Nyaladzo mu nsi we buyendasi
1 Ndakalilila pezhugwi ndililila ku Ndzimu,
ndimimilila ku Ndzimu kuti ndizo undihwe.
2 Mu zhuba le kudziyidzika kwangu ndoshaka She,
mu busiku luboko gwangu gwakatambunudziwa gusinganete,
meya yangu yakalamba nyaladziwa.
3 Ndokumbula ngekwe Ndzimu, ngono agomela,
ashakisisa mu moyo wangu, ngono apela meya.
4 Mondikonedza kubhatshanya mesho.
Ndodziyidzika kunondikonedza lebeleka.
5 Ndokumbula ngekwe mazhuba akapinda,
ndokumbula makole a ntolo.
6 Ndobalabala ne moyo wangu busiku,
ndoalakana abuya ashakisisa meya yangu.
Ngono abe nditi,
7 “Apa She banowotilashila tjose kene?
Apa abangatjame nami kakale kene?
8 Apa ludo gwabo gusingazunguzike gowotothola tjose kene?
Apa kugadzabgwe kwabo kwe tjibaka tjose kwakapela kene?
9 Apa Ndzimu wakakangang'wa kube ne ngoni kene?
Apa bushongola gwawo gwakasitila mahwilo zogwadza awo kene?”
10 Ngono ndoti, “Wuhwa zogwadza kwangu
kunothama kuti luboko gwe luji
gwe Upezhugwi zhugwi gundishandukile.”
11 Ndowokumbula mishingo ya Yahwe;
ee, ndowokumbula makaabadzo enyu a ntolo.
12 Ndowoshakisisa mu moyo mishingo yenyu yose,
ndibuya ndikanuka ngekwe mishingo yenyu mikulu.
13 Zila yenyu Ndzimu yakayengemala.
Apa ndiupi ndzimu nkulu se Ndzimu wedu kene?
14 Mu Ndzimu unothama makaabadzo,
makalakidza simba lenyu mu njudzi.
15 Nge simba le luboko gwenyu makadzutunula bathu benyu,
bakololo ba Jakubo na Josefa.
16 Kwakati vula dzimubona, imwi Ndzimu,
kwakati vula dzimubona, dzikatja,
vula dzi pasi pasi dzikatetema.
17 Makole akatebula vula,
zhuzhugwi kukadadamula,
misebe yenyu ikapenya mbizho dzose.
18 Nsindo we kudadamula kwenyu kwakabe mu dutu,
lupenyo gwenyu gwakavoneka shango,
shango ikatetema ikazunguzika.
19 Zila yenyu yakapalama gungwa,
mwazha wenyu ukapalama vula ina masimba.
Koga gumbo lenyu pamakatshamba likasibong'we.
20 Makatungamila bathu benyu se ngubi ye pkhwizi,
nge luboko gwa Mushe na Aroni.
© Kalanga Bible © Bible Society of Botswana, 2008, 2018.