1 Dama la Yahwe likazha kuna Jehu nkololo wa Hanani ngekwa Bhaasha liti, 2 “Ndakakumilidza wabe uli nthu upasi, akubiga mbusi we bathu bangu Baiziraela, koga ukatshamba mu gumbo la Jeroboamu, ukathama bathu bangu kuti bathame zwibi, bakandithama azhala bushongola ngekwe zwibi zwabo. 3 Ndizo wali ndowopaladza Bhaasha ne ludzi gugwe, sekwa ndakathama ludzi gwa Jeroboamu nkololo wa Nebati. 4 Mmwe ne mmwe we ludzi gwa Bhaasha unowofila mu nzi nkulu unowojiwa nge mbgwa, ngono wafila mu shango unowojiwa nge magola.”
5 Apa mimwe mishingo ya Bhaasha yaakashinga ne masimba awe azwizokwagwa mu Lukwalo gwe Zwiyitikalo zwa Bomambo be Iziraela kene? 6 Ngono Bhaasha kafa katobela botate babe, ngono kabiganyigwa ku Tireza. Nkololo uwe Ela kan'gala thaka mu bumambo.
7 Kakale dama la Yahwe likazha nge nlebesambeli Jehu nkololo wa Hanani ngekwa Bhaasha ne ludzi gugwe, ngobe bakathama mbipo mbeli kwa Yahwe, kufanana ne ludzi gwa Jeroboamu, Yahwe bakazhala bushongola, bakabuya bakalobesa ludzi gwa Jeroboamu.
Mambo Ela we Iziraela
8 Mu gole le bumakumi mabili ana ali tathatu Asa ali mambo we Juda, Ela nkololo wa Bhaasha katangisa kubusa Iziraela mu Tireza, ngono kabusa makole ali mabili. 9 Zimiri mmwe we makombgwa awe, nlauli we gwamu limwe le koloyi dzidze dze ngwa, kathama nlangano ngekwa Ela. Kukati limwe zhuba ku Tireza, Ela kabe eng'wa elaladza ali mu ng'umba ya Areza, nlauli we ng'umba ye bumambo. 10 Zimiri kangina mu ng'umba kaloba Ela kambulaya, kabe engala thaka mu bumambo gugwe. Kuthu ikoko kwakashingikala mu gole le bumakumi mabili ana ali kutendeka Asa ali mambo we Juda.
11 Kukati atjambo tola tjigalo tje bumambo, kabulaya bose be ludzi gwa Bhaasha. Kasitongo nsiyila nakuto lili limbelimbe ling'ompela le gamu lile kene nzwalani uwe. 12 Ndiko Zimiri sekwa akalobesa ludzi gose gwa Bhaasha, kuyenda nge dama lakalebgwa ndi Yahwe ngekwa Bhaasha batuma nlebesambeli Jehu, 13 ngekwe zwibi zwakathamiwa ndi Bhaasha ne ngekwe zwe nkololo uwe Ela, bebuya bethama kuti Iziraela ithame tjibi, kwakathama kuti Yahwe bazhale bushongola ngekwe midzimu yabo yakabezhiwa. 14 Apa mimwe mishingo ya Ela na zose zwaakathama azwizokwagwa mu Lukwalo gwe Zwiyitikalo zwa Bomambo be Iziraela kene?
Zimiri Mambo we Iziraela
15 Mu gole le bumakumi mabili ana ali kutendeka (27) Asa ali mambo we Juda, Zimiri wakabusa Iziraela mazhuba ali kutendeka ali mu Tireza. Ipapo babhayani be Iziraela bakabe bakalingisana nge kunginilila Gibethoni, nzi we Bafilisitiya. 16 Kukati babhayani behwa kuti Zimiri wakathama nlangano ngekwa mambo kabuya kambulaya, ipapo mu zhuba ilelo, Iziraela yose ikatola nlauli we babhayani Omiri ikambiga mambo we Iziraela. 17 Ndizo Omiri ne babhayani bose be Iziraela bakabhuda mu Gibethoni bakanokomba Tireza kuyinginilila. 18 Kukati Zimiri ebona kuti nzi nkulu watapiwa, kangina mu matizhilo mu ng'umba ye bushe kaipisa ngono katshwilabo mukati kafa. 19 Ikoku kwakashingikala ngekwe zwibi zwaakathama, etshamba mu gumbo la Jeroboamu, ethama mbipo mbeli kwa Yahwe nge zwibi zwizwe nenge kuthama Iziraela kuti ithamebo tjibi. 20 Apa mimwe mishingo ya Zimiri ne milangano yaakathama azwizokwagwa mu Lukwalo gwe Zwiyitikalo gwa bomambo be Iziraela kene?
Mambo Omiri we Iziraela
21 Ipapo bana be Iziraela bakathubukana bakabe makwamu mabili. Gwamu limwe lakabe lishaka kubiga Tibini nkololo wa Ginathi kube mambo, limwe lishaka kubiga Omiri. 22 Koga batobeli ba Omiri bakakulila ba Tibini nkololo wa Ginati. Tibini kabe efa, ngono Omiri kabigwa mambo. 23 Mu gole le bumakumi matatu ana ling'ompela (31) Asa ali mambo we Juda, Omiri katangisa kube mambo we Iziraela ali mu Tireza. Ngono kabusa makole ali gumi lina mabili. 24 Katenga Dombo le Samariya nge maloso e siliva ali zwiwulu zwili tathatu (6 000) mu nlume wakabe kuyi Shemeri. Omiri kabakilila dombo nge luswingo, kabaka nzi nkulu pezhugwi kwe dombo ilelo, kaudana eti, Samariya, eudana nge zina la Shemeri, wakabe ali mweni we dombo kutanga.
25 Omiri kathama mbipo mbeli kwa Yahwe, yakapinda mbipo dzose dze bakabusa mbeli kukwe. 26 Ngoti wakatshamba mu gumbo la Jeroboamu nkololo wa Nebati ne mu zwibi zwaakathama kuti Iziraela ithamebo tjibi, ngothama kuti Yahwe bazhale bushongola ngekwe midzimu yabo yakabezhiwa. 27 Apa mimwe mishingo ya Omiri yaakathama ne kube ne tjilopa kwaakalakidza, azwizokwagwa mu Lukwalo gwe Zwiyitikalo gwa Bomambo be Iziraela kene? 28 Omiri kafa katobela botate babe, ngono kabiganyiwa mu Samariya. Ahabu nkololo uwe kan'gala thaka mu bushe gugwe.
Mambo Ahabu we Iziraela
29 Mu gole le makumi matatu ana ali zhanakadzi (38) Asa ali mambo we Juda, Ahabu nkololo wa Omiri katangisa kubusa Iziraela ali mu Samariya. Ngono Ahabu nkololo wa Omiri wakabusa Iziraela ali mu Samariya makole ali makumi mabili (20). 30 Ngono Ahabu nkololo wa Omiri kathama mbipo mbeli kwa Yahwe kupinda bose bakabusa mbeli kukwe. 31 Ngono se kwakabe kuli kulelu munli kuthama zwibi sekwakathama Jeroboamu nkololo wa Nebati, kalobola Jezebele nkololokadzi wa Ethibhaala mambo we Basidoni, kabuya kanoshingila Bhaale, ebe ennamata. 32 Kathamila Bhaale tjibeso tjinopisigwa zwibhayilo mu ng'umba ya Bhaale ye kunamata, yaakambakila mu Samariya. 33 Ahabu kabiga ndzimukadzi Ashera. Wakathama kunopinda kose kwakathamiwa nge bakabusa mbeli kukwe, kwakathama kuti Yahwe, Ndzimu we Iziraela bazhale bushongola. 34 Hiele we Bhetele wakati mu mazhuba e kubusa kukwe kabaka Jerikho. Wakati atjateya thiwa dzawo kafigwa nge mbano iye Abiramu, kati atjabaka mikoba kafigwa nge kologwe tjitje Segubu, kuyendidza nge dama la Yahwe labakaleba batuma Joshuwa nkololo wa Nuni.
© Kalanga Bible © Bible Society of Botswana, 2008, 2018.