Kulilila Egipiti
1 Dama la Yahwe likazha kundili liti, 2 “Nkololo we nthu, lebesambeli uti, ‘She Yahwe bakati,
“ ‘Kuwa uti,
“Yee mme wee! Ngekwe zhuba ilelo!”
3 Ngoti zhuba labe pejo,
zhuba la Yahwe labe pejo,
i zhuba linowobe ne makole,
tjowobe tjili tjibaka tje njudzi.
4 Thumo lowongina mu Egipiti,
ne buyendasi gukabe po mu Itopiya
ha bebulawa bewa mu Egipiti,
thundu yayo itapiwa,
ne thiwa dzayo dzitshindunugwa.
5 “ ‘Itopiya ne Puti ne Ludi ne Arabiya yose ne Libhiya ne bathu be shango ina tjidumano nayo banowobulawa nge thumo kang'ompela ne Egipiti.
6 “ ‘Yahwe bakati,
Bana nshanganyila ne Egipiti banowowa,
simba lainozwida ndilo lowokong'wa.
Kudwa ku Migidolo kunoti ku Siyene
banowowa nge thumo mukati kwayo.
Koleba She Yahwe.
7 Dzowothukudziwa pakati kwe shango dzimwe dzakathukudziwa,
mizi yabo inowobe pakati kwe mizi yabe matongo.
8 Ipapo banowoziba kuti ndimi Yahwe
pandinowobe ndapisa Egipiti
naibo bose banoibhatsha bakolomoka.
9 “ ‘Mu zhuba ilelo thumwa dzowodwa kundili dzili mu zwikepe kulobesa hana Itopiya batjakazwikangang'wa.
Buyendasi gowoiwila mu zhuba le mbatsha dze Egipiti nge kuti bonani yeno lozha.
10 “ ‘She Yahwe bakati,
Ndowopedzisa goko le Egipiti
nge luboko gwa Mambo Nebukadineza we Bhabhiloni.
11 Iye ana ngwa iye, ludzi gwakabangalala mu njudzi
unowozhisigwa ku kolomola shango.
Banowobhayana ne Egipiti
ngono banowozhadza shango nge babulawa.
12 Ndowowomesa njizi
ndibe nditengesa shango ku bashingi be mbipo.
Ndowothukudza shango ne tjimwe ne tjimwe tjimu ili ndishingisa bataya.
Imi Yahwe ndaleba.
13 “ ‘She Yahwe bakati,
Ndowokolomodza midzimu ye zwifano
apedza nge zwifano mu Memifisi.
Akutjawobe ne gombgwa mu shango ye Egipiti,
ndizo ndowozhisa kutja mu Egipiti.
14 Ndowothukudza Patirosi
apisa Zoani
ndibe ndiloba Thebesi.
15 Ndowolakidza kugwadzamoyo kwangu mu Pelusiumu
mbako dze matizhilo dzakasima dze Egipiti
ndibe ndilobesa makoko e Thebesi.
16 Ndowolonga moto mu Egipiti
Sini ikabe mu zogwadza zwikulu.
Thebesi inoligwa makuma
ngono Memifisi inowogwisana ne zwita masikati.
17 Bazhuzha be Oni nebe Pibeseti banoligwa nge thumo,
mizi mikulu nge kwayo inowotapiwa.
18 Kowobe zhalima ku Tahefanesi
ha ndipedza simba le Egipiti,
simba lainozwikudza ndilo lowobe lapela.
Nzi nkulu unowotshibikigwa nge gole
bakololokadzi bayo banotapiwa.
19 Ndiyo zila yandinoloba Egipiti ndiyo.
Ndizo banowoziba kuti ndimi Yahwe.’ ”
Ndebelombeli ngekwa Faro
20 Mu gole le bugumi lina ling'ompela, mu mwedzi we kutanga, mu zhuba le butendeka le mwedzi dama la Yahwe lakazha kundili liti, 21 “Nkololo we nthu, ndavuna luboko gwa Faro mambo we Egipiti, ngono bona, aguzosungwa kene kutaligwa kuti gupole kwagungabe ne simba kubhata thumo. 22 Ndizo Yahwe bakati, Bonani, ndobhayana na Faro mambo we Egipiti ngono ndowovuna maboko awe, igogu gwakasima kose naigoguje gwakavunika athama kuti thumo liwe mu luboko gugwe. 23 Ndowopaladza Baegipiti nge njudzi ngono abaandamisa nge shango. 24 Ndowosimisa maboko a mambo we Bhabhiloni ngono ndibe ndilonga thumo langu mu luboko gugwe koga ndowovuna maboko a Faro ngono unowogomela panli nge kugomela kwe wakubadziwa kwaangafa. 25 Ndowosimisa maboko a mambo we Bhabhiloni koga maboko a Faro anowolembeleka. Banowoziba kuti ndimi Yahwe ha ndilonga thumo langu mu luboko gwa mambo we Bhabhiloni. Ngono unowogutambunudza kubhayana ne shango ye Egipiti. 26 Ndowopaladza Baegipiti nge njudzi abaandamisa nge shango dzakasiyana. Banowoziba kuti ndimi Yahwe.”
© Kalanga Bible © Bible Society of Botswana, 2008, 2018.