Ndebelombeli ngekwe Edomu
1 Dama la Yahwe lakazha kundili liti, 2 Nkololo we nthu, milidza buso gugo ulinge ku Dombo le Seiri ulebelembeli nge kwalo, 3 ulidwe uti She Yahwe bakati, bona, ndobhayana nawe Dombo le Seiri, luboko gwangu ndogulingisanya nawe kukuthama dukuthuku ne shakadzwa. 4 Ndowothama mizi iyo matongo, unowobe dukuthuku, ngono unowoziba kuti ndimi Yahwe.
5 Iwe utjakabhata lubengano gwa ntolo, ube ubulayisa Baiziraela thumo mu nsi we kumanikana kwabo, mu tjibaka tje bhelelo le kulobgwa shamu kwabo, 6 ndizo wali se nditjila kojalo She Yahwe, ndonomululwamisila kutebuka kwe malopa ngono lopa lowotatana namwi. 7 Ndowothama Dombo le Seiri dukuthuku ne shakadzwa ndibe ndithubula mulili bose banozha ne banoyenda. 8 Ndowozhadza matombo ayo nge babulawa. Matuthu enyu ne mikuku yenyu ne hwobana dze vula dzowozhala babulawa nge thumo. 9 Ndowokuthama dukuthuku nge kusingapele ne mizi mikulu ayitowogagwa. Ipapo mowoziba kuti ndimi Yahwe.
10 Ngekuti wakati, Njudzi idzedzi mbili ne shango idzedzi mbili dzowobe dzangu, towodzitola, nenguba Yahwe bakabe balipo zwabo. 11 Ndizo wali se nditjatjila, kojalo She Yahwe, ndowokubhata nge kunoyendidzana ne bushongola ne fupa lawakalakidza ngekwe lubengo gugo mu bali, ngono ndowothama kuti ndizibike pakati kwenyu pandinowomusumikilisa. 12 Ipapo mowoziba kuti imi Yahwe ndakahwa ndebeleko dzenyu dzose dzamakalengudza matombo e Iziraela ndidzo muti, “Akathukudziwa, ngono takaapiwa kualobesa.” 13 Makazwikudza pandili nge milomo yenyu mukawatsha matama enyu nge kwangu ngono ahwa. 14 She Yahwe bakati, “Shango yose inowoti yakashatha, imi ndowomuthukudza. 15 Se makati mukashathila thaka ye bathu be Iziraela itjinyika, namibo ndowomubhata saikoko. Iwe Dombo le Seiri, unowothukudzika, iwe ne Edomu yose. Ipapo banowoziba kuti ndimi Yahwe.”
© Kalanga Bible © Bible Society of Botswana, 2008, 2018.