Zina dzwa le Ziyoni
1 Ngekwe Ziyoni andinganyalale,
ngekwe Jerusalema, ndowolebeleka,
kuswikila ndulamo yayo ipenya se tjedza tje kuyedza,
jidzo layo liboneka se luvone.
2 Zwitjaba zowobona ndulamo yenyu,
na bomambo bose banowobona gudzo lenyu.
Mowodang'wa nge zina dzwa lamunopiwa ndi Yahwe.
3 Mowobe tjiala tje bubuya mu luboko gwa Yahwe,
hwutshe ye bushe mu luboko gwe Ndzimu wenyu.
4 Amungabe mutjadang'wa Balambiwa,
kene mudana shango yenyu Dukuthuku.
Koga unowodang'wa kuyi Hefitsiba,
shango yenyu iyo inowodang'wa Bheula,
ngoti Yahwe banowomushathila,
shango yenyu inowolobogwa,
5 se nzhuzha elobola mwanadi,
saikoko bakololo babo banowokulobola,
se nloboli eshathila nlongo uwe,
saikoko Ndzimu wenyu unowomushathila.
6 Jerusalema, ndabiga balindi pezhugwi kwe guma lilo,
abanganyalale siku ne sikati.
Imwi banokumbula Yahwe musinyalale,
7 musitongoletja bakanyaluluka
kuswikila bebuzila Jerusalema mu tjimo
babuye baithame kukudziwa kwe shango.
8 Yahwe bakatuna nge tjiazha tjabo tje luji
nenge luboko gwabo gwakasima beti,
“Anditjawopapha kakale apa zwita zwenyu
mathunde enyu kube zojiwa zwabo,
naiko bataya abatjawong'wa kakale nkumbi we zhambi wamakashingila,
9 koga ibabo banotjela zhambi banodzija bakakudza Yahwe,
banotjela zhambi banowong'wa nkumbi wadzo,
mu misha ye bugalo gwangu gwakayengemala.”
10 Bhudani nge mikoba, bhudani nge mikoba!
Lulwamisilani bathu zila. Zhulani zila!
Muzhule zila phabi muduse mabgwe.
Milidzilani zwitjaba tjilakidzo.
11 Yahwe bakazibisa midzibo yose ye shango beti,
“Budzani nkololokadzi we Ziyoni muti,
‘Bona, Ntjidzi uwo unozha. Mbhayilo uwe unawo,
ne mbuzilo iye wakaisenga.’ ”
12 Banowodang'wa Bathu Bakayengemala,
Bakadzutunugwa ba Yahwe,
mowodang'wa Bakashakwa,
Nzi Nkulu Usinga Tjawolambiwa.
© Kalanga Bible © Bible Society of Botswana, 2008, 2018.