1 Ihwani matama awa anolebgwa ndi Yahwe nge kwenyu, imwi bathu be Iziraela, imwi ludzi gose gwabakadusa mu shango ye Egipiti, 2 “Ndimwi moga bandakaziba mu misha yose ye shango, ndizo ndowomulobela zwibi zwenyu zose.”
Amosi unoleba ngekwe nshingo we nlebesambeli
3 Apa babili bangayenda bose
kuzhe kwe badumana kene?
4 Apa shumba ingabomba mu ishaka,
yamusa kene?
Apa shubana ingabomba mu zwimba
isakabhata tjimwe kene?
5 Apa nyuni ingabhatshigwa kusateiwa kene?
Apa dati lingalabhuka lisina tjalinobhata kene?
6 Apa lunyanga gungalila mu nzi nkulu bathu bakasitje kene?
Apa mbipo ingawila nzi nkulu isazhisiwa ndi Yahwe kene?
7 Tjoselele She Yahwe akuna tjimwe tjabangathama basazumbunulila balanda babo ibo balebesambeli.
8 Shumba yabomba, ndiyani usingake katja kene?
She Yahwe balebeleka, ndiani usingowolebesambeli kene?
Mbatsha dzakalingisana ne Samariya
9 Mimililani ku matizhilo e bushe gwe Ashidodi ne ku matizhilo e bushe gwe Egipiti, muti, “Kubunganani pezhugwi kwe matombo e Samariya, mubone phipiti hwulu imukati kwayo ne kutshambilidzana ku muili.
10 “Banokubunganyila thundu mu matizhilo abo dzabatola nge simba nenge bupitipiti. Abatoziba shinga tjakalulwama ibabo,” koleba Yahwe. 11 Ndizo She Yahwe bakati, “Tjita tjowokomba shango, ngono tjowomukulila, matizhilo enyu e bushe anowotapiwa.”
12 Yahwe banolebeleka bakati, “Nlisi unoti kazhwabula makumbo mabili, kene itibhu tje zebe mu nlomo we shumba, ndizo Baiziraela bamwe banogala mu Samariya banowotjidziwabo saikoko, bakabhata gwamu le bulawo kene le tjigalo tjinopobedzeka. 13 Ihwani ikoku, mutendeke ngekwe ng'umba ya Jakubo.” Koleba She Yahwe, Ndzimu Masimbawose. 14 “Mu zhuba landinowoloba Iziraela ngekwe zwibi zwizwe, ndowoloba zwibeso zwe zwibhayilo zwe Bhetele, nyanga dze tjibeso tjinopisigwa zwibhayilo dzowothubugwa dzikawila pasi. 15 Ndowokolomodza ng'umba dzenyu hwulu ne thumba dzenyu ne ng'umba dzenyu dzakanakisiwa nge nyanga dze zhowu dzowokolomogwabo.” Koleba Yahwe.
© Kalanga Bible © Bible Society of Botswana, 2008, 2018.