Ndzimu banowoloba Itopiya
1 Yee mme wee, shango ye nsindo we mapapilo,
iseli kwe njizi dze Itopiya,
2 inotumila bamilili nge gungwa,
bali mu vula mu zwikepe zwakathamiwa nge shanga dze gwizi!
Yendani imwi batumwa bana majatu,
ku itjaba tjakakula tjina ganda buyanana,
yendani ku bathu banotjiwa pejo na kule,
itjaba tjakasima gunokunda,
guna shango yakathubukanyiwa nge njizi.
3 Imwi mose bagali be lubumbo,
imwi mugele mu shango,
ha tjilakidzo tjimilidziwa pezhugwi kwe matombo, mulinge!
Lunyanga ha gulidziwa muhwe!
4 Ngoti Yahwe bakati kundili,
“Ndowolinga ndilinyelele kudwa mu magalo angu
se kupisa kunodwa mu kupenya kwe zhuba,
kufanana ne gole le khawa kupisa mu nsi we kuvuna.”
5 Kowoti kusathu kukavungwa, maluba asinoshashamuka,
zhambi dzoyendila kubidwa dzishanyuka,
unowothubula thabi tshwa dzinokula nge mipanga inosunulila
ebe ekuthubulila pasi thabi dzinopasha.
6 Bose koga banowosiigwa
nyuni dze matombo dzinoja nyama
ne zwibandana zwe shango.
Nyuni dzinoja nyama dzowopitsha tjilimo nabo dzibaja,
zwibandana zose zwe shango zwikapitsha mbaba nabo.
7 Mu tjibaka itjetjo zwipo zowozhisiwa kuna Yahwe Masimbawose
zwizhisiwa nge bathu balefu be ganda buyanana,
bathu banotjiwa pejo na kule,
ludzi gwakasima gunokunda,
be shango yakathubugwanyiwa nge njizi.
Banowozha ku Dombo le Ziyoni
bugalo gwe zina la Yahwe Masimbawose.
© Kalanga Bible © Bible Society of Botswana, 2008, 2018.