1 “Mu tjibaka tjetjo, koleba Yahwe, mafupa a bomambo be Juda ne mafupa e makulukota abo ne mafupa e bapirisiti ne mafupa e balebesambeli ne mafupa e bagali be Jerusalema anowodusiwa mu zwikumbu zwabo, 2 ngono anowopaladziwa mu zhuba ne mwedzi ne mu zwedza zose zwe zhuzhugwi izo zwabakada ne kuzwishingila, izo zwabakatobela izo zwabashaka bakazwinamata. Abatowokubunganyiwa kene kubiganyiwa, banowosala benga nthudze mu nnda. 3 Koga malimbelimbe anowobe asala ebe lutshinga igogu gu biibi banowoyemula lufu pa butjilo mu magalo wose andinowobe ndabatatila ku ali, kojalo Yahwe Masimbawose.
Tjibi ne kulobgwa shamu
4 “Ubadwe uti, Yahwe bakati,
Apa bathu ha bewa abatomuka kene?
Ha mmwe epambuka mu zila, apa atoshanduka kene?
5 Ini ngono bathu ibaba bakapambuka?
Ini bakadwilila ngopambukila mbeli kene?
Bakabhatilila mu butjebeli,
banolamba kushanduka.
6 Ndakateedza kwazo,
koga akuna tjabanoleba tjakalulwama.
Akuna unoshandukila bubi gugwe
eti, ‘Ndakathamani?’
Mmwe ne mmwe unodwilila nge zila iye
se mbizi yakashingayilila kugwa.
7 Ne hanganlobe dumbu ye zhuzhugwi
inoziba tjibaka tjayo ne njiba ne nyenganyenga ne twiyitwiyi
dzotjengeta tjibaka tjadzo,
koga bathu bangu abatoziba
nlayo wa Yahwe.

8 “Ini mungati, ‘Takatjenjela,
ne nlayo wa Yahwe tinawo’?
Koga bonani pena ye manyepkhwa ye bakwali
yakuthama manyepkhwa.
9 Balume bakatjenjela banowobhatisiwa shoni,
banowotemeka mafupa bakatogwa,
ngoti bakalasha dama la Yahwe,
ngono bana butjenjedu gupi mu bali?
10 Ndizo ndowokobela bakadzi babo bamwe balume,
ne minda dzabo bobatetshi batshwa,
ngoti kudwa ku ntukunu kunoti ku nkulukulu
mmwe ne mmwe i govu le kuzwiwanigwa tjisakalulwama,
kudwa mu nlebesambeli kunoti ku mpirisiti,
mmwe ne mmwe unothama butjebeli.
11 Bakabangayidza kupodza mabanga e bathu bangu,
beti, ‘Kunyalala, kunyalala,’
koga kunyalala kusipo.
12 Apa bakabe bebhakhwa nge shoni abethama zwinoshimisa?
Aa, bakabe basina shoni ndodwa,
bakabe basina hanya.
Ndizoke banowowa ne banowa,
andibaloba shamu, banowoligwa,
koleba Yahwe.

13 “Ndowokubunganya, koleba Yahwe,
akutobe ne zhambi mu mizhambi,
kene kukabe ne phaya mu mipaya,
kose ne mazhani anowobuna,
tjandakabe ndabapa banowotjitolegwa.”

14 Ini tiligele takadzikama kene?
Kubunganani, ngati tizhileni ku mizi ye matizhilo tinofila ko
ngoti Yahwe Ndzimu wedu babhayana naswi kutilobesa,
batipa vula inobulaya kuti ting'we,
ngoti takatjinyila Yahwe.
15 Takashaka kunyalala ngono akuna tjibuya tjakazha,
nge tjibaka tjekupodza bonani, kwazha zogwadza.

16 Bundula kwe mbizi dzabo kohwika kudwa mu Dani,
nsindo we kulilila kwe mbizi ndume,
shango yose inotetema.
Dzazha kuwoja
shango ne tjimwe ne tjimwe tjimuili,
nzi nkulu nabose banogala muuli.

17 Ngoti bonani, ndotumila nyoka pakati kwenyu,
thumbi dzisina ungadziangulanya,
ngono dzowomuluma,
Koleba Yahwe.
18 Buyendasi gwangu gukule ne kunyaladzika,
moyo wangu unotimbama.
19 Teedzani tjililo tje bathu bangu,
kudwa ku shango ikulekule:
“Apa Yahwe abate bali mu Ziyoni kene,
apa Mambo wayo ate ali muili kene?”

“Ini bakanditanga kuti ndizhale bushongola ngekwe midzimu
yabo yakabezhiwa ne midzimu yabo ipoga kene?”

20 “Kuvuna kwapinda,
tjilimo tjapela,
ngono atizotjidziwa.”

21 Ngoti mabanga e nkololokadzi we bathu bangu,
buyendasi gwangu,
ndolila, temeka mafupa kwakandiambala.

22 Apa akuna nti mu Giliyadi kene?
Apa akuna ng'anga ko kene?
Ngono ini mamuko e nkololokadzi we bathu,
asathu kapodziwa kene?