Hezekiya unothama nshingo we Ndzimu
1 Ngono kwakati kose ikoku kwawila, bathu bose be Iziraela bakabe bakakubungana bakapalala bakayenda ku mizi ye Juda ngono bakaswika bepkhwanya phanda dzakabe dzakathang'wa nge mabgwe bakatemelela zwifano zwe ndzimukadzi Ashera. Bakakolomola magalo a pezhugwi ne zwifano mu Juda yose ne Bhenjamini ne mu Ifureimi ne mu Manase. Bakati basinokolomola kose ikoku Baiziraela bakabgwilila ku mizi yabo neku thundu dzabo.
2 Hezekiya wakabiga makupo e bapirisiti ne e Balevi gupo ne gupo limwe ne limwe nge nshingo walo. Mishingo yakabe ili yekupisa zwibhayilo ne kudusa zwibhayilo zwe mbakisano ne kushinga ku mikoba ye Ng'umba ya Yahwe ne kukudza ne kumbila Yahwe. 3 Zwipo zwakadusiwa ndi mambo kudwa mu danga labo zwibhayilo zwinopisiwa zwe mangwanana ne madekwana ne zwibhayilo zwe mazhuba e kunyaluluka a bo Sabata ne zwe Mwedzi ugala zwe mizano yakabigwa ngothubukana kwayo sekwa kwakakwagwa mu nlayo wa Yahwe.
4 Pezhugwi kwa ikoku mambo bakadwa bathu bakabe begala mu Jerusalema kuti bape bapirisiti ne Balevi gobe lakabalingisana kuti ndizo ibo balingisane nge nlayo wa Yahwe koga. 5 Kwakati koga ndaulo isinobe yabhuda, bathu be Iziraela bakadusa zwe kutanga zwe mathunde ne nkumbi we zhambi ne mafuta ne butji gwe nyutji na zose zwabakabe balima, zose izwezwi bakazwidusa nge mimoyo mitjena bedusa zwe bugumi mu tjimwe ne tjimwe tjazo. 6 Bathu be Iziraela ne be Juda bakabe begala mu mizi mikulu ye Juda bakadusa bo zwe bugumi zwe ng'ombe ne pkhwizi ne mbudzi ne zwe bugumi zwe zwithu zwakayengemala zwakapiwa Yahwe Ndzimu wabo, bakazwitiliyanya zwikabe duluthulu. 7 Mu mwedzi we butatu bakatangisa kubutitika zwipo zwabo, bakapedza mu mwedzi we kutendeka 8 Ngono kwakati Hezekiya ne makulukota bazha kuwobona mibumba ye zwipo bakakudza Yahwe kakale bakakombolela bathu babo e Baiziraela. 9 Hezekiya kabhuzwisisa bapirisiti ne Balevi ngekwe mibumba ye zwipo, 10 koga Azariya mpirisiti nkulu wakabe ali we nsha wa Zadoki kadabila mambo eti, “Tjinga kwabakatangisa kuzhisa zwipo ku Ng'umba ya Yahwe toja tikaguta kukasala kunji ngobe Yahwe bakakombolela bathu babo ndizo tinakungapa kwakasala.”
11 Ipapo Hezekiya kabadwa kuti balulwamise ng'umbana dzimu mu Ng'umba ya Yahwe ngono bakadzilulwamisa. 12 Bakazhisa zwipo zwabo ne zwe bugumi ne zwija zwakapiwa Ndzimu bakazwizhisa nge mimoyo mitjena. Konaniya we Nlevi ndiye wakabe akalingisana ne zwithu izwezwi ana nnung'una uwe Shimeyi wakabe entobela nge mamo. 13 Jehiele na Azaziya na Nahati na Asaheli na Jerimoti na Jozabadi na Elieli na Isimakiya na Mahati na Bhenaya bakabe beshinga bali pasi kwa Konaniya na Shimeyi bashalugwa ndi Mambo Hezekiya na Azariya mpirisiti nkulu wakabe akalingisana ne Ng'umba ye Ndzimu. 14 Kore nkololo wa Imina we Nlevi, nlindi we nkoba we ku bhezhuba iye wakabe ali ntungamili muna zwe kuamutjila zwipo zwe moyo ntjena zwadusigwa Ndzimu, kakale ekoba zwipo zwinobe zwakabigigwa Yahwe ne zwipo zwakayengemala kupinda. 15 Edeni na Miniyamini na Jeshuwa na Shemaya na Amariya na Shekaniya bakabe bembhatsha nge moyo nlefu mu mizi mikulu ye bapirisiti kukobela bakanyi kwabo, bekobela bahwola ne batjetjana ngolizana koga kuyenda ngothubukanyiwa kwabo. 16 Kwakabe kusinga baligwe ibabo bakakwalisiwa kuyenda ne njudzi dzabo balume bose be makole anodwa mu butatu kuyenda pezhugwi, bose bakabe bengina mu Ng'umba ya Yahwe koga sekwa kwakabe kushakika mu nshingo we zhuba limwe ne limwe, ngobe uli nshingo wabo kuyenda ne pa banoshinga. 17 Bapirisiti bakabe bakakwalisiwa kuyenda ne misha ya botate babo, Balevi ibo bakabe bekwalisiwa kudwa mu makole ali makumi mabili (20) kene kupinda ibo bakabe bakakwalisiwa kuyenda ne pa banoshinga. 18 Bose bakabe bakakwalisiwa kushangana ne bakadzi babo nenge bana babo na bose babanotjengeta ngobe bakabe begala bezwiyengemadza. 19 Ngono bapirisiti izo zwizekugwana zwa Aroni bakabe begala mu mizi mikulu ne mizana yakapoteleka ne mafulilo ayo kwakabe kuna balume bakalingisana kukoba zojiwa ku bamwe bose be misha ye bupirisiti ne bamwe bose bakabe bakakwalisiwa pasi kwe Balevi.
20 Ikoku kose ndiko kwakathamwa ndi Hezekiya mu Juda yose, ngono wakathama bubuya ne ndulamo ne kugalikabgwe mbeli kwa Yahwe Ndzimu uwe. 21 Nshingo mmwe ne mmwe waakathama we Ng'umba ye Ndzimu kuyendidzana ne nlayo, eshaka Ndzimu uwe, wakathama nge moyo uwe wose ngono kabhudilila.
© Kalanga Bible © Bible Society of Botswana, 2008, 2018.