Amosi unolakidziwa phashu
1 Eyi ndiyo mbono yandakalakidziwa ndi She Yahwe. Shule kwa mambo asinomwayigwa bushwa mu tjibaka tjegothinila, ndakabona Yahwe be thama phashu. 2 Mu mbono yangu ndakabona phashu idzedzi dzija tjimwe ne tjimwe mu shango tje mmbala we bgwelele, ngono dzikati dzopedzaja ndakati, “She Yahwe ndomukumbila zwiibhatigweni bathu benyu, dumbu banowotjila tjini wali? Batukununu kwazo abana matatabuko.”
3 Ipapo Yahwe bakashandula nkumbulo wabo, bakabe beti, “Akutjowoshingikala.”
Amosi unolakidziwa moto
4 Eyi ndiyo mbono yandakalakidziwa ndi She Yahwe: Ndakabona She Yahwe bezwilulwamisila kusumikilisa nge moto, ngono moto ukawomesa vula dzimukatikati, ukabuya ukaja shango. 5 Ipapo abe nditi, “She Yahwe tjimisani ikoku, ndomukumbila. Dumbu bathu benyu banowotjila tjini wali? Batukununu kwazo abana matatabuko.”
6 Ipapo Yahwe bakashandula nkumbulo wabo muna ikoku, bakabe beti, “Na ikokubo akutjowoshingikala,” koleba Yahwe.
Amosi unolakidziwa nsungwana
7 Eyi ndiyo mbono yandakalakidziwa ndi She Yahwe: Ndakabona She bakabhata nsungwana unoshingisiwa kutambunudza guma bali mile kubapa ne guma lakati libakiwa likatambunudziwa ne nsungwana. 8 Ngono Yahwe bakandibhuzwa beti, “Amosi unobonani?”
Ashandula nditi, “Nsungwana unoshingisiwa kutambunudza.”
Ipapo Yahwe bakabe beti, “Bona, ndolonga nsungwana unoshingisiwa kunotambunudza pakati kwe bathu bangu Baiziraela, kulakidza kuti abazotambunuka ndizo anditoshandula nkumbulo wangu kubasumikilisa. 9 Magalo apezhugwi e kunamata a Isaki anowokolomodziwa ne magalo akayengemala e Iziraela anowobe matongo. Ndowobhayana na Mambo Jeroboamu nge thumo langu.”
Amosi na Amaziya
10 Ipapo Amaziya mpirisiti we Bhetele kayisa mahwi kuna Jeroboamu mambo we Iziraela eti, “Amosi unolanganila kuliga bushe gugo mu Iziraela. Shango aingadzikitadzile matama awe. 11 Amosi unolebeleka eti, ‘Jeroboamu unowofa nge thumo, nge malebeswa Iziraela unowotapigwa kule ne shango iye.’ ”
12 Amaziya kadwa Amosi kati, “Iwe mboni, tizhila ku shango ye Juda, uwane zojiwako ne dama le Ndzimu ulisumikileko. 13 Usibe utjalebesambeli mu Bhetele ngoti bugalo gwakayengemala gwa mambo ne ng'umba iye ye kunamata ye mbuso uwe.”
14 Amosi kashandula Amaziya eti, “Imi andite ndili nlebesambeli, kene nkololo we nlebesambeli, koga ndi nlisi ne nlimi we mipaya. 15 Koga Yahwe bakanditola ndakalisa zwithuwo, bakandidwa bakati, ‘Yenda unolebesambeli ku bathu bangu Baiziraela.’ 16 Koga ngwenu unohwa dama la Yahwe ngono ube uti, ‘Usitongolebesambeli ngekwe Iziraela kakale misa kusumikila kusakanaka ngekwe ng'umba ya Isaki.’ 17 Ngono tjinoleba Yahwe etji, ‘Nkadzi uwo unowobe fukula mu nzi nkulu, bakololo ne bakololokadzi babo ibo banowobulawa nge thumo. Nnda uwo unowolizanyidziwa ukathubugwanyiwa, ngono iwe unowofila mu shango yakatemapala. Baiziraela nge malebeswa banowotapigwa kule ne shango yabo.’ ”
© Kalanga Bible © Bible Society of Botswana, 2008, 2018.