Bafarasi banoshaka tjilakidzo kuna Jesu
(Mako 8:11-13Luke 12:54-56)1 Gupo le Bafarasi ne Basadusi lakazha kuna Jesu ngon'lalila benkumbila kuti abalakidze tjilakidzo tjinodwa kudzimu. 2 Kabadabila eti, “Ha kuli madekwana makole ali mashaba moti, ‘Kowomuka kwakalulwama,’ 3 kakale ha zhuba libhuda moti, ‘Nasi kowobe matutu, ngobe zhuzhugwi ishaba lina makole matema.’ Moziba kutjenesa kulingika kwe makole, koga musingazibe kutjenesa zwilakidzilo zwe misi. 4 Bana bangwenu babi basingagalikebgwe nge Ndzimu banoshaka tjilakidzo, koga akuna tjilakidzo tjabanowopiwa kuzhe kwe tjilakidzo tja Jona.”
Ipapo Jesu kabasiya kayenda.
Mbidzo ye Bafarasi ne Basadusi
(Mako 8:14-21)5 Kukati badiyiwa beswika seli kwe gungwa, bakabe bakangang'wa kusenga tjiwunga. 6 Jesu kati ku bali, “Lingani mube ne njele ngekwe mbidzo ye Bafarasi ne ye Basadusi.”
7 Bakalebeleka tje kwabo beti, “Akuna tjiwunga tjatazha natjo.”
8 Jesu kaziba tjabanoalakana ndizo kababhuzwa kati, “Bathu be kugalamoyo kutukununu ndimwi, ini mulebeleka tje kwenyu ngekwe kuti amuna tjiwunga? 9 Apa amuthu mukahwisisa zwenyu kene? Amutoalakana zwiwunga zwishanu zwakajiwa nge bali zwiwulu zwishanu (5 000) ne kuti makazhadza seme dzili ngana? 10 Kene zwiwunga zwili tendeka zwakajiwa nge bali zwiwulu zwinna (4 000) ne kuti makazhadza seme dzili ngana? 11 Ini musingahwisise kuti imi ndabe ndisingalebeleke namwi ngekwe tjiwunga? Koga ibeni nge njele ngekwe mbidzo ye Bafarasi ne Basadusi.”
12 Ipapo bakahwisisa kuti aatodwa kuti batjenjelele mbidzo ye tjiwunga, koga kuti babe ne njele ngekwe zwidiyo zwe Bafarasi ne Basadusi.
Pita unoleba kuti Jesu ndiye ani
(Mako 8:27-30Luke 9:18-21)13 Kukati Jesu ezha mu ntuthu we Sizariya Filipi kabhuzwa badiyiwa babe kati, “Bathu banoti Nkololo we Nthu ndiye ani?”
14 Bakashandula beti, “Bamwe banoti ndi Johani we N'dubiki, bamwe banoti ndi Elija, koga bamwe banoti ndi Jeremiya kene mmwe we balebesambeli.”
15 Kababhuzwa kati, “Koga imwi moti ndimi ani?”
16 Simoni Pita kashandula eti, “Ndimwi Mesiya, Nkololo we Ndzimu unotjila.”
17 Jesu kadabila kati, “Wakakombolegwa Simoni Nkololo wa Jona, ngobe oku auzokuzumbunuligwa nge nthu koga wakazumbunuligwa ndi Tate bangu ba kudzimu. 18 Kakale ndokubudza kuti ndiwe Pita, ngono pezhugwi kwe shongwe iyeyi, ndowobaka gubungano langu, ngono masimba e lufu atowolikunda. 19 Ndowokupa khiyi dze bushe gwe kudzimu, tjimwe ne tjimwe tjawasunga mu shango tjowosungwa kudzimu ne tjimwe ne tjimwe tjawasunungula mu shango tjowosunungugwa kudzimu.”
20 Ipapo kadwa badiyiwa babe akasimisa kuti bashete wabanobudza kuti ndiye Mesiya.
Jesu unoleba ngekwe kudziyidziwa kukwe nenge lufu gugwe
(Mako 8:31—9:1Luke 9:22-27)21 Kudwa mu tjibaka itjetjo Jesu katangisa kulakidza badiyiwa babe kuti wakafanilo yenda ku Jerusalema, ngono adziyidziwe nge zwinjinji mu maboko e bakulu* ne bapirisiti banolaula ne badiyi be nlayo ne kuti wakafanila kubulawa, ngono mu zhuba le butatu amusiwe.
22 Pita kantolela ntome, katangisa kuntjemela eti kunli, “Akungajalo She! Zwithu izwezwi azwitowo mushingikalila!”
23 Jesu katjebuka kati kuna Pita, “Idwa pandili Satani! Utjidzibilidzi kundili, ngobe autoalakana zwithu zwe Ndzimu, unoalakana zwithu zwe bathu koga.”
24 Ipapo Jesu kati ku badiyiwa babe, “Ha mmwe enditobela, ngaazwilandule, atole tjileyanyo tjitje anditobele. 25 Ngobe iye unoshaka kuzwitjidza, butjilo gugwe gowonlashikila, koga iye unowolashikigwa nge butjilo gugwe nge kwangu, unowoguwana. 26 Kobuzilani kuti nthu athuwe shango yose koga atjinyikigwe nge meya iye. Apa nthu ungatetshanya butjilo gugwe ngeni kene? 27 Ngobe Nkololo we Nthu unowozha nge gudzo la Tate babe, ana batumwa babe be kudzimu ngono ipapo unowolipa nthu mmwe ne mmwe muna tjaakathama. 28 Ndolebesa ndoti kumuli, kuna bamwe bamile ipapa banowobona kuzha kwe Nkololo we nthu mu Bushe gugwe, basathu bakafa.”
© Kalanga Bible © Bible Society of Botswana, 2008, 2018.