne Nfumakadzi Esita ngono dzikakwagwa pasi.