Nlume wakabe ana luboko gwakashweshwana
(Matewu 12:9-14Luke 6:6-11)1 Mu tjimwe tjibaka Jesu kangina mu Ng'umba ye Ntembezelo, ngono kukabe kuna nlume una luboko gwakashweshwana mukati. 2 Bamwe be bathu bakabe bali imomo bakabe beshaka tjimwe tjabangabona Jesu nlandu nditjo, bakanlinga nge njele kubona kene unowompodza nge nsi we Sabata. 3 Jesu kadwa nlume una luboko gwakashweshwana kati, “Izha ngeno.” 4 Ipapo kabhuzwa gubungano kati, “Apa kumu nlayo nge nsi we Sabata kushinga ndulamo kene kushinga mbipo, kutjengeta butjilo kene kubulaya?”
Ngono bakanyalala koga. 5 Kabalinga kupoteleka akagwadzamoyo, ehwisiwa zogwadza nge mimoyo yabo mikukutu, ngono kadwa nlume iwoyo kati, “Tambunudza luboko gugo.” Katambunudza luboko gugwe, ngono gukapola. 6 Ipapo Bafarasi bakabhudila kuzhe, bakatangisa kulangana ne Batobeli ba Herode kuti bangambulaya tjini.
Mbunga we bathu pa gungwa
7 Jesu kayenda ku gungwa ne badiyiwa babe, ngono mbunga nkulu we bathu unodwa ku Galili ukantobela. 8 Bathu banjinji bakati behwa kose kwaakabe ethama, bakazha kunli bedwa ku Judiya ne ku Jerusalema ne ku Idumeya ne ku ntuthu useli kwe Jorodani na pejo ne mizi mikulu ye Tire ne Sidoni. 9 Jesu kadwa badiyiwa babe kati banzhisile n'goro, ngobe bathu bakabe bali banjinji kwabakabe bangantshamba. 10 Wakabe apodza bali banjinji, ndizo bose bakabe begwalabo, bakabe besundila mbeli kuti bambhate. 11 Meya mibi yakabe iti koga imbona, iwila pasi mbeli kukwe imimila iti, “U Nkololo we Ndzimu.”
12 Koga wakabe eitjemela akasimisa, kuti isilebe kuti ndiye ani.
Jesu unoshalula bali gumi lina babili
(Matewu 10:1-4Luke 6:12-16)13 Jesu kabe etatha dombo, ngono kadana baanoshaka, ndizo bakayenda kunli. 14 Kashalula bali gumi lina babili kabadana kati “Batumwa” kuti babe naye nenge kuti abatume kunosumikila 15 nenge kube ne ndaulo ye kudusa meya mibi.
16 Aba ndibo bali gumi lina babili baakashalula, Simoni, iye waakatumila zina kati Pita. 17 Jakubo nkololo wa Zebhedi ne nnung'una uwe we tjilume Johani ibo baakatumila zina eti Bhoanegesi, kunodwa kuti “Bakololo be dadamula kwe vula,” 18 na Enduru na Filipo na Bhatolomeo na Matewu na Tomasi na Jakubo nkololo wa Alifeo na Tadeo na Simoni Nzeloti 19 na Judasi Isikariyoti iye wakawonga Jesu.
Jesu na Bheelizebhuli
(Matewu 12:22-32Luke 11:14-23Luke 12:10)20 Ipapo Jesu kangina mu ng'umba, ngono kakale mbunga we bathu ukakubungana kukadza kukati iye ne badiyiwa babe bakasitubule kuja. 21 Be nsha uwe bakati behwa ikoku bakayenda beti banonontola, ngobe kwakabe kuyi, “Unopenga!”
22 Badiyi be nlayo bakabe bedwa ku Jerusalema bakati, “Wakasungwa ndi Bheelizebhuli, Unoshingisa she we meya mibi kudusa meya mibi.”
23 Ndizo Jesu kabadana, ngono kalebeleka nabo nge zwifaniso eti, “Satani ungadusa Satani tjini wali? 24 Ha bushe gwakathubukana kakale gugwa tjekwago, bushe igogo agungadwilile. 25 Ha nsha wakathubukana nge kwawo, ugwa, nsha iwoyo aungadwilile. 26 Satani ha ezwipandukila, akathubukana, aangadwilile. Loba kukwe kobe kwatjiswika.
27 “Dumbu akuna nthu ungangina mu ng'umba ye nlume wakasima katola thundu iye asasunga mweni we ng'umba kutanga, kuti ndizo ekotapa thundu iye.
28 “Ndomubudza tjose ati, Ndzimu unowobazwiibhatigwa matjinyo abo wose ne masapa abanotuka Ndzimu ndiwo. 29 Koga iye unotuka Meya yakayengemala, Ndzimu autowonzwiibhatigwa, koga una jinyo lisingapele.” 30 Wakabe elebeswa ikoku nge matama abo abakabe beti, “Una meya mbi.”
Mme ba Jesu ne banung'una babe
(Matewu 12:46-50Luke 8:19-21)31 Ipapo kukaswika mmeyabe ne banung'una babe. Bakama kuzhe bakatuma mmwe kunodana Jesu mukati. 32 Mbunga we bathu wakabe uli gele pasi wakampoteleka, wakati kunli, “Mmeyabo ne banung'una babo bakuzhe banokushaka.”
33 Kabadabila eti, “Mmeyangu ne banung'una bangu ndiboani kene?” 34 Kati eijalo, kalinga bathu bakabe bali gele kumpoteleka, kabe eti, “Bonani! Bomme yangu ne banung'una bangu ababa! 35 Iye unoshinga kuda kwe Ndzimu ndiye nnung'una ne hazwadzi na mmeyangu.”
© Kalanga Bible © Bible Society of Botswana, 2008, 2018.