Bhuzo ngekwe Sabata
(Mako 2:23-28Luke 6:1-5)1 Mu tjibaka itjetjo Jesu kapalama minda mu zhuba le Sabata. Badiyiwa babe bakabe bana zhala ndizo bakatangisa kumwaula zwiyako mu nnda kuti baje. 2 Bafarasi bakati bebona ikoku bakati kunli, “Bona! Badiyiwa babo banothama tjisimu nlayo nge zhuba le Sabata.”
3 Kati ku bali, “Amuzobala kuti Dafite ne baakabe anabo bakati bakathamani bana zhala kene? 4 Wakangina mu Ng'umba ye Ndzimu, ngono iye ne baakabe anabo bakaja zwiwunga zwinopiwa Ndzimu, koga nge nlayo zwakabe zwili zwiwunga zwe bapirisiti koga. 5 Amuzobala mu nlayo kuti mu zhuba le Sabata bapirisiti banoshinga mu Ng'umba ye Ndzimu banotjuluka nlayo we zhuba le Sabata, koga bakabe basina nlandu kene? 6 Ndomubudza kuti iye nkulu pa Ng'umba ye Ndzimu upano. 7 Ha mabe makaziba kuti matama iyawa anodwani anoti, ‘Ndoshaka mahwilo zogwadza, kusi tjibhayilo,’ mobe musakabona nlandu basina nlandu. 8 Ngobe Nkololo we Nthu ndi She we Sabata.”
Nlume una luboko gwakashweshwana
(Mako 3:1-6Luke 6:6-11)9 Wakayendila mbeli kudwa ipapo, ngono kangina mu ng'umba yabo ye mitembezelo. 10 Ipapo kwakabe kuna nlume una luboko gwakashweshwana. Kwakabe kuna bathu bakabe beshaka tjimwe tjabangabona Jesu nlandu nditjo, ngono bakabhuzwa Jesu bakati, “Apa kumu nlayo kupodza nge zhuba le Sabata kene?”
11 Kati ku bali, “Apa ndiupi wenyu ungati ana pkhwizi ing'ompela yawila mu gomba nge Sabata, kasiyiduse kene? 12 Ngono nthu iye unopinda pkhwizi kungapani kene! Ndizo kumu nlayo kuyita ndulamo nge zhuba le Sabata.” 13 Ipapo kati ku nlume iwoyo, “Tambunudza luboko gugo.”
Ndizo nlume iwoyo kagutambunudza gukapola tjose gukafanana ne gumwe. 14 Koga Bafarasi bakabhuda bakanolangana sekwa bangabulaya Jesu.
Nlanda wakashalugwa we Ndzimu
15 Jesu wakabe abona tjabanoshaka thama ngono, kabhuda mu magalo iyawo. Banjinji bakantobela, ngono kabapodza bose, 16 kakowomedza kuti bashaye wababudza kuti ndiye ani. 17 Oku kwakabe kuli kuti kushingikale matama akalebgwa nge nlebesambeli Isaya eti,
18 “Hwoyu nlanda wangu wandakashalula,
iye wandinoda, wandinoshatha munli.
Ndowodelusila Meya yangu munli,
ngono unowozibisa nge kwe ndulamo muna Bezwitjaba.
19 Aatokakabadzana ne nthu kene kulonga zhoba,
akuna unowohwa hwi lile mu dzizila.
20 Lushanga gwakakombama aatoguvuna,
ne luvone gunothungayila aatowogudzima,
kudzina etungamilila ndulamo mu kukunda.
21 Bezwitjaba banowogalabgwe munli.”
Jesu na Bheelizebhuli
(Mako 3:20-30Luke 11:14-23)22 Ipapo bakazhisa kunli nlume wakabe akasungwa nge meya mbi ali bhofu kakale ali mbebebe, ngono Jesu kampodza, ndizo kalebeleka kakale kabona. 23 Bathu bose bakatjenama kwazo bakati, “Apa ungabe ali Nkololo wa Dafite iwoyu kene?”
24 Ngono Bafarasi bakati behwa ikoku bakati, “Nlume iwoyu unotata meya mibi ndi Bheelizebhuli koga, iye she we meya mibi.”
25 Jesu ngekuziba mikumbulo yabo kati ku bali, “Bushe gumwe ne gumwe gwakazwithubukanya gowokolomoka, kakale akuna nzi kene nsha wakazwithubukanya inowobakika. 26 Satani ha etata Satani, wakathubukana nge kukwe, bushe gugwe gungasima tjini kene? 27 Ngono ha kuli kuti ndodusa meya mibi na Bheelizebhuli, bakololo benyu ibo banoidusa nayani? Ndizoke, banowobe basumikilisi benyu. 28 Koga ha kuli kuti ndodusa meya mibi nge Meya ye Ndzimu, ipapo bushe gwe Ndzimu gwatjiswika mu muli.
29 “Kene, apa nthu ungangina mu ng'umba ye nlume wakasima tjini katapa thundu iye asasunga iwoyo nlume wakasima kutanga? Ipapo ekotapa ng'umba iye.
30 “Iye usimile nami unonyanyayidzana nami, na iye usingakubunganye nami, unopaladza. 31 Ndizo ndomubudza nditi, jinyo limwe ne limwe ne kutuka Ndzimu kwe bathu kowozwiibhatigwa, koga kutuka Meya yakayengemala aatokuzwiibhatigwa. 32 Iye unonyanyayidza Nkololo we Nthu, unowozwiibhatigwa, koga iye unonyanyayidza Meya yakayengemala aatowozwiibhatigwa, mu misi iyeyo kene mu misi inozha.
Nti ne ntjelo wawo
(Luke 6:43-45)33 “Itani kuti nti ululwame, ngono zwizwalo zwawo zowolulwamabo, kene itani nti kuti ubipe zwizwalo zwawo zwobipabo, ngobe nti unozibgwa nge zwizwalo zwawo. 34 Bana be nyoka ndimwi! Mungati muli babi mukaleba tjakalulwama tjini? Nlomo unoleba tjizhele mu moyo. 35 Nthu wakalulwama unodusa bubuya mu fumwa iye yakanaka ne nthu wakabipa unodusa bubi mu fumwa iye yakabipa.
36 “Koga ndomubudza nditi, bathu banowobe ne kuzwidabiligwa mu zhuba le kusumikilisiwa mu dama limwe ne limwe le butjapa labakaleba. 37 Ngobe mowolulwamisiwa nge matama enyu kakale mukabong'wa nlandu nge matama enyu.”
Banoshaka tjilakidzo kuna Jesu
(Mako 8:11-12Luke 11:29-32)38 Ipapo bamwe be Bafarasi ne badiyi be nlayo bakati kunli, “N'diyi, toshaka kubona tjilakidzo tjinodwa kumuli.”
39 Jesu kabadabila kati, “Bathu ndimwi bangwenu babiibi kakale musingagagwebgwe nge Ndzimu moshaka tjilakidzo, ngono akuna tjilakidzo tjamunowopiwa kuzhe kwe tjilakidzo tje nlebesambeli Jona. 40 Koga sa Jona akabe mu ntumbu we hwobe hwulu mazhuba matatu ne masiku matatu, sa ikoko Nkololo we Nthu unowobe mu ikumbu mazhuba matatu ne masiku matatu. 41 Balume be Ninive banowomuka ne bathu ibaba bangwenu mu nsi we kusumikilisiwa, bakababona nlandu, ngobe ibo bakashandukila matjinyo abo pa kusumikila kwa Jona, ngono ngwenu bonani, iye nkulu pana Jona upano. 42 Nfumakadzi we burwa unowoma ne bathu ibaba bangwenu mu zhuba le kusumikilisiwa, ngono kababona nlandu, ngobe wakazha edwa ku phelelo dze shango kuwohwilila butjenjedu gwa Solomoni, ngono bonani, iye nkulu pana Solomoni upano.
Kushanduka kwe meya mbi
(Luke 11:24-26)43 “Ha meya mbi ibhuda mu nthu, inopinda mu magalo akawoma ishaka kunyaluluka, koga isingakuwane. 44 Ipapo unoti, ‘Ndowobgwilila ku ng'umba yangu yandakadwa muili.’ Ha iswika, inowana ng'umba iyeyo isina mmwe umuili, yakatshwayigwa, kakale yakabiganyika. 45 Ipapo inowoyenda ikanotola meya mimwe ili kutendeka mibi kuupinda, ngono ibe ingina igala mukati. Ngono tjimo tje nthu iwoyo tje bupelo tjokobipa kupinda tje kutanga. Ndiko sekwa kunowobe iko nge bathu bangwenu bakabipa.”
Mme ba Jesu ne banung'una babe
(Mako 3:31-35Luke 8:19-21)46 Jesu kati atjalebeleka ne bathu, mmeyabe ne banung'una babe bakama kuzhe, bekumbila lebeleka naye. 47 Mmwe kabudza Jesu kati, “Mmeyabo ne banung'una babo bamile pazhe banokumbila lebeleka nawe.”
48 Kadabila nlume wambudza kati, “Mmeyangu ndiani ne banung'una bangu ndiboani?” 49 Katendeka badiyiwa babe ngono kati, “Aba ndibo mmeyangu ne banung'una bangu. 50 Iye unoshinga kuda kwa Tate bangu ba kudzimu ndiye nnung'una wangu ne hazwadzi yangu na mmeyangu.”
© Kalanga Bible © Bible Society of Botswana, 2008, 2018.