Kung'ong'ola kwa Jeremiya
1 Imwi Yahwe mogala makalulwama,
ha nding'ong'ola ku muli.
Koga ndoshakabhuzwa ngekwe ndebo yangu nditi,
Ini babiibi bebhudilila kene?
Ini basina bugalimoyo bali gele bakashalanduka?
2 Makabadzwala bakamela midzi,
banokula bakazwala mitjelo.
Mogala muli pa milomo yabo,
koga muli kule ne mimoyo yabo.
3 Koga mundiziba imi Yahwe,
mondibona mukalika mikumbulo yangu nge kwenyu.
Mubakwebele kutjena se pkhwizi inonobhayiwa.
Mubabigile ntome mubabigila zhuba le kubhayiwa.
4 Kowotola tjibaka tjingapani shango ili mu tjililo,
ne bushwa gwe shango yose gubuna kene?
Ngoti ibabo banogala muili babiibi,
phuka ne nyuni dzakafa.
Ngoti bathu banoti, “Aatobona bhelelo ledu.”
5 “Ha wakatongo phikidzana ngo labuka ne bathu,
bakamusiya mungaphikidzana ne mbizi tjini wali?
Ha mu shango yakabakililika musakadzikama,
mungatubula tjini mu ishaka tje Jorodani wali?
6 Nanga hama dzenyu iyo ng'umba ya tate benyu,
bakamuthamila bupitipiti,
banolila nge kwenyu,
musitongo bagalabgwe,
nenguba bangamuleba bubuya.
7 “Ndakafupatila ng'umba yangu.
Ndakalasha thaka yangu.
Ndakalonga tjido tje moyo wangu,
mu maboko e zwita zwizwe.
8 Thaka yangu yatjindishandukila,
yonga shumba mu ishaka,
inondibombela,
ndizo ndotjibenga.
9 Apa thaka yangu yotjinga phele kundili,
apa nyuni dzakagupoteleka kugunginilila kene?
Yendani munokubunganya phuka dze shango,
mudzizhise kuti dzowoja.
10 Balisi banjinji bakakolomola nnda wangu we mizhambi,
bakakanyangila pasi gobe langu,
bakathama gobe langu lakanaka
tjilambanyika tjakathukudzika.
11 Bakalithama likathukudzika kwakabangalala,
lolilila kundili.
Shango yose yakathukudzika,
ngono nthu aana hanya nge kwako.
12 Pezhugwi kwe matuthu asina miti mu tjilambanyika,
bakolomoli bazha,
ngoti thumo la Yahwe loja,
akuna nthu wakabakililika.
13 Banowodzwala korong ngono bakavuna mmihwa,
banozwinyadzila suli ngono bakasivune tjimwe.
Banowobhakhwa nge shoni ngekwe zwawavuna,
ngekwe kugwadzamoyo kukulu kwa Yahwe.”
14 Yahwe banoleba ngekwe babakidzani bangu babiibi, ibo banobhatabhata thaka yandakapa bathu bangu Iziraela kuti ibe yabo beti, “Bonani, ndowobadzikunula mu shango yabo ne ng'umba ye Juda ndowoidzikunula pakati kwabo. 15 Ndowoti ndisinokubadzikunula ndowoti kakale abahwila ngoni, abgwiliza mmwe ne mmwe ku thaka iye ne mmwe ne mmwe ku shango iye. 16 Ngono banowoti bezwidiya zila dze bathu bangu, betuna nge zina langu beti, ‘Nge malebeswa Yahwe banotjila,’ sekwa bakadiya bathu bangu kutuna na Bhaale ipapo banowodzikamisiwa pakati kwe bathu bangu. 17 Koga ha itjaba tjimwe tjisingandihwilile ipapo ndowotjidzikunula tjoselele atjikolomodza, kojalo Yahwe.”
© Kalanga Bible © Bible Society of Botswana, 2008, 2018.