Nlebesambeli Mikhaiya unotjemela Ahabu
(2 Zwiyitikalo 18:2-27)1 Kwakatola makole ali matatu kusina ngwa pakati kwe Aramu ne Iziraela. 2 Koga kukati mu gole le butatu Jehoshafati mambo we Juda kazha kuna mambo we Iziraela.
3 Ngono mambo we Iziraela kadwa hadzasha dzidze kati, “Apa moziba kuti Ramotigiliyadi ngeyedu, ngono tinyelele koga akuna tjatinothama kuti tiyitole muna mambo we Aramu?”
4 Kabe ebhuzwa Jehoshafati eti, “Apa unowoyenda nami kunogwa ne Ramotigiliyadi kene?”
Jehoshafati kashandula eti, “Tjauli itjo nditjo tjandili itjo, babhayani bangu nge babo, mbizi dzangu dze ngwa nge dzidzo.” 5 Ngono Jehoshafati kadwa mambo we Iziraela kati, “Koga kutanga shaka gumbuludzo kuna Yahwe.”
6 Ndizo Ahabu kakubunganya balebesambeli bangabe mazana manna (400), kababhuzwa kati, “Apa ndiyende ndinobhayana ne Ramotigiliyadi kene ndiletje?”
Balebesambeli bakashandula beti, “Yendani munogwa nayo, Yahwe banowoilonga mu maboko enyu.”
7 Koga Jehoshafati kabe eti, “Apa akuna mmwe nlebesambeli wa Yahwe watingabhuzwa kakale kene?”
8 Mambo we Iziraela kashandula Jehoshafati eti, “Kuna mmwe nlebesambeli wa Yahwe unoyi Mikhaiya nkololo wa Imila, koga anditon'da, ngoti akuna tjakanaka tjaakatongolebela mbeli nge kwangu aisi mbipo koga.”
Ngono Jehoshafati kabe eti, “Usijalo mambo wangu!”
9 Ndizo mambo we Iziraela Ahabu kadana mmwe we hadzasha dzidze kandwa kati, “Tjimbidza unodana Mikhaiya nkololo wa Imila.”
10 Ipapo mambo we Iziraela Ahabu na Jehoshafati mambo we Juda bakabe bali ku libuwa mmwe ne mmwe aligele tjigalo tjitje tje bumambo bakaambala hazu dzabo dze bumambo ku nkoba we Samariya. Ngono balebesambeli bose bakabe belebelambeli bali mbeli kwabo. 11 Zedekiya nkololo wa Khenaana kathama nyanga dze tshipi kadwa Ahabu kati, “Yahwe bati mowogwa ne Baaramu nge nyanga idzedzi kudzina mubalobesa.” 12 Balebesambeli bose bakalebeselambeli saikoku, beti, “Tathilani ku Ramotigiliyadi munokunda, Yahwe banowoilonga mu maboko a mambo.”
13 Batumwa bakabe banodana Mikhaiya bakandwa bakati, “Bona, balebesambeli bakaleba dama ling'ompela ngogadzabgwe mambo kuti banowokunda, dzene dama lilo na ilobo lingafana ne le mmwe wabo, likagadzabo bgwe.”
14 Koga Mikhaiya kashandula eti, “Ndotuna na Yahwe banotjila, ndowoleba tjinowobe tjalebgwa ndi Yahwe!”
15 Kukati eswika mbeli kwa Mambo Ahabu, bakambhuzwa beti, “Mikhaiya, tiyende ku ngwa ku Ramotigiliyadi kene tigale?”
Ngono kadabila eti, “Tathilani ku Ramotigiliyadi munokunda, Yahwe banowoilonga mu luboko gwa mambo.”
16 Koga Mambo Ahabu kabhuzwa Mikhaiya eti, “Ndikudzikitadzile kangana kuti autondibudza tjimwe, ha isi lebeswa nge zina la Yahwe?”
17 Mikhaiya kadabila eti, “Ndakabona babhayani be Iziraela bakapalala pezhugwi kwe matombo, se pkhwizi dzisina nlisi, ngono Yahwe bakabe beti, ‘Bathu ibaba abana ntungamili, ima mmwe ne mmwe abgwilile ku nzi uwe nge mbakiso.’ ”
18 Mambo we Iziraela Ahabu kadwa Jehoshafati kati, “Apa andizokubudza kuti aangatongo lebeselambeli kwakanaka nge kwangu kene, kuzhe kwe mbipo?”
19 Mikhaiya kadwilila eti, “Ndizo tjihwani tjinolebgwa ndi Yahwe: Ndabona Yahwe baligele patjigalo tjabo tje bushe, bana batumwa babo bose be kudzimu bakabapoteleka. 20 Yahwe bakabe beti, ‘Ndiani unowowonga Ahabu kuti adze atathe anofila ku Ramotigiliyadi kene?’ Mmwe kaleba tjaaleba, mmwe kaleba tjipoga, 21 kudzina meya izha ima mbeli kwa Yahwe, ibadwa iti, ‘Ndowon'wonga.’ 22 Yahwe bakabhuzwa bakati, ‘Nge zila yakatini?’ Meya ikashandula iti, ‘Ndowonothama kuti balebesambeli ba Ahabu bose balebe manyepkhwa.’ Yahwe bakaidwa bakati, ‘Yenda unon'wonga, unowotubula.’ ”
23 Ipapo Mikhaiya kadwa mambo kati, “Yahwe balonga meya ye manyepkhwa mu milomo ye balebesambeli babo bose. Koga Yahwe bakulaulila golomodzo!”
24 Ndizo Zedekiya nkololo wa Khenaana kamadzuka kanoloba Mikhaiya mu buso kandwa kati, “Kwakatangisa lini kuti meya ya Yahwe idwe mundili ilebeleke nawe?”
25 Mikhaiya kandwa kati, “Bona, unowobona mu zhuba ilelo, launowonobgwata mu ng'umba itjamukati.”
26 Mambo Ahabu kalaula hadzasha dzidze kati, “Bhatani Mikhaiya munse ku nlauli we nzi nkulu Amoni ne kuna Joashi nkololo wa mambo. 27 Mubadwe muti mambo bakati, ‘Munlonge mu ng'umba ye busungwa mumpe tjiwunga ne vula kudzina ndinobuya ndili mpumbulu.’ ”
28 Mikhaiya kadwa Mambo Ahabu kati, “Ha ungabuya uli mpumbulu, kowobe kudwa kuti Yahwe abazolebeleka nami.” Kabe edwa bakabe bali ipapo eti, “Muhwe tjandaleba imwe bathu mose mu ipapa.”
Lufu gwa Ahabu
(2 Zwiyitikalo 18:28-34)29 Ndizo Mambo we Iziraela Ahabu na Mambo we Juda Jehoshafati bakabhuda bakayenda ku ngwa ku Ramotigiliyadi. 30 Mambo we Iziraela kadwa Jehoshafati kati, “Ndowolashidza azwithama mbhayani koga usi mambo, koga iwe uambale zwiambalo zwizo zwe bumambo.” Ngono mambo we Iziraela kazwilashidza kanongina mu ngwa.
31 Ipapo mambo we Aramu wakabe adwa balauli babe be koloyi dze ngwa bali makumi matatu ana babili eti (32), “Imwi musitongo bhayana ne mmwe ntukunu kene nkulu, koga mubhayane na mambo we Iziraela Ahabu.” 32 Kukati balauli be koloyi dze ngwa bebona Jehoshafati bakazwidwa beti, “Nge lebeswa ndiye mambo we Iziraela.” Ndizo bakabhayana naye, Jehoshafati kadila guwo. 33 Kukati balauli be koloyi dze ngwa baziba kuti ate ali iye mambo we Iziraela, bakashanduka bakaletja kutatana naye. 34 Koga kukati mmwe mbhayani we Aramu ngoambambidza ekweba dati lile nsebe ukanobhaya mambo we Iziraela panoshanganila zwiambalo zwizwe zwengwa. Mambo Ahabu kadwa n'yendisi we koloyi ye ngwa kati, “Shandukila shule, undiduse mu ngwa ngoti ndakubala.”
35 Zhuba ilelo ngwa ikakula kwakabangalala, Mambo Ahabu kasendamisiwa mu koloyi iye ye ngwa kubhayaniwa ne Baaramu, malopa kawunga edwa mu banga lile kazha kusi kwe koloyi kudzina zhuba lingina efa. 36 Kukati zhuba liyendila ngina kukamimiligwa babhayani be Iziraela be mamo wose bedwiwa kuyi, “Mmwe ne mmwe ngaayende ku nzi wakanyi kwabo ne mmwe ne mmwe ku shango ya kanyi kwabo!”
37 Ndizo Mambo Ahabu kafa. Itumbu tjitje tjikasengegwa ku Samariya kanobiganyigwa ko. 38 Koloyi iye ye ngwa ikasukigwa ku dziba le Samariya kwakabe kungulila fukula, mbgwa dzikanazwa malopa awe kuyendidzana ne dama la Yahwe labakaleba.
39 Apa mimwe mishingo ya Ahabu na zose zwaakathama ne ng'umba iye ye bushe yaakabaka nge nyanga dze zhowu ne mizi mikulu yose yaakabaka, azwizokwagwa mu Lukwalo gwe Zwiyitikalo zwa Bomambo be Iziraela kene? 40 Ndizo Ahabu kafa kalala na botate babe, ngono nkololo uwe Ahaziya kan'gala thaka mu bumambo gugwe.
Jehoshafati mambo we Juda
(2 Zwiyitikalo 20:31—21:1)41 Jehoshafati nkololo wa Asa wakabigwa mambo we Juda mu gole le bunna Ahabu ebusa Iziraela. 42 Jehoshafati wakabigwa mambo ana makole ali makumi matatu ana ali mashanu (35), kabusa Jerusalema makole ali makumi mabili ana ali mashanu (25). Zina la mme ba Jehoshafati lakabe liyi Azuba nkololokadzi wa Shilehi. 43 Jehoshafati kangina mu gumbo la Asa tate babe, ethama ndulamo mbeli kwa Yahwe, nenguba magalo e kunamata asakakolomogwa ne bathu bakadwilidzila kupisila zwibhayilo ne motsha muali. 44 Kwakabe ne mbakiso pakati kwa Jehoshafati na mambo we Iziraela.
45 Apa mimwe mishingo ya Jehoshafati ne kube ne tjilopa tjaakalakidza ne kubhayana kukwe, azwizokwagwa mu Lukwalo gwe Zwiyitikalo zwa Bomambo be Iziraela kene? 46 Wakadusa midzimukadzi yakabe yasala mu nsi we kubusa kwa tate babe Asa, mu shango.
47 Shango ye Edomu yakabe isina mambo, kwakabe kubusa mbhatshi wa mambo wakabe abigwa ndi mambo we Juda.
48 Jehoshafati wakabe athama zwikepe zwe mbumbiko yezwe Tashishi kunosenga golide ku Ofira, koga migoro ikasiswike, ngobe yakapkhwanyikila ku Eziyonigeberi. 49 Ipapo mambo we Iziraela Ahaziya nkololo wa Ahabu kadwa Jehoshafati kati, “Imani balanda bangu bayende ne benyu nge zwikepe.” Koga Jehoshafati kalamba.
50 Jehoshafati kafa katobela botate babe kabiganyiwa pakabiganyiwa botate babe mu nzi nkulu wa Dafite ku zwikumbu zwa bomambo. Ngono Jehoramu nkololo uwe kan'gala thaka mu bumambo gugwe.
Ahaziya mambo we Iziraela
51 Ahaziya nkololo wa Ahabu wakabigwa mambo we Iziraela mu gole le bugumi lina kutendeka Jehoshafati ali mambo we Juda, ngono kabusa Iziraela mu Samariya makole ali mabili. 52 Wakathama tjibi mbeli kwa Yahwe ngongina mu gumbo la tate babe ne la mme yabe ne mu gumbo la Jeroboamu nkololo wa Nebhati wakathamisa Iziraela tjibi. 53 Wakalonga Yahwe Ndzimu we Iziraela bushongola nge kushingila ne kunamata Bhaale sa tate babe.
© Kalanga Bible © Bible Society of Botswana, 2008, 2018.