Nathani unoyisa ndaidzo kuna Dafite
(2 Samuele 7:1-17)1 Dafite wakabe wogala mu ng'umba iye ye bushe ngono kadwa nlebesambeli Nathani kati, “Bona ndogala mu ng'umba yakabakwa ne mapango e nti we sida koga Bhokisi le Tjidumano tja Yahwe litji mu nshasha.”
2 Ngono Nathani kati kuna Dafite, “Thama tjipa moyo uwo ngobe Ndzimu unawe.”
3 Koga kwakati busiku igogo dama la Yahwe likazha kuna Nathani liti, 4 “Yenda unobudza nlanda wangu Dafite uti ndikati, ‘Aungandibakile ng'umba yandinga gala, 5 ngobe andizotongo gala mu ng'umba kudwa mu zhuba landakatungamila Iziraela kudwa mu Egipiti kuswika ngwenu koga ndakagala kudwa mu nshasha kunoti ku mmwe nshasha mu bugalo wogu kunoti woguje. 6 Mu magalo wose andakayenda ne Baiziraela apa ndakatongo dwa mmwe we basumikilisi be Iziraela, ibo bandakalaula kuti batjengete bathu bangu, nditi andibakile ng'umba ye mapango e sida kene?’ 7 Ndizo ngwenu ubudze nlanda wangu Dafite uti Yahwe Masimbawose bakati, ‘Ndakakudusa mu mafulilo wakalisa pkhwizi kuti ndizo ube nlauli we bathu bangu Iziraela. 8 Ndakabe nawe pamwe ne pamwe pawakabe uyenda, atatila kutjena zwita zwizo, ngono ndowothama ukabe ne tjilumbi se batungamili bakulu bakabepo mu shango. 9 Kakale ndowoshalula bugalo gwe bathu bangu Baiziraela, ndowobabiga mu magalo abo ngono akutjina unowobadziyidza kene bakabe bali balume be mbipo abanga tjabayite tjimwe se mu kutanga, 10 kudwa tjose mu tjibaka tjandakapa bathu bangu Baiziraela basumikilisi. Ndowokunda zwita zwabo zose. Kakale ndokubudza kuti imi Yahwe ndowokubakila ng'umba ye bumambo. 11 Unowotiwafa ndowothama kuti mmwe we bakololo babo aku gale thaka abe mambo. 12 Ndiye unowondibakila ng'umba, ngono bushe gugwe gowogalila tjose. 13 Ndowobe tate babe ngono iye unowobe nkololo wangu. Ludo gwangu gusingazunguzike agungatothole sekwa ndakathama muna wakabe ali mbeli kuko. 14 Koga ndowombiga kabe nlauli we ng'umba yangu newe mbuso wangu kakale bushe gugwe gowogalila tjatjose.’ ” 15 Nathani kabudza Dafite matama iyawa wose koga kuyendidzana ne mbono.
Ntembezelo wa Dafite wekuboka
(2 Samuele 7:18-29)16 Kudwa ipapo Dafite kangina mu nshasha wa Yahwe ngono katembezela eti, “Dumbu ndiani wali Yahwe Ndzimu? Ne nsha wangu ndiupi wamungati mukandiswikisa pano wali? 17 Se ingati kwakabe kusakalizana mbeli kwenyu Ndzimu, makagadzabgwe nlanda wenyu zwikule zwinowozha, makandilakidza zwizekugwana zwinowozha imwi Yahwe Ndzimu wangu! 18 Ngono dumbu Dafite ungatjamudwani wali ngobe makakudza nlanda wenyu kene? Kana moziba nlanda wenyu. 19 Yahwe ngekwe nlanda wenyu, imwi Yahwe ne kuyendidzana nge tjamunoshaka, makathama kose ikoku kukulu kakale makathama kuti zose zwikulu zwamakagadzabgwe zwizibgwe. 20 Yahwe akuna unofanana namwi naikobo akuna mmwe Ndzimu kuzhe kwenyu muna zose zwatakahwa nge zebe dzedu. 21 Itjaba tjipi mu shango tjinofanana ne itjaba tjenyu Iziraela, Ndzimu tjawakanodzutunula kuti ndizo uzwithamile zina mu zwithu zwikulu ne zwinotjisa ngotatila kutjena zwitjaba kule ne bathu bawo ibo bawakadzutunula mu Egipiti kene? 22 Ngono bathu benyu Iziraela makabathama bathu benyu nge kusingapele, imwi Yahwe mukabe Ndzimu wabo.
23 “Ngono ngwenu Yahwe dama lenyu lamakaleba ngekwe nlanda wenyu ne ngekwe nsha uwe wamakabiga kuti unowogalila tjose lishingikadzeni sekwa makagadzabgwe. 24 Ndizo zina lenyu lowosimisiwa, likakudziwa nge kusingapele kose kunowodza kukayi ‘Yahwe Masimbawose, Ndzimu we Iziraela u Ndzimu we Iziraela,’ ngono nsha wa Dafite unowogalila tjose mbeli kwawo. 25 Ngobe imwi Ndzimu wangu makazumbunulila nlanda wenyu kuti ndimwi munowombakila ng'umba, ndizo nlanda wenyu alumbidzika kumutembezela. 26 Ngono imwi Yahwe, mu Ndzimu, makagadzabgwe nlanda wenyu zwithu izwezwi zwakanaka. 27 Ndizo ngwenu ngakumushathise kukombolela nsha we nlanda wenyu kuti ndizo utjilile tjatjose mbeli kwenyu ngobe imwi Yahwe tjamakombolela tjobe tjakombolelegwa tjatjose.”
© Kalanga Bible © Bible Society of Botswana, 2008, 2018.