Ndzimu unokombolela Iziraela
1 “Iwe nkololo we nthu, lebelambeli ngekwe matombo e Iziraela uti, ‘Imwi matombo e Iziraela ihwani dama la Yahwe. 2 She Yahwe bakati, Ngoti tjita tjakati nge kwenyu, “Ahaa! Matuthu iyawa a ntolo abe edu.” ’ 3 Ndizo wali lebelambeli uti, ‘She Yahwe bakati, ngoti bakakuthukudza kwakwako, bakakushakadza mu midzibo yose, kube kuthama kuti ube thundu mu njudzi dzose, ngono kukathama kuti ube tjiyeye ulengudzike mu bathu. 4 Ndizo wali imwi matombo e Iziraela, ihwani dama la She Yahwe. Ndizo She Yahwe bakati ku matombo ne matuthu ne ku hwobana dze vula ne ku mikuku ne ku matongo akathukudzika kafulukwa, abe thundu inotapiwa ne tjiyeye mu njudzi dzose kupoteleka, 5 ndizo wali She Yahwe bakati, ndolebeleka ndili mu kugwadzamoyo kukulu ngekwe njudzi dzose, nenge kwe Baedomu ibo bakati nge kushatha kukulu mu moyo yabo bakalengudza shango yangu bakaitola bakaithama yabo ngekwe mafulilo ayo.’ 6 Ndizo wali lebesambeli ngekwe shango ye Iziraela, udwe matombo ne matuthu ne hwobana dze vula ne mikuku uti, She Yahwe bakati, ‘Ndolebeleka ndili zhele bushongola guna fupa ngoti wakadziyidziwa nge masapa e njudzi.
7 “ ‘Ndizo She Yahwe bakati, Ndotuna ndakamilidza luboko nditi njudzi dzose kukupoteleka dzowolengudzika.
8 “ ‘Koga imwi matombo e Iziraela mowothinila thabi mukazwalila mitjelo bathu bangu Baiziraela ngoti banowobuya kanyi tjinyolotjo. 9 Ngoti bonani ndimile namwi, ndowoshandukila kumuli, mowoling'wa mukabuya mukadzwagwa, 10 ngono ndowowatsha bathu pezhugwi kwenyu, bathu bose be Iziraela. Mizi inowogagwa, matongo kamusiwa. 11 Ngono ndowowatsha bathu ne phuka pezhugwi kwenyu. Banowowanda bakabe banjinji. Ndowobagadza pezhugwi kwenyu sa ntolo ngono athama kuti mu watshike kupinda sekwa makabe muli iko ntolo. Ipapo mowoziba kuti ndimi Yahwe. 12 Ndowothama kuti bathu bangu Baiziraela bayende pezhugwi kwenyu. Ngono mowobe babo, mukabe thaka yabo, amutjowobe mungababulaila bana kakale.
13 “ ‘She Yahwe bakati, “Ngoti banoti ku kuli, unoja bathu ube usiya ludzi gusina bana,” 14 ndizo wali autjawoja bathu kakale autjawosiya ludzi gusina bana, kojalo She Yahwe. 15 Anditjawoletja kuti mukaikanyiwe nge njudzi, amutjawolengudziwa nge bathu kene mukathama kuti ludzi gwenyu guwe, koleba Yahwe.’ ”
Butjilo butshwa mu Iziraela
16 Dama la Yahwe likazha kundili liti, 17 “Nkololo we nthu, bathu be Iziraela bakati batjagala mu shango yabo, bakaitemapadza nge mipanga yabo nenge mishingo yabo. Mipanga yabo yakabe inga kutemapala kwe nkadzi ali mu tjiambalo. 18 Ndizo ndakapedzela bushongola gwangu pezhugwi kwabo ngekwe malopa abakatebula mu shango nenge kwe midzimu ye zwifano yabakatemapadza shango ndiyo. 19 Ndakabapaladza nge njudzi, ndizo bakapalala nge shango. Ndakabasumikilisa kuyendidzana nge mipanga yabo. 20 Koga kumwe ne kumwe kwabakayenda mu njudzi bakalengudza zina langu nge kuti kwakabe kuyi nge kwabo, ‘Ibaba bathu ba Yahwe, koga bakasiyiswa shango yabo.’ 21 Ngono ndina hanya ngekwe zina langu lakayengemala lakalengudziwa nge bathu be Iziraela pakati kwe njudzi kwabakayenda.
22 “Ndizo wali idwa bathu be Iziraela uti She Yahwe bakati, ‘Anditothama ikoku nge kwenyu, koga ndokuthama ngekwe zina langu lakayengemala lamakalengudza pakati kwe njudzi dzamakayenda kudzili. 23 Ndowoyengemadza zina langu gulu lakalengudzika pakati kwe njudzi, ilo lamakalengudza mu dzili, ngono njudzi dzowoziba kuti ndimi Yahwe pandinowobe ndilakidza kuti ndakayengemala ndimwi mu mesho abo, kojalo She Yahwe.
24 “ ‘Ndowomutola mu njudzi, amukubunganya kudwa mu shango dzose ngono amuzhisa mu shango yenyu. 25 Ndowomunyasa nge vula mbuyanana, ngono mowobe babuyanana, mowotjenapala kudwa mu kutemapala kwenyu kose ne kudwa mu midzimu yenyu yose ye zwifano. 26 Ndowomupa moyo ntshwa alonga meya mitshwa mu muli, ndowodusa moyo wenyu we bgwe alonga moyo we nyama. 27 Ndowolonga meya yangu mu muli ngono amuthama kuti mulondolodze milayo yangu mube ne njele kushingikadza ndayo dzangu. 28 Ipapo mowogala mu shango yandakapa bobatategulu benyu, mowobe bathu bangu, imi ndowobe Ndzimu wenyu. 29 Ndowomutjidza kudwa mu kutemapala kose kwenyu, ngono ndowodana mathunde aathama manjinji ngono anditowozhisa bhamba mu muli. 30 Ndowowatsha mitjelo ye miti ne mathunde mu minda kuita kuti musitjabe mungalengudziwa nge njudzi ngekwe bhamba. 31 Ipapo mowokumbula mipanga yenyu mibi ne mishingo yenyu yakabipa, ngono mowozwishima ngekwe zwibi zwenyu ne mishingo yenyu inoshimisa. 32 Anditowobe ndithamisiwa ikoku ndimwi, kojalo She Yahwe, ikoku mukuzibe. Bhakhwani nge shoni munyadziwe moyo nge mipanga yenyu imwi bathu be Iziraela.
33 “ ‘She Yahwe bakati, mu zhuba landinomutjenapadza kudwa mu zwibi zwenyu ndowothama kuti mizi yenyu igagwe kakale, matongo amusiwe. 34 Shango yakabe yathukudzika inowolimiwa pana kuti igale ilingwa nge banopinda yakathukudzika. 35 Ngono banowoti, “Shango iyeyi yakabe yakathukudzika yofanana ne nnda we Edeni ne mizi yakabe yathukudzika yabe matongo, ngwenu yabe gegwe yasimisiwa.” 36 Ipapo njudzi idzedzi dzakamupoteleka dzowoziba kuti imi Yahwe ndakamusa matongo kakale adzwala pakabe pathukudzika. Imi Yahwe ndaleba ngono ndowothama saikoko.’
37 “She Yahwe bakati, naikobo ndowoletja bathu be Iziraela bendikumbila woku, ngono ndowobathamila ikoku, kuthama bathu babo kuti bawande se ngubi. 38 Banowowanda se ngubi iwandila zwibhayilo ku Jerusalema mu tjibaka tje mizano yayo. Ndizo matongo e mizi anowozhala ngubi dze bathu. Ipapo banowoziba kuti ndimi Yahwe.”
© Kalanga Bible © Bible Society of Botswana, 2008, 2018.