Debora na Baraki
1 Kwakati shule kwe lufu gwa Ehudi, Baiziraela bakathama mbipo kakale mu mesho a Yahwe. 2 Yahwe bakabatengesa mu maboko a Jabini mambo we Kanana wakabe e busa mu Hazori, nlauli we ngwa iye kwakabe kuli Sisera wakabe egala mu Haroshetihagoyimu. 3 Ipapo bathu be Iziraela bakalilila kuna Yahwe beshaka bhatsho ngoti wakabe ana koloyi dze ngwa dze butale dzili mazana ali zhanalume (900), etshambilidza Baiziraela kwakabipa kwe makole ali makumi mabili (20). 4 Mu tjibaka itjetjo nlebesambeli unoyi Debora ali nkadzi wa Lapidoti ndiye wakabe ali nsumikilisi we Iziraela. 5 Wakabe eti kagala kusi kwe nlala wa Debora pakati kwe Rama ne Bhetele mu shango ye matuthu ya Ifureimi, ngono Baiziraela bakabe beyenda kunli ku sumikilisiwa. 6 Katuma kuti kudang'we Baraki nkololo wa Abinoyamu we Kedeshi mu Nafutali, ngono kandwa kati, “Yahwe Ndzimu we Iziraela, banokudwa beti, ‘Yenda, utole balume bali zwiwulu zwili gumi (10 000) be ludzi gwa Nafutali ne gwa Zebuluni uyende nabo ku Dombo le Tabori. 7 Ndowokwebela Sisera nlauli we ngwa ya Jabini kukuli pa gwizwi gwe Khishoni kose ne koloyi dzidze dze ngwa ne babhayani babe, ngono ndowonlonga mu maboko awo.’ ” 8 Baraki kashandula eti, “Apa uyenda nami, ndowoyenda, koga apa usingayende nami, anditoyenda.” 9 Debora kadabila eti, “Kwakalulwama ndowoyenda nawe, koga nge zila yaunotobela, gudzo akutowobe lilo, ngoti Yahwe banowolonga Sisera mu maboko e nkadzi.” Ndizo Debora kamilika kayenda na Baraki ku Kedeshi, 10 Baraki kadana Zebuluni na Nafutali ku Kedeshi, Balume bali zwiwulu zwili zana (10 000) bakantobela, ngono Debora kayendabo naye. 11 Ndizo Heberi we N'keni wakabe azwithubukanya ne Bakeni, zwizekugwana zwa Hobabu tezwale ba Mushe, ngono wakabe athama nshasha uwe tjose kunoti ku nti we n'oko mu Zananimu hwunde ye Kedeshi. 12 Kwakati kubikigwa Sisera kuti Baraki nkololo wa Abinoyamu wayenda ku Dombo le Tabori, 13 Sisera kakubunganya koloyi dzidze dze ngwa dzose dzili mazana ali zhanalume (900) dze butale, ne balume bose bakabe banaye, kudwa ku Haroshetihagoyimu kunoti ku gwizi gwe Khishoni. 14 Ngono Debora kadwa Baraki kati, “Milika, ngoti ndilo zhuba Yahwe labalonga Sisera mu maboko awo. Apa Yahwe abazokutungamila kene?” Ndizo Baraki kadeluka Dombo le Tabori ne balume bali zwiwulu zwili gumi (10 000) bakansalashule. 15 Yahwe bakadzikunula Sisera ne koloyi dzidze dzose dze ngwa nge thumo mbeli kwa Baraki, ngono Sisera kadeluka mu koloyi iye ye ngwa katizha nge makumbo. 16 Baraki katatana ne koloyi dze ngwa ne babhayani kunoti ku Haroshetihagoyimu, ngono ngwa yose ya Sisera ikabulawa nge thumo, akuna nthu wakasala. 17 Koga Sisera katizha nge gumbo kanoti ku nshasha wa Jayeli nkadzi wa Heberi we N'keni, ngoti kwakabe kuna mbakiso pakati kwa Jabini mambo we Hazori ne be nsha wa Heberi we N'keni. 18 Ngono Jayeli kabhuda kashanganidza Sisera kandwa kati, “Pambukilani ngeno tetshi wangu, pambukilani kundili, musitje.” Ndizo kapambukila kunli kangina mu nshasha ngono kankwididza nge ngubo. 19 Sisera kandwa kati, “Ndokumbila vula, ndina nyota.” Nkadzi kazhula gukhwa le nkaka kan'mwisa, ngono kankwididza. 20 Sisera kandwa kati, “Ima pankoba we nshasha, apa nthu angazha ekubhuzwa eti, ‘Kuna nthu imomu?’ Uti, Aa.” 21 Koga Jayeli nkadzi wa Heberi katola lubambo gwe nshasha, kabhata hamuli nge luboko, kanyangila kalobela lubambo kusi kwe zebe gukanongina pasi atjilele akanyala. Ndizo kafa. 22 Ngono Baraki wakati akatatamila Sisera, Jayeli kabhuda kunonshanganidza ngono kandwa kati, “Buya ndikulakidze nlume waunoshaka.” Ndizo kangina mu nshasha uwe, ngono kabona Sisera akafa, ne lubambo gwe nshasha guli kusi kwe zebe iye. 23 Ndizo mu zhuba ilelo Ndzimu bakayesa pasi Jabini mambo we Kanana mbeli kwe Baiziraela. 24 Luboko gwe Baiziraela guka simila mbeli kwazo muna Jabini mambo we Bakanana, kuswikila bempaladza.
© Kalanga Bible © Bible Society of Botswana, 2008, 2018.