Dafite unokunda Baamoni ne Basiriya
(2 Samuele 10:1-19)1 Kwakati shule Nahashi mambo we Baamoni kafa ngono kukabusa bakololo babe. 2 Dafite ngono kabe eti, “Ndowothamila lubu Hanuni nkololo wa Nahashi ngobe tate babe bakabe ne lubu mundili.” Ndizo Dafite katumila batumwa kunonyaladza Hanuni ngekwe lufu gwa tate babe. Kwakati balanda ba Dafite baswika kuna Hanuni mu shango ye Baamoni kunnyaladza, 3 makulukota e Baamoni bakati kuna Hanuni, “Apa unokumbula kuti se Dafite atumila banyaladzi ku kuli wali unoteta tate babo wali kene?” Apa ate ili kuti balanda babe bazha kuwoshakisisa ne shola kuti batole shango kene?
4 Ndizo Hanuni katola balanda ba Dafite kabatesela kapalula zwiambalo zwabo na pakati kunoti mu thunji ngono kabe ebatata. 5 Bathu bakayenda bakanobudza Dafite ngekwe tjashingikalila balanda ngono katumila ndaidzo kuti balume ibaba bagale mu Jerikho kudzina ndedu dzabo dzatjikula bekowotjibuya ngobe bakabe babhatisiwa shoni kwazo.
6 Kwakati Baamoni bebona kuti batjizhisa lubengo pakati kwabo na Dafite Hanuni ne Baamoni bakatumila zwiwulu (1 000) zwe talenta dze siliva kutapa koloyi dze ngwa ne batathi be mbizi ku Mesopotamiya neku Aramaka neku Zoba. 7 Bakatapa koloyi dze ngwa dzili zwiwulu zwili makumi matatu ana babili (32 000) ne babhayani ba mambo we Maaka bakazha bakakotokela kupoteleka Medeba. Ngono Baamoni bakazhabo kudwa ku mizi yabo mikulu bazwilulwamisila ngwa. 8 Dafite wakati ehwa ngekwa ikoku katumila Joabu ne babhayani be balume bakasima. 9 Baamoni bakabhuda bakama zubuyanana pa nkoba we nzi nkulu nabo mambo bakabe bazhakuwobhatsha bakabe bazwilulwamisa zubuyanana pa tjibata.
10 Joabu wakati ebona kuti ngwa yakabazwilulwamisila ku banginilila mbeli na shule kashalula bamwe be balume be Iziraela kababiga bakalinga ku Siriya, 11 bamwe bose be balume babe bakabe basala kabiga Abishayi nnung'una uwe kube ntungamili wabo ngono bakabigwa kulingisana ne Baamoni. 12 Ngono Joabu wakandwa eti, “Ha Basiriya bangandikulila ube uzhawondibhatsha koga ha Baamoni bangakukulila ndowozha kukubhatsha. 13 Simani mube ne tjilopa, ngati gwileni bathu bedu ne mizi mikulu ye Ndzimu wedu, ngono Yahwe ngabathame tjabanobona tjakabalulwamila.”
14 Ndizo Joabu ne bathu baakabe anabo bakasedzela mbeli kwe Basiriya kugwa ngono bakabatizha. 15 Ngono Baamoni bakati bebona Basiriya betizha bakatizhabo bakadwa mbeli kwa Abishayi nnung'una wa Joabu bakatizhila mu nzi nkulu. Ipapo Joabu kayenda ku Jerusalema.
16 Koga Basiriya bakati bebona kuti bakundiwa nge Baiziraela bakatuma batumwa kuti badwe Basiriya bakabe bali seli kwe gwizi gwe Yufuratesi bali pasi kwa Shofaki nlauli we babhayani ba Hadadezeri kuti babuye. 17 Ngono Dafite wakati ebudziwa ikoku kakubunganya Baiziraela ngono bakatjuluka Jorodani bakazha ku bali bakama kulingisana nabo. Dafite katangisa ngwa ne Basiriya naibo bakangwisa. 18 Basiriya bakatizha bakadwa mbeli kwe Baiziraela. Dafite wakabulaya balume be Basiriya be koloyi dze ngwa bali zwiwulu zwili kutendeka (7 000) ne babhayani bali zwiwulu zwili makumi manna (40 000) banoyenda nge makumbo kabulaya kakale ne nlauli we babhayani babo. 19 Ngono balanda ba Hadadezeri bakati bebona kuti bakundiwa ne Baiziraela bakagadzana na Dafite ngono bakabe pasi kukwe. Ndizo Basiriya bakasitjade kubhatsha Baamoni.
© Kalanga Bible © Bible Society of Botswana, 2008, 2018.