Vula yakadwa mu shongwe
(Mbalo 20:1-13)1 Gubungano lose le Iziraela likadwilidza gwendo kudwa mu tjilambanyika tje Sini liyenda linyaluluka kuyendidzana nge nlayo wa Yahwe, ngono likanokotokela mu Refidimu; koga kwakabe kusina vula inong'wiwa ne bathu. 2 Ndizo bathu bakatilika nlandu muna Mushe, ngono bakandwa bakati, “Utipe vula ting'we.” Mushe iye kabashandula eti, “Ini munditilika nlandu? Ini mulika Yahwe?”
3 Koga bathu bakabhakhwa nge nyota bakang'ong'ola muna Mushe bakati kunli, “Wakatidusilani mu Egipiti, kowotibulaya nge nyota iswi ne bana bedu ne zwithuwo zwedu kene?”
4 Ipapo Mushe kalilila kuna Yahwe kati, “Ndingashingani nge bathu ibaba? Bapejo nge kundikikithidza nge mabgwe.”
5 Ngono Yahwe bakadwa Mushe bakati, “Pindila mbeli kwe bathu, utole bamwe be bakulu be Iziraela; utole ludozo gugo gwawakalobesa gwizi gwe Naili uyende. 6 Bona! Ndowoma mbeli kuko apaje pezhugwi kwe shongwe ku Horebu, ube uloba shongwe iyeyo, ngono vula inowobhuda muili kuti bathu bang'we.” Ngono Mushe kathama saikoko mu mesho e bakulu be Iziraela.
7 Ngono kapatumila zina eti Masa na Meriba, ngobe bana be Iziraela bakan'wana nlandu, kakale bakalika Yahwe beti, “Apa Yahwe banaswi kene?”
Baamaleki banokundiwa
8 Ndizo Baamaleki bakazha bakagwa ne Baiziraela ku Refidimu. 9 Mushe kadwa Joshuwa kati, “Shalula bamwe bedu uyende unogwa na Amaleki; mangwana imi ndowoyenda anoma pezhugwi kwe dombo ndakabhata ludozo gwe Ndzimu nge luboko gwangu.” 10 Ndizo Joshuwa kathama sekwa adwiwa ndi Mushe kagwa ne Baamaleki. Mushe na Aroni na Huri bakatathila pezhugwi kwe dombo. 11 Mushe wakabe eti ha akamilidza maboko awe, Baiziraela bekunda, koga ha eliga maboko awe Baamaleki bekunda. 12 Maboko a Mushe kapelela anyala, ndizo bakatola bgwe bakabiga panli ngono kaligala Aroni kabhata luboko gumwe gwa Mushe, Huri kabhata gumwe ngono maboko awe kadzikama kudzina zhuba lingina. 13 Ndizo Joshuwa kakunda Amaleki ne bathu babe kabatemelela nge bukanu.
14 Ngono Yahwe bakadwa Mushe bakati, “Kwala ikoku mu lukwalo kube ikumbuludzo ukubalile Joshuwa ngoti ndowothama kuti Amaleki asitongo kumbugwa pasi kwe ntutshi we shango.” 15 Mushe kabaka tjibeso tjinopisigwa zwibhayilo katjidana zina kati, “Yahwe ndibo nkundi.” 16 Edwa kuti, “maboko akabe amilidzigwa ku tjigalo tje bushe tja Yahwe! Yahwe banowogwa na Amaleki kudwa mu tjizekugwana kuyenda ku tjizekugwana.”
© Kalanga Bible © Bible Society of Botswana, 2008, 2018.